Read Iban Isaiah 41 Bible Online

Isaiah 41 - Iban bible

Isaiah 41

¹Ku Allah Taala bejaku, “Anang ragak, lalu pendingka Aku, kita menua ti ba tebing tasik! Awakka kita sedia mantaika pekara kita dalam kot. Kita deka diberi peluang bejaku. Aram kitai begempuru lalu ngatur sapa ke ngena.

²“Sapa orang nya ti udah mai siku pemenang ari timur [53] lalu ngasuh iya menang di sebarang endur iya bejalai? Sapa ngasuh iya ngalahka bala raja enggau mayuh bengkah bansa? Pedang iya mantap sida baka ke mantap amau. Laja iya mambarka sida baka rumput ti rangkai ti dikebuka ribut.

³Iya begagaika sida, lalu majakka pejalai diri enggau likun, bejalai laju datai ke kaki iya nyau deka enda terengkah ba tanah!

⁴Sapa ke ngasuh utai tu nyadi? Sapa ke ngatur utai nyadi dulu kelia? Aku ti TUHAN endang bisi dia kenyau ari pun, lalu Aku ti TUHAN, deka meruan dia ba pengujung dunya ila.

⁵“Orang ke diau di menua ti ba tebing tasik udah meda utai ti udah dikereja Aku. Sida getar-getar takut. Nya alai semua sida begempuru lalu datai.

⁶Orang ke landik bekereja, nulung sereta meransang pangan diri.

⁷Ku tukang kayu bejaku muji tukang emas, ‘Manah amat pengawa nuan!’ Orang ke nempa emas ngena tukul meransang iya ke bejantilka emas ti ditempa nyadi engkeramba. Ku sida, ‘Manah amat jantil tu. Sida lalu mantangka engkeramba nya ngena paku lawang ba endur alai sida ke patut ngengkahka iya.

⁸ “Tang kita orang Israel ti nembiak Aku, udah dipilih Aku. Kita tu peturun Abraham, ti pangan Aku.

⁹Aku udah mai kita ari tisi dunya. Aku udah ngangauka kita ari tisi ti pemadu jauh lalu ku Aku bejaku enggau kita, ‘Kita tu nembiak Aku.’ Aku enda nulak kita, tang udah milih kita.

¹⁰Anang takut, Aku bisi enggau kita! Aku tu Allah Taala kita. Anang nejuka utai ngenakutka kita! Aku deka ngasuh kita kering lalu nulung kita. Aku deka nyaga kita lalu ngelepaska kita.

¹¹“Orang ke ringat ngagai kita deka malu alah. Orang ke ngelaban kita deka mati,

¹²lalu deka lesap ari dunya tu.

¹³Aku tu TUHAN Allah Taala kita. Aku ngasuh kita kering lalu madahka ngagai kita, ‘Anang takut. Aku deka nulung kita.’ ”

¹⁴Ku TUHAN bejaku, “Israel, taja pen kita bansa ti mit sereta lemi, tang kita enda tau takut. Aku deka nulung kita. Aku, Allah Taala ke disembah orang Israel ti kudus, deka nebus kita.

¹⁵Aku deka ngaga kita baka papan alai ngindik gandum, bisi gigi ti agi baru sereta tajam. Kita deka ngindik bukit lalu ngerusak sida. Munggu deka pechah nyadi amau.

¹⁶Kita deka ngebuka sida ngagai angin. Ribut deka nabanka sida, lalu sida deka ngachir laban kabut. Nya baru kita deka lantang, laban Aku tu Allah Taala kita. Kita deka muji Aku, Allah Taala ke disembah orang Israel ti kudus.

¹⁷“Lebuh bala nembiak Aku beguna lalu begigaka ai, lebuh batang rekung sida nyau rangkai laban aus, nya baru Aku, ti TUHAN, deka nyaut sampi sida. Aku, ti Allah Taala ke disembah orang Israel, enda sekali-kali ninggalka sida.

¹⁸Aku deka ngasuh ai sungai rarat ba bukit ti nadai tumbuh kayu lalu mata ai rarat ba lebak. Aku deka ngubah menua puang nyadi letung lalu tanah ti rangkai nyadi mata ai.

¹⁹Aku deka ngasuh kayu sidar, kayu akasia, kayu matil enggau kayu kana tumbuh di menua puang. Utan pain, Juniper enggau saipris deka tumbuh di menua puang.

²⁰Orang deka meda nya, lalu sida deka nemu Aku ti TUHAN, udah ngereja utai nya. Sida deka nemu Allah Taala ke disembah orang Israel ti kudus udah ngasuh utai nya nyadi.”

²¹TUHAN ti Raja orang Israel, nyebut tu: “Kita ti petara mayuh bengkah bansa, bantaika pekara kita. Pansutka penemu ti pemadu dalam ari runding kita!

²²Datai kitu lalu padahka utai ti deka nyadi, ngambika kami ngelala utai nya lebuh iya nyadi. Terangka dalam kot utai ti udah nyadi dulu menya, lalu padahka ngagai kami, reti utai nya.

²³Padahka ngagai kami nama utai ti deka nyadi jemah ila, nya baru kami deka nemu kita tu endang petara! Kereja utai ti manah, tauka asuh penusah ti besai nyadi. Iri kami enggau ati ti takut sereta nangi!

²⁴Kita, enggau semua utai ti dikereja kita, sigi nadai reti magang. Orang ke nyembah kita endang jai!

²⁵“Aku udah milih siku lelaki ti diau di timur.[54] Aku deka mai iya nyerang ari utara. Iya ngindik bala pemerintah baka ke ngelunjak tanah luchak, baka tukang periuk ti ngelunjak tanah liat.

²⁶Ni bagi kita ke udah madahka pasal utai tu deka nyadi, ngambika kami ulih ngumbai kita ngena? Nadai siku kita nyebut seleka jaku pasal utai nya. Nadai orang ninga kita bejaku!

²⁷Aku ti TUHAN nya ti terubah madahka berita tu ngagai Sion. Aku ngasuh siku seruan mansang lalu nyebut ngagai Jerusalem, ‘Bala kita deka datai, pulai ngagai menua diri empu!’ [55]

²⁸Lebuh Aku merening ngagai bala petara, nadai siku sida bejaku. Nadai siku sida ulih nyaut tanya ti dibantaika Aku.

²⁹Semua petara nya endang nadai guna magang. Sida endang enda ulih ngereja utai. Bala petara tu lemi sereta nadai kuasa.”