Read Iban Isaiah 43 Bible Online

Isaiah 43 - Iban bible

Isaiah 43

¹Israel, TUHAN udah nempa kita, lalu ku Iya bejaku, “Anang takut. Aku deka ngelepaska kita. Aku udah ngangauka nama kita siku-siku laban kita endang enggi Aku.

²Lebuh kita bejalai nengah ai ti dalam, Aku deka meruan enggau kita. Penusah ti nuntung kita enda ulih ngalahka kita. Lebuh kita bejalai ngerenchah api, kita enda betu. Penguji ti besai ti deka datai, enda ulih ngemediska kita,

³laban Aku tu TUHAN Allah Taala kita, Allah Taala ke disembah orang Israel ti kudus, ke ngelepaska kita. Aku deka meri Ejip, Etiopia enggau Seba kena Aku nebus kita.

⁴Aku deka ngelengkaka mayuh bansa bukai laban Aku deka ngelepaska kita, laban Aku sayauka kita enggau laban Aku rinduka kita lalu meri kita basa.

⁵Anang takut. Aku bisi enggau kita! “Ari timur, enggau ari barat ti pemadu jauh Aku deka mai bala nembiak nuan pulai ngagai menua sida empu.

⁶Aku deka ngasuh utara ngelakka sida mupuk lalu nagang selatan ngetanka sida. Awakka bala nembiak Aku pulai ari menua ti jauh, ari semua endur di serata dunya.

⁷Sida endang nembiak Aku, lalu Aku udah ngaga nempa sida kena ngemuliaka Aku.”

⁸Ku Allah Taala bejaku, “Saman bala nembiak Aku ngagai kot. Sida bisi mata, tang sida buta. Sida bisi pending, tang sida bengal!

⁹Saman semua bansa datai ngagai pechara nya. Ni bagi petara sida ke ulih madahka utai ti deka nyadi jemah ila? Ni bagi petara nya ti udah madahka utai ti benung nyadi diatu? Awakka bala petara nya mai saksi sida kena sida mandangka diri ngereja utai ti ngena, kena sida besaksika pemendar jaku sida.

¹⁰“Orang Israel, kita tu meh saksi Aku. Aku milih kita nyadika nembiak Aku, ngambika kita ngelala Aku, lalu arapka Aku sereta nemu Aku endang Allah Taala ti siku aja. Kita nadai petara bukai tang semina Aku aja, nemuka menya tauka jemah ila.

¹¹“Semina Aku siku aja ti TUHAN ke ulih ngelepaska kita.

¹²Aku udah madahka utai ti deka nyadi, lalu udah nya Aku datai nulung kita. Nadai petara orang bansa bukai bisi udah kala ngereja utai baka nya. Kita nyadika saksi Aku.

¹³Aku endang Allah Taala belama iya. Nadai orang ulih ngerarika diri ari kuasa Aku. Nadai orang ulih ngubah utai ti dikereja Aku.”

¹⁴Ku Allah Taala ke disembah orang Israel ti kudus, TUHAN ti nebus kita bejaku, “Kena Aku ngelepaska kita, Aku deka ngasuh bala soldadu nyerang Babilon. Aku deka ngeruntuhka pintu nengeri, lalu panjung orang di nengeri nya deka bebali nyadi sabak.

¹⁵Aku tu TUHAN Allah Taala kita ke kudus. Aku udah ngaga kita, Israel, lalu Aku tu Raja kita.”

¹⁶Dulu kelia TUHAN ngaga jalai raya nengah tasik, jalai nengah ai ti bebuli.

¹⁷Iya ngerusak bala soldadu ti kering, bala soldadu ke nepan kerita perang enggau kuda. Sida rebah, lalu enda angkat agi, dipadamka baka api kelita!

¹⁸Tang ku TUHAN bejaku, “Anang ingatka utai ti udah nyadi menya tauka berundingka utai ti udah nyadi dulu kelia.

¹⁹Peratika utai ti baru, ti deka dikereja Aku. Utai nya benung nyadi, lalu kita ulih meda utai nya diatu! Aku deka ngaga jalai raya nengah menua puang lalu meri kita ai sungai di menua puang nya.

²⁰Indah jelu babas deh deka ngemesaika Aku. Jelu pasun enggau burung unta deka muji Aku lebuh Aku deka ngasuh sungai rarat di menua puang kena meri ai ngagai bala nembiak ke dipilih Aku.

²¹Sida nya orang ke ditempa Aku ke Aku Empu, lalu sida deka belagu muji Aku!”

²²Ku TUHAN bejaku, “Tang kita nyau leju begulai enggau Aku, Israel. Kita enda nyembah Aku.

²³Kita nadai mai bedus nyadika piring tunu ngagai Aku. Kita enda ngemesaika Aku ngena piring kita. Aku nadai nating kita bepintaka piring tauka bepintaka menyan lalu ngasuh kita leju.

²⁴Kita nadai meli menyan ke Aku tauka ngemuaska ati Aku ngena lemak jelu kita. Tang kita nating Aku ngena dosa kita. Kita ngasuh Aku leju meda penyalah kita.

²⁵Tang taja pia, Aku tu Allah Taala ti ngampun dosa kita, lalu Aku ngereja nya laban nya endang gaya Aku. Aku enggai nyalah kita ketegal dosa kita.

²⁶“Aram kitai mansang ngagai kot. Bai dawa kita! Bantaika pekara kita kena kita nunjukka diri endang ngereja utai ti ngena!

²⁷Aki ini kita dulu kelia[57] nya orang ke terubah bedosa ngelaban Aku. Bala tuai kita udah bedosa ngelaban Aku,

²⁸lalu bala pemerintah kita udah ngamahka[58] endur Aku ti kudus. Nya alai Aku ngerusak Israel. Aku nejuka bala nembiak Aku dipechat.”