Read Iban Isaiah 47 Bible Online

Isaiah 47 - Iban bible

Isaiah 47

¹ Ku TUHAN bejaku, “Babilon, nurun nuan ari kerusi diraja nuan, lalu duduk malai abus. Dulu menya nuan udah baka indu dara bungas, nengeri ti enda kala alah, tang nuan enda agi lembut sereta bajik gamal! Nuan diatu udah nyadi ulun!

²Pusinka batu kisar! Kisar meh tepung! Buka tambai mua nuan! Buka pekayan nuan ti manah! Siatka kain nuan lebuh nuan meraka sungai![61]

³Orang deka meda nuan telanjai. Sida deka meda nuan dikemaruhka sereta dipechat. Aku deka malas nuan, lalu nadai orang deka nagang Aku.”

⁴Allah Taala ke disembah orang Israel ti kudus nebus kitai. Nama Iya TUHAN ti Pemadu Bekuasa.

⁵Ku TUHAN bejaku ngagai Babilon, “Awakka nuan duduk enda bemunyi dalam petang. Nadai sida agi deka ngumbai nuan kuin ke semua bansa!

⁶Aku udah ringat ngagai bala nembiak Aku. Aku udah ngaga sida baka ke ukai nembiak Aku agi. Aku udah nyerahka sida ngagai jari nuan, lalu nuan nadai nemu kasihka sida. Indah sida ke tuai deh diperinsaka nuan.

⁷Nuan ngumbai diri deka seruran nyadi kuin, lalu nuan enda irauka utai ti digaga diri tauka berundingka pengujung utai nya.

⁸ “Pendingka tu, nuan ke rindu ngelantangka diri, ke ngumbai diri likun sereta nadai utai ngawa. Nuan ngumbai diri besai baka Allah Taala, lalu ngumbai orang nadai baka nuan. Nuan ngumbai diri enda tau nyadi indu ke balu tauka mati anak.

⁹Tang dalam sekejap aja, dalam sehari aja, utai dua bengkah nya deka nyadi. Taja pen nuan ngena mayuh macham keramat, tang nuan deka lenyau laki, lenyau anak.

¹⁰“Nuan berasai likun ngereja penyai. Nuan ngumbai orang enda ulih meda nuan. Penemu-dalam enggau penemu nuan udah mai nuan tesat, lalu ku nuan bejaku dalam ati diri, ‘Aku tu Allah Taala. Nadai orang sebaka enggau aku.’

¹¹Penusah ti besai deka ninggang nuan, lalu nadai siti pengawa keramat nuan ulih nagang nya. Pengerusak deka ninggang nuan enggau ngenyit, pengerusak ti nadai kala dipikir nuan!

¹²Simpan aja meh puchau enggau pengaruh nuan. Nuan udah ngena sida kenyau ari nuan agi biak. Nyangka ukur sida ulih nulung nuan. Nyangka ukur nuan ulih ngenakutka bala munsuh nuan.

¹³Nuan nadai daya, taja pen nuan diberi jaku lalau. Awakka bala orang ke bepenemu pasal bintang datai lalu nyelamatka nuan, bala orang ke belajarka pasal bintang, ke begagaka kar langit lalu madahka ngagai nuan genap bulan, utai ti deka nyadi ba nuan.

¹⁴“Sida nya baka rumput ti rangkai lalu api deka nganguska sida! Indah sida empu deh enda ulih nyelamatka diri. Api nya kelalu angat ke sida, laban api nya ukai api ti nyamai kena bekindu.

¹⁵Semina nya aja meh guna nuan enggau sida, sida ke bepenemu pasal bintang, ti udah alai nuan betanya seumur idup. Semua sida nya deka ninggalka nuan lalu mupuk, lalu nadai siku sida agi tinggal nyelamatka nuan.”