Read Iban Isaiah 39 Bible Online

Isaiah 39 - Iban bible

Isaiah 39

¹Ba urung maya nya raja menua Babilon, Merodak Baladan, anak Beladan, bisi ninga berita pasal Raja Hesekiah ke sakit. Nya alai iya ngirumka sepuchuk surat enggau siti pemeri ngagai Hesekiah.

²Hesekiah ngelaluka penatai bala seruan nya, lalu mandangka pengaya iya ngagai sida - pirak enggau emas iya, rempah enggau minyak wangi, enggau semua pekekas ti dikena iya beperang. Nadai utai dalam bilik setor iya tauka di semua endur dalam menua ti diperintah iya ti enda dipandangka iya ngagai sida.

³Udah nya nabi Isaiah mansang ngagai Raja Hesekiah, lalu nanya, “Ari ni penatai bala seruan tu, lalu nama utai ti disebut sida ngagai nuan?” Ku Hesekiah nyaut, “Sida datai ari menua ti jauh, ari menua Babilon.”

⁴“Nama utai ti dipeda sida dalam istana?” “Sida meda semua utai. Nadai utai ti dalam bilik setor ti enda dipandangka aku ngagai sida.”

⁵Ku Isaiah bejaku enggau Hesekiah, “TUHAN ti Pemadu Bekuasa madah,

⁶maya deka datai alai semua utai dalam istana nuan, semua utai ti udah disimpan bala aki ini nuan nyentuk ngagai sehari tu, deka ditabanka ngagai menua Babilon. Nadai utai agi tinggal.

⁷ Sekeda orang ari peturun nuan empu deka ditabanka, lalu dipeliri, lalu deka diasuh bekereja dalam istana raja menua Babilon.”

⁸Raja Hesekiah lalu ngumbai jaku nya nunjukka pemaik enggau pengelikun deka meruan sepemanjai umur iya, nya alai iya nyaut, “Manah amat pesan TUHAN ti ditusui nuan ngagai aku.”