Read Iban Isaiah 45 Bible Online

Isaiah 45 - Iban bible

Isaiah 45

¹TUHAN udah milih Sairus nyadi raja. Iya udah ngasuh Sairus ngalahka mayuh bengkah bansa. Iya ngasuh Sairus muai kuasa ari bala raja. TUHAN deka muka pintu mayuh bengkah nengeri ke iya. Ku TUHAN bejaku ngagai Sairus,

²“Aku Empu deka nyendiaka jalai ke nuan, ngerataka bukit enggau munggu. Aku deka ngeruntuhka semua pintu temaga lalu matahka alang besi sida.

³Aku deka meri ngagai nuan reta tengkira ari endur ti petang sereta resia. Nya baru nuan deka nemu Aku endang TUHAN lalu nemu Allah Taala ke disembah orang Israel udah ngangauka nama nuan.

⁴Aku ngeletak nuan nulung nembiak Aku Israel, bansa ti udah dipilih Aku. Aku udah meri ngagai nuan basa ti besai, taja pen nuan enda nemu Aku.

⁵“Aku tu TUHAN. Kita nadai TUHAN bukai. Aku deka meri nuan pengering ti dipeguna nuan, taja pen nuan enda nemu Aku.

⁶Aku ngereja nya ngambika semua orang ari timur nyentuk ke barat nemu Aku endang TUHAN lalu kita nadai petara bukai.

⁷Aku tu ke ngaga penampak enggau pemetang. Aku tu ke mai berekat enggau pengerusak. Aku ti TUHAN tu ti ngereja semua utai nya.

⁸Aku deka ngasuh pemenang nurun ari langit baka ujan. Tanah deka merangap lalu nyambut iya lalu iya deka ngasuh pengelepas enggau pengelurus tumbuh baka bungai. Aku ti TUHAN, deka ngasuh utai nya nyadi.”

⁹ Kati periuk tanah berani bekelikuh ngelaban orang ke ngaga iya, periuk tanah ti sebaka enggau periuk tanah ti bukai? Kati tanah liat nanya tukang periuk munyi tu, “Nama utai ti digaga nuan?” Kati periuk tanah mutap madahka orang ke ngaga iya nya nadai pengelandik?

¹⁰Kati kitai berani bejaku munyi tu ngagai apai indai kitai, “Nama kebuah seduai ngasuh aku ada baka tu?”

¹¹Ku TUHAN Allah Taala ke disembah orang Israel ti kudus, bejaku: “Nuan enda tau betanyaka pasal bala anak Aku ngagai Aku tauka madahka utai ti patut dikereja Aku!

¹²Aku tu ke ngaga dunya lalu ngaga mensia sereta ngasuh sida diau dia. Ngena kuasa Aku, Aku mintarka langit. Aku merintah mata hari, bulan enggau bintang.

¹³Aku Empu ke nyungkak Sairus ngereja utai kena ngamatka juluk ati Aku, lalu ngaga utai nyadi lurus. Aku deka beruruska semua jalai raya ti ditengah iya. Iya deka nirika nengeri Jerusalem baru, lalu ngelepaska bala nembiak Aku ti udah kena tangkap. Nadai orang udah ngupah tauka nyuap iya ngereja utai nya.” TUHAN ti Pemadu Bekuasa udah bejaku.

¹⁴Ku TUHAN bejaku ngagai orang Israel, “Pengaya menua Ejip enggau Etiopia deka diempu kita, lalu bala lelaki orang Seba ti tinggi gamal deka nyadi ulun kita. Sida deka ditanchang ngena rantai lalu nitihka kita. Sida deka meremi di mua kita, lalu bejaku, ‘Allah Taala bisi enggau kita. Semina Iya siku aja ti Allah Taala.

¹⁵Allah Taala ke disembah orang Israel ke ngelepaska bala nembiak Iya, endang Allah Taala ti ngelalaika Diri.

¹⁶Semua orang ke begagaka engkeramba deka malu. Semua sida deka dipechat magang.

¹⁷Tang Israel diselamatka TUHAN, ngena pengelepas ti tan belama iya, lalu sida enda dipechat.’ ”

¹⁸TUHAN udah ngaga langit. Iya nya meh Allah Taala! Iya nempa lalu ngaga dunya. Iya ngaga dunya tegap sereta tan. Iya nadai ngaga dunya nyadi endur ti sunyi nadai mensia, tang nyadi endur alai mensia diau. Nya meh Allah Taala ti nyebut, “Aku tu TUHAN, lalu kita nadai petara bukai.

¹⁹Aku enda bejaku enggau chara belalai tauka ngelalaika juluk ati Aku. Aku nadai ngasuh orang Israel lebu ngapa begigaka Aku. Aku tu TUHAN, lalu Aku nyebut utai ti bendar. Aku madahka utai ti ngena.”

²⁰Ku TUHAN bejaku, “Begempuru meh kita, mensia ari semua bansa, semua kita ke agi idup lebuh perintah nya alah. Awakka kita datai bechara! Orang ke bejalai bebala mayuh mai engkeramba ti digaga ari kayu, lalu besampi ngagai petara ti enda ulih nyelamatka sida, sida nya orang ke nadai nemu utai!

²¹Datai, lalu bantaika pekara kita dalam kot. Awakka orang ke kena dawa betanya ngagai pangan diri. Sapa orang dulu kelia ke madahka utai ti deka nyadi? Kati orang nya ukai Aku ti TUHAN Allah Taala ti ngelepaska bala nembiak Iya? Kita nadai petara bukai kelimpah ari Aku, Allah Taala ke lurus, ti nyadi Juruselamat.

²²“Pulai ngagai Aku diatu ngambika kita diselamatka, semua kita mensia ti di serata dunya! Semina Aku siku aja ti Allah Taala.

²³ Semaya Aku endang amat, lalu semaya nya enda diubah. Aku besumpah atas nama Aku Empu: Semua orang deka datai lalu besugang di mua Aku lalu besumpah madahka diri deka taluk ngagai Aku.

²⁴“Sida deka bejaku madahka pemenang enggau pengering semina datai ari Aku siku aja. Tang semua orang ke begedika Aku, deka dipechat.

²⁵Aku ti TUHAN deka ngelepaska semua peturun Jakop, lalu sida deka muji Aku.