Read Iban Isaiah 40 Bible Online

Isaiah 40 - Iban bible

Isaiah 40

¹“Perindang bala nembiak Aku,” ku Allah Taala kitai bejaku. “Perindang sida!

²Peransang orang Jerusalem. Padahka ngagai sida, sida udah chukup lama natka diri merinsa, lalu penyalah sida diatu udah diampun.[47] Aku udah ngukum sida enggau chukup ketegal semua dosa sida.”

³ Ku munyi nyawa ngangau, “Sediaka jalai di menua puang ke TUHAN! Gaga jalai di menua puang ke Allah Taala kitai!

⁴Tambun semua lebak. Tumpurka semua munggu enggau bukit. Rataka semua menua ti belenggak-lenggung.

⁵Nya baru mulia TUHAN deka dipandangka, lalu semua mensia deka meda mulia nya, laban TUHAN udah bejaku.”

⁶ Ku munyi nyawa ngangau, “Padahka!” Aku lalu nanya, “Nama utai ti deka dipadahka aku deh?” “Padahka semua mensia baka rumput. Sida nadai lebih tan agi ari bungai babas.

⁷Rumput rangkai lalu bungai layu lebuh TUHAN ngasuh ribut muput ngagai sida. Mensia nadai lebih tan agi ari rumput.

⁸Sigi amat, rumput rangkai, lalu bungai layu, tang jaku Allah Taala kitai, tan belama iya.”

⁹Jerusalem, alai nuan niki ngagai sigi bukit ti tinggi lalu padahka berita manah! Sion, alai nuan ngangau enggau nyawa ti inggar. Padahka berita manah![48] Anang takut bejaku. Padahka ngagai semua nengeri di menua Judah pasal Allah Taala ti deka datai!

¹⁰ TUHAN Allah Taala deka datai lalu merintah ngena kuasa, mai upah ke bala nembiak Iya.

¹¹ Iya deka ngibun nembiak Iya baka pengibun bedus. Iya deka ngempuruka sida lalu ngerendut sida, lalu mai sida, lalu begadai-gadai nguluka indai sida.

¹²Kati orang ulih nyukat pemayuh ai dalam tasik ngena tapa jari sida? Tauka nyengkal pemesai rampa langit? Kati orang ulih nyimpan semua tanah di dunya tu dalam mangkuk tauka nimbang bukit enggau munggu ngena dachin?

¹³ Kati ulih orang madahka ngagai TUHAN utai ti patut dikereja Iya? Sapa ulih ngajar Iya tauka meri Iya jaku lalau?

¹⁴Ngagai sapa Allah Taala patut betanya enti Iya deka nemu lalu mereti sereta belajarka utai ti patut dikereja Iya?

¹⁵ Ba TUHAN, semua bansa baka setitik ai ti dalam beledi, baka igi amau ti ditimbang ngena dachin; lalu pulau ngelempung igi amau ti alus.

¹⁶Semua jelu ti dalam utan di Lebanon enda chukup kena ngaga piring tunu, lalu kayu dalam utan nya kelalu mimit kena nungkunka api.

¹⁷Semua bansa endang nadai reti ba TUHAN.

¹⁸ Ngagai sapa kita mandingka Allah Taala? Tauka, baka ni ku kita madahka gaya gamal Iya?

¹⁹Iya ukai baka engkeramba ti digaga bala tukang, ti disampak sida enggau emas lalu didudukka ba atas penuduk ti digaga ari pirak.

²⁰ Orang ke enda tebelika pirak tauka emas,[49] milih kayu ti enda nemu buruk. Iya ngiga tukang ke landik ngaga anak patung ti enda nemu engkebut.

²¹Kati kita enda nemu? Kati orang nadai udah madahka ngagai kita dulu kelia? Kati kita nadai kala ninga pasal penumbuh dunya?

²²Iya duduk atas kumbang dunya,[50] lalu orang ke diau di dunya nyau baka buntak; Iya mintarka langit baka kain tirai, lalu nganchau langit baka langkau kain ti alai diau;

²³Iya ngalahka bala raja, lalu muai kuasa sida.

²⁴Sida baka utai ti tumbuh, ti baru udah ditanam, lalu apin tentu bisi urat. Lebuh TUHAN nyepu sida, sida layu, lalu ribut biaubalai ngebuka sida baka rumput ti rangkai.

²⁵Ku TUHAN ti kudus bejaku: ngagai sapa kita deka mandingka Aku? Sapa sebaka enggau Aku?

²⁶ Engkadah ke langit, lalu peda! Sapa ngaga bintang ti dipeda nuan nya? Iya ke mai sida pansut baka bala soldadu, Iya nemu pemayuh sida lalu Iya ngangauka nama sida siku-siku, lalu laban kuasa Iya amat besai, nadai sigi ari sida nya lenyau!

²⁷Nya alai, nama kebuah kita mutap, Israel ngumbai TUHAN enda nemu penusah kita tauka enda ibuhka kita ke merinsa natka atur ti enda lurus?

²⁸Kati kita enda nemu? Kati kita nadai kala ninga? TUHAN nya meh Allah Taala ti meruan belama iya, ke ngaga semua dunya, ti enda nemu lembut tulang[51] tauka lelak. Nadai orang ulih meretika runding Iya.

²⁹Iya meri pengering[52] ngagai orang ke lemi lalu ngeringka sida ke nadai daya agi.

³⁰Indah sida ke biak deh nemu lemi, lalu orang ke biak nemu lelak lalu rebah.

³¹Tang orang ke ngarapka penyaup ari TUHAN, deka dikeringka baru. Sida deka ngindang tinggi baka menaul. Sida deka belanda lalu enda nemu lelak. Sida deka bejalai lalu enda nemu lembut tulang.