Read Iban Isaiah 48 Bible Online

Isaiah 48 - Iban bible

Isaiah 48

¹Pendingka tu, kita orang Israel, kita ke ari peturun Judah: Kita besumpah dalam nama TUHAN lalu ngumbai diri nyembah Allah Taala ke disembah orang Israel, tang kita semina bejaku ngapa.

²Kita temegah madahka diri peranak nengeri ti kudus lalu madahka diri bekering ba Allah Taala ke disembah orang Israel, ke benama TUHAN ti Pemadu Bekuasa.

³Ku TUHAN bejaku ngagai orang Israel, “Dulu kelia Aku endang udah madahka gaya utai ti deka nyadi, udah nya Aku lalu ngasuh utai nya nyadi enggau ngenyit.

⁴Aku nemu kita endang amat kieh, kering baka besi, enggai nurut baka temaga.

⁵Nya alai dulu kelia Aku udah madahka gaya pengidup kita jemah ila, madahka gaya utai ti deka nyadi, sebedau sida nyadi, ngambika kita enda ngumbai utai nya digaga engkeramba enggau anak patung kita.

⁶“Semua utai ti dipadahka Aku, udah nyadi magang diatu. Kita patut ngaku semua utai ti udah dipadahka Aku nya endang amat magang. Diatu Aku deka madahka ngagai kita utai ti baru, ti deka datai, utai ti deka nyadi, ti nadai kala dipandangka Aku dulu menya.

⁷Semina diatu aja Aku ngasuh utai nya nyadi. Nadai utai ti baka nya udah kala nyadi dulu kelia. Enti sema iya udah nyadi, kita tentu ngumbai diri nemu semua utai pasal iya.

⁸Aku nemu kita endang enda tau dikarapka, lalu kita endang ditemu selalu angkat ngelaban. Nya kebuah kita nadai kala ninga pasal utai nya. Nya kebuah berita pasal utai nya nadai kala didinga kita.

⁹“Ngambika orang mayuh deka muji nama Aku, Aku nagang Diri ringat. Aku nagang Diri ringat lalu enda ngerusak kita.

¹⁰Aku udah nguji kita ngena api pemerinsa, baka pirak ti dituchi dalam serumbung api. Tang Aku nemu kita endang nadai guna.

¹¹Utai ti dikereja Aku endang dikereja Aku ke Aku Empu. Aku enggai nejuka nama Aku dikeleseka tauka bekunsika mulia Aku enggau orang laban mulia nya endang enggi Aku siku aja.”

¹² Ku TUHAN bejaku, “Pendingka Aku, Israel. Aku udah ngangauka kita. Aku tu Allah Taala ti terubah, ti penudi, ti Allah Taala siku aja!

¹³Jari Aku udah ngaga pugu dunya lalu mintarka langit. Lebuh Aku ngangauka dunya enggau langit, seduai iya datai tekala nya, lalu bediri di mua Aku.

¹⁴“Begempuru lalu pendingka Aku, semua kita! Nadai siku ari bala petara nya ulih madahka orang ke udah dipilih Aku deka nyerang Babilon. Iya deka ngereja utai ti diasuh Aku.

¹⁵Aku tu ke bejaku lalu ngangauka iya. Aku nguluka iya lalu ngasuh iya mujur.

¹⁶“Datai semak ngagai Aku diatu, lalu dingaka utai ti disebut Aku. Kenyau ari pun, Aku endang udah bejaku enggau terang lalu udah seruran ngamatka jaku Aku.” (Diatu TUHAN ti Pemadu Tinggi udah meri aku kuasa Iya, lalu ngirumka aku.)

¹⁷Ku Allah Taala ke disembah orang Israel ti kudus, TUHAN ti nebus kita, bejaku: “Aku tu TUHAN Allah Taala kita, ti deka ngajar kita utai ke penguntung kita lalu nunjukka jalai ti patut ditengah kita.

¹⁸“Enti sema kita udah mendingka jaku Aku nya baru berekat tentu udah rarat ngagai kita baka sungai ti enda nemu langkang. Pemenang tentu udah datai ngagai kita baka gelumbang ti ngalun ngagai tebing.

¹⁹Peturun kita tentu udah mayuh baka igi pasir, lalu Aku tetap udah nentuka sida enda dirusak.”

²⁰ Pansut meh kita ari Babilon. Kita udah dilepaska. Padahka berita nya enggau panjung gaga ati. Padahka berita nya di semua endur: “TUHAN udah nebus nembiak Iya Israel!”

²¹Lebuh TUHAN nguluka bala nembiak Iya bejalai nengah menua puang ti angat sereta rangkai, sida enda aus. Iya ngasuh ai pansut ari batu ke sida. Iya melah batu, lalu ai rarat pansut.

²² “Orang ke bedosa sigi nadai pengelikun,” ku TUHAN bejaku.