Read Iban Isaiah 46 Bible Online

Isaiah 46 - Iban bible

Isaiah 46

¹“Nya meh pengujung bala petara menua Babilon! Dulu suba Bel enggau Nebo disembah, tang diatu seduai iya diundan ngena keledai, nating belakang jelu ti lelak.

²Sida engkeramba nya enda ulih nyelamatka diri empu. Sida ditangkap lalu ditabanka ngagai endur bukai. Nya meh pengujung petara menua Babilon!

³“Pendingka Aku, kita ke peturun Jakop, semua kita nembiak Aku ti agi tinggal. Aku udah ngibun kita kenyau ari kita ada.

⁴Aku tu Allah Taala kita, lalu Aku deka ngibun kita datai ke kita nyau tuai, lalu buk kita buban. Aku udah nempa kita, lalu Aku deka ngibun kita. Aku deka nyaup kita lalu ngelepaska kita.

⁵“Ngagai sapa kita deka mandingka Aku?” ku TUHAN bejaku. “Kati orang bisi sebaka enggau Aku?

⁶Orang muka kandi duit sida lalu nuang emas. Sida nimbang pirak ngena dachin. Sida ngaji tukang emas ngaga siku petara. Udah nya sida meremi lalu nyembah petara nya.

⁷Sida ngangkatka iya ngagai bau sida, lalu ngesan iya. Sida ngengkahka iya ba siti endur, lalu iya bediri dia, enda ulih nginsit ari endur nya. Enti orang besampi ngagai iya, iya enda nemu nyaut lalu enda ulih ngelepaska sida ari penusah.

⁸“Kingatka tu, kita orang ke bedosa. Perundingka utai ti udah dikereja Aku.

⁹Kingatka utai ti udah nyadi dulu kelia. Kita enda tau enda ngaku Aku siku aja nyadika Allah Taala kita lalu nadai orang sebaka enggau Aku.

¹⁰Kenyau ari pun kelia, Aku udah madahka utai ti deka nyadi. Dulu kelia Aku udah madahka utai ti deka nyadi. Aku madahka pelan Aku endang enda nemu lebu, lalu madahka Diri deka ngereja semua utai ti deka dikereja Aku.

¹¹Aku ngangauka siku lelaki datai ari timur.[60] Iya deka nyambar baka menaul lalu ngereja utai ti udah diperambu Aku. Aku udah bejaku, lalu utai nya deka dikereja.

¹²“Pendingka Aku, kita ke kieh, ke ngumbai pengelepas agi jauh.

¹³Aku deka mai hari pemenang datai semak, laban iya endang enda jauh. Pengelepas Aku enda betangguh. Aku deka nyelamatka Sion, lalu mai basa ngagai Israel dia.”