Read Iban Isaiah 37 Bible Online

Isaiah 37 - Iban bible

Isaiah 37

¹Lebuh Raja Hesekiah ninga utai ti dipadahka sida tiga, iya lalu nyarikka gari diri, ngerasukka kain guni, lalu mansang ngagai Rumah Sembiang.

²Iya lalu ngasuh Eliakim, pemesai ke ngemataka istana, Sebna, ti nyadi kerani kot, enggau bala imam ke tuai agi umur betemu enggau Isaiah anak Amos. Sida tu mega begari ngena kain guni.

³Tu pesan ti diasuh Raja Hesekiah padahka sida ngagai Isaiah: “Sehari tu kitai merinsa. Kitai benung diukum lalu dipechat. Kitai tu baka indu ke radai deka beranak, tang kelalu lemi beranak.

⁴Raja besai menua Asiria udah ngirumka tuai pemesai iya ngasuh iya mechat Allah Taala ti idup. Awakka TUHAN Allah Taala nuan ninga jaku pechat nya, lalu ngukum sida ke mechat Iya. Nya alai, besampi ngagai Allah Taala ke bala kitai ti agi idup.”

⁵Lebuh Isaiah nerima pesan nya ari Raja Hesekiah,

⁶iya lalu ngirumka saut iya: “TUHAN enda ngasuh nuan nejuka orang Asiria ngemba nuan ngumbai TUHAN enda ulih ngelepaska nuan.

⁷TUHAN deka ngasuh raja menua Asiria nya ninga berita ngapa, ti deka ngujungka iya pulai ngagai menua iya empu, lalu TUHAN deka ngasuh orang munuh iya dia.”

⁸Lebuh pemesai orang Asiria nya ninga raja udah angkat ari Lakis, benung nyerang nengeri Libnah ti enda jauh ari Lakis, iya lalu mansang ngagai nengeri Libnah, deka betanya ngagai raja.

⁹Berita lalu bisi diterima bala orang Asiria ti madahka soldadu orang Ejip, diuluka Raja Tirhakah menua Etiopia, benung mansang nyerang sida. Lebuh raja menua Asiria ninga nya, iya lalu ngirumka siti surat ngagai Raja Hesekiah

¹⁰menua Judah, munyi tu: “Petara ti dikarapka nuan udah madahka nuan enda alah laban aku. Tang anang nejuka diri ditipu nya.

¹¹Nuan udah ninga pasal utai ti dikereja raja menua Asiria ngagai semua menua ti deka dirusak iya. Kati nuan ngumbai diri ulih nyeliahka nya?

¹²Aki ini aku udah ngerusak nengeri Gosan, Haran, enggau Resep, lalu munuh orang Beteden ti diau di Telasar, lalu nadai siku ari bala petara sida udah ulih ngelepaska sida.

¹³Dini alai raja nengeri Hamat, Arpat, Sepabaim, Hena enggau Iwah diatu?”

¹⁴Raja Hesekiah nyengkau surat nya ari bala seruan nya, lalu macha. Udah nya iya lalu mansang ngagai Rumah Sembiang, ngengkahka surat nya dia di mua TUHAN,

¹⁵lalu besampi

¹⁶ “TUHAN ti Pemadu Bekuasa, ti Allah Taala ke disembah orang Israel, ke duduk ari atas melikat cherub ti besayap, semina Nuan siku aja ti Allah Taala, ke merintah semua bansa di dunya tu. Nuan udah ngaga dunya enggau langit.

¹⁷Nya alai, TUHAN, dingaka kami lalu peda utai ti nyadi ba kami. Dingaka Senakerip mechat Nuan, Allah Taala ti idup.

¹⁸Semua kami nemu, TUHAN, mayuh raja menua Asiria udah ngerusak mayuh bengkah bansa datai ke semua menua sida nya nyau nadai agi orang nguan.

¹⁹Sida udah nunu bala petara bansa bukai nya - ti sigi ukai petara, tang semina engkeramba aja ti digaga ari kayu enggau ari batu, ulih jari mensia.

²⁰Nya alai, TUHAN Allah Taala kami, lepaska kami ari orang Asiria, ngambika semua bansa di dunya tu nemu Nuan siku aja ti Allah Taala.”

²¹Udah nya Isaiah ngirumka pesan ngagai Raja Hesekiah, madahka saut TUHAN ngagai sampi iya.

²²Ku TUHAN, “Nengeri Jerusalem ketawaka nuan, Senakerip, lalu ngeleseka nuan.

²³Dalam penemu nuan, sapa ti udah dipechat sereta dikeleseka nuan? Nuan udah enda bebasaka Aku, Allah Taala ke disembah orang Israel ti kudus.

²⁴Nuan udah ngasuh bala seruan nuan temegah bejaku ngagai Aku, madahka nuan udah ngalahka bukit ti pemadu tinggi di Lebanon ngena semua kerita perang nuan. Nuan udah temegah madahka diri udah nebang kayu sidar ti pemadu tinggi, enggau kayu saipris ti pemadu manah, lalu udah datai ba endur ti pemadu jauh dalam utan.

²⁵Nuan udah temegah madahka diri udah numbak telaga lalu ngirup ai di menua orang, lalu kaki bala soldadu nuan udah ngelunjak Sungai Nile datai ke sungai nya rangkai.

²⁶“Kati nuan nadai kala ninga Aku endang lama udah merambu semua utai tu? Diatu Aku udah bejalaika pelan nya. Aku udah meri ngagai nuan kuasa kena nuan ngeruntuhka nengeri ti bekuta lalu ngaga sida nyadi tugung batu.

²⁷Orang ke diau dia endang nadai daya agi. Sida takut sereta temati-kutu. Sida baka rumput ti ba padang, tauka baka rumput ti tumbuh ba perabung rumah, ti dipuputka ribut ti angat ari timur.

²⁸“Tang Aku nemu semua utai pasal nuan, utai ti dikereja nuan, enggau tunga pejalai nuan. Aku nemu pemalat nuan ringat ngagai Aku.

²⁹Aku udah nerima berita pasal pemalat nuan ringat, enggau pasal penyumbung nuan, nya alai diatu Aku deka ngaitka ginti ba idung nuan, enggau repik besi ba nyawa nuan, lalu mai nuan pulai nengah jalai ti ditengah nuan mansang.”

³⁰Udah nya Isaiah lalu bejaku enggau Raja Hesekiah, “Tu tanda utai ti deka nyadi. Taun tu, enggau taun baru tu ila, kita semina deka makai gandum ti tumbuh-diri, tang dalam taun ti nangkanka nya, kita ulih nanam gandum, lalu ngetau iya, enggau nanam anggur, lalu makai buah iya.

³¹Sida ke agi idup di menua Judah deka diau lantang senang baka utai ti ditanam, ti ngunjamka urat ke dalam tanah, lalu bebuah.

³²Orang agi bisi idup di Jerusalem enggau ba Bukit Sion, laban TUHAN ti Pemadu Bekuasa udah mutuska runding deka ngasuh utai nya nyadi.

³³“Tu utai ti udah disebut TUHAN pasal raja menua Asiria: ‘Iya enda ulih tama ngagai nengeri tu, tauka nimbakka laja ngelaban nengeri tu. Nadai siku soldadu ke mai terabai, deka datai semak nengeri tu. Lalu nadai kuta tanah deka digaga kena ngelulung nengeri tu.

³⁴Iya deka pulai nengah jalai ti ditengah iya mansang, tang iya enda ulih tama ngagai nengeri tu. Aku ti TUHAN, udah bejaku.

³⁵Aku deka nyaga nengeri tu, ketegal nama Aku, enggau ketegal semaya ti udah digaga Aku ngagai nembiak Aku David.’ ”

³⁶Siku melikat TUHAN mansang ngagai kem orang Asiria, lalu munuh 185,000 bala soldadu sida. Tumu pagi hari siti, semua sida nyau betegaring mati!

³⁷Udah nya Senakerip raja menua Asiria nyurutka diri, lalu pulai ngagai Nineweh.

³⁸Nyadi sekali, lebuh iya benung besembiang dalam rumah sembiang petara iya ke benama Nisrok, dua iku anak iya, Adramelek seduai Sareser, munuh iya ngena pedang seduai iya empu, lalu ngerarika diri ngagai menua Ararat. Siku ari anak lelaki iya ti bukai, ke benama Esar-hadon, lalu nganti iya nyadi raja.