Read Iban Isaiah 42 Bible Online

Isaiah 42 - Iban bible

Isaiah 42

¹ Ku TUHAN bejaku, “Tu nembiak Aku, ke diberi Aku pengering, ti udah dipilih Aku, sereta dikerinduka Aku. Aku udah ngisi iya enggau Roh Aku, lalu iya deka mai atur ti lurus ngagai genap bengkah bansa.

²Iya enda manjung tauka merakka nyawa iya tauka bejaku enggau nyawa ti inggar ba sebelah jalai raya.

³Iya enggai matahka buluh ti melepi tauka madamka lampu ti kelap-kelap. Iya tetap deka mai atur ti lurus ngagai semua mensia.

⁴Iya deka mengkang andal ati sereta enda lemi semengat. Iya deka numbuhka atur ti lurus di dunya tu. Menua ti ba tebing tasik deka gagit ati nganti ajar ari iya.”

⁵ TUHAN Allah Taala ngaga lalu mintarka langit. Iya nempa dunya, enggau semua utai ti idup dia. Iya meri pengidup enggau seput ngagai semua mensia di dunya tu. Lalu diatu TUHAN Allah Taala bejaku ngagai nembiak Iya,

⁶ “Aku ti TUHAN udah ngangauka nuan lalu meri nuan kuasa nentuka atur ti lurus dipejalaika di dunya. Ulih nuan, Aku deka ngaga siti sempekat enggau semua mensia. Ulih nuan, Aku deka mai penampak ngagai semua bansa.

⁷Nuan deka menchelakka mata orang ke buta lalu ngelepaska orang ari rumah jil.

⁸“Semina Aku aja ti TUHAN Allah Taala nuan. Nadai petara bukai tau enggau bempu mulia Aku. Aku enggai nejuka engkeramba bempu puji ti patut diberi ngagai Aku.

⁹Utai ti udah dipadahka Aku suba, diatu udah dikamatka. Diatu Aku deka madahka utai ti baru ngagai kita sebedau utai nya nyadi.”

¹⁰Nyanyi lagu ti baru ke TUHAN. Belagu muji Iya, semua dunya! Puji meh Iya, kita ke belayar di tasik. Puji meh Iya, semua utai ti idup di tasik! Belagu meh kita menua ti ba tebing tasik, enggau semua orang ke diau dia!

¹¹Awakka menua puang enggau nengeri ti dalam menua puang, muji Allah Taala. Awakka orang di Kedar muji Iya! Awakka sida ke diau di nengeri Sela manjung enggau ati ti gaga ari tuchung bukit!

¹²Awakka orang ke diau di menua ti ba tebing tasik meri puji enggau mulia ngagai TUHAN!

¹³TUHAN mansang beperang baka soldadu. Iya udah sedia, lalu gagit ati deka beperang. Iya manjung panjung perang. Iya ngayanka kuasa Iya ngelaban munsuh Iya.

¹⁴Ku Allah Taala bejaku, “Aku lama udah enda bemunyi. Aku nadai nyaut bala nembiak Aku. Tang diatu maya udah datai alai Aku deka ngereja utai. Aku rauh-rauh munyi indu ke radai deka beranak.

¹⁵Aku deka ngerusak munggu enggau bukit lalu ngerangkaika rumput enggau kayu. Aku deka ngubah lebak sungai nyadi menua puang[56] lalu ngerangkaika letung.

¹⁶“Aku deka nguluka bala nembiak Aku ke buta bejalai nengah jalai raya ti nadai kala ditengah sida. Aku deka ngubah pemetang sida nyadi penampak lalu ngerataka menua ti belenggak-lenggung di mua sida. Tu meh semaya Aku, lalu Aku deka ngamatka semua semaya nya.

¹⁷Semua orang ke arapka engkeramba, ke ngumbai anak patung petara sida, deka dikemaruhka sereta dipechat.”

¹⁸Ku TUHAN bejaku, “Anang enda mending, kita orang ke bengal! Peda enggau manah, kita ke buta!

¹⁹Kati orang bisi lebih agi buta ari nembiak Aku, bengal agi ari seruan ti udah dikirumka Aku?

²⁰Israel, kita udah meda mayuh macham utai, tang nama reti utai nya ba kita? Kita bisi pending kena ninga, tang nama utai ti udah didinga kita?”

²¹TUHAN gaga ati deka ngemesaika adat Iya lalu ngemuliaka adat nya ketegal pengelurus Iya.

²²Tang diatu bala nembiak Iya udah kena rumpak. Sida iya ditutup dalam bilik ti nadai jenila lalu dilalaika dalam rumah jil. Reta tengkira sida udah dichuri sereta dirumpak, lalu nadai orang datai ngelepaska sida.

²³Kati kita deka mendingka tu? Belabuh ari diatu, kati kita amat deka mending enggau bendar?

²⁴Sapa ti udah nyerahka orang Israel ngagai bala perumpak? TUHAN Empu! Laban kitai udah bedosa ngelaban Iya! Kitai enggai idup nitihka jalai Iya tauka ngasika ajar ti diberi Iya ngagai kitai.

²⁵Nya alai Iya ngasuh kitai ngasaika pengeringat Iya lalu natka pemerinsa laban perang. Pengeringat Iya baka api ti nunu semua menua Israel, tang kitai nadai nemu utai ti nyadi. Kitai nadai belajar ari utai nya.