Read Iban Isaiah 38 Bible Online

Isaiah 38 - Iban bible

Isaiah 38

¹Ba urung maya nya, Raja Hesekiah sakit lalu nyau deka mati. Nabi Isaiah anak Amos mansang ngabas iya, lalu madahka ngagai iya, “TUHAN bepesan ngasuh nuan ngemas semua pekara nuan, laban nuan enda ulih gerai. Nuan deka mati.”

²Hesekiah nguingka mua diri ngagai dinding lalu besampi:

³“TUHAN, ingatka aku ti udah tetap ati sereta taluk betuaika Nuan, lalu seruran nguji ngereja utai ti dikedekaka Nuan.” Iya lalu belabuh nyabak balat amat.

⁴Udah nya TUHAN ngasuh Isaiah

⁵pulai baru ngagai Hesekiah, lalu nyebut ngagai iya jaku TUHAN munyi tu, “Aku, TUHAN Allah Taala aki nuan David, udah ninga sampi nuan, lalu udah meda ai mata nuan. Aku deka ngelakka nuan idup lima belas taun da agi.

⁶Aku deka ngelepaska nuan, enggau nengeri Jerusalem ari jari raja orang Asiria, lalu Aku deka majak nyaga nengeri tu.”

⁷Ku Isaiah nyaut, “TUHAN deka meri ngagai nuan siti tanda ti nunjukka Iya deka ngamatka semaya Iya.

⁸Ba tangga ti digaga Raja Ahas, TUHAN deka ngasuh ayuk nikal sepuluh iti tangkal.” Ayuk nya lalu nikal sepuluh iti tangkal.[40]

⁹Lebuh Hesekiah udah gerai ari penyakit iya, iya lalu nuliska lagu puji tu:

¹⁰“Aku ngumbai diri deka mansang ngagai dunya pemati, lalu enda ulih idup agi, lebuh aku agi benung orang.

¹¹Ku aku bepikir, dalam dunya orang ke idup tu aku enda agi meda TUHAN tauka meda orang ke idup.

¹²Nyawa aku udah ditetak lalu abis, baka langkau kain ti direrak, baka kain ti ditetak ari tendai. Aku ngumbai Allah Taala deka ngabiska nyawa aku.[41]

¹³Aku nyabak semalam-malam laban pedis, Tulang aku asai ti dipatahka singa. Aku ngumbai Allah Taala ngabiska nyawa aku.[42]

¹⁴Nyawa aku nyau mit sereta rapas, lalu aku bedemuh munyi burung achang. Mata aku nyau lelak engkadah ke langit. TUHAN, lepaska aku ari semua penusah tu.

¹⁵Baka ni ku jalai aku bejaku agi? TUHAN Empu ti udah ngereja utai tu. Ati aku balat amat pedis, lalu aku enda ulih tinduk.[43]

¹⁶TUHAN, aku deka idupka Nuan, ke Nuan siku aja. Geraika aku, lalu awakka aku idup.[44]

¹⁷Ati aku ti balat pedis deka bebali nyadi pemaik. Nuan ngelepaska [45] aku ari semua utai ti tau nganu nyawa. Nuan ngampun semua dosa aku.

¹⁸ Nadai orang di dunya pemati ulih muji Nuan. Orang ke mati enda ulih manggaika diri ba penetap ati Nuan.

¹⁹Semina orang ke idup aja ulih muji Nuan, baka aku ke muji Nuan diatu. Apai indai madahka ngagai anak sida pasal penetap ati Nuan.

²⁰TUHAN, Nuan udah ngeraika aku. Kami deka nebah belikan, lalu belagu muji Nuan, Belagu muji Nuan dalam Rumah Sembiang seumur idup.[46]

²¹Nyadi Isaiah udah bejaku, “Awakka sida nutuk buah ara, lalu nampalka nya ba pisa nya, ngambika iya gerai.”

²²Hesekiah udah mega nyebut, “Nama tanda ti nunjukka aku enda tau enda mansang ngagai rumah TUHAN?”