Read Iban Isaiah 49 Bible Online

Isaiah 49 - Iban bible

Isaiah 49

¹ Pendingka aku, kita menua ti ba tebing tasik, kita ke diau jauh! Sebedau aku ada, TUHAN endang udah milih aku lalu ngeletak aku nyadika nembiak Iya.

² Iya ngasuh leka jaku aku tajam baka pedang. Iya nyaga aku ngena jari Iya Empu.[62] Iya ngaga aku baka laja, tajam sereta sedia deka dikena.

³Ku TUHAN bejaku ngagai aku, “Israel, nuan tu nembiak Aku. Ketegal nuan, orang deka muji Aku.”

⁴Ku aku bejaku, “Aku udah gawa, tang pengawa nya nadai reti! Aku udah ngansingka pengering aku, tang nadai bulih utai.” Tang taja pia, aku arapka TUHAN deka bejaku ngarika aku. Iya deka ngupah aku ketegal pengawa ti dikereja aku.

⁵Sebedau aku ada, TUHAN endang udah ngeletak aku mai bala nembiak Iya pulai baru, mai orang Israel ti udah pambar pendiau pulai baru. TUHAN meri aku basa. Iya meh nyadika pun pengering aku.

⁶ Ku TUHAN bejaku ngagai aku, “Nembiak Aku, Aku bisi pengawa ti besai agi ti diasuh Aku kereja nuan. Nuan ukai semina deka mulaika kuasa ngagai orang Israel ti agi idup, tang Aku deka mega ngaga nuan nyadika penampak ke semua bansa, ngambika semua dunya diselamatka.”

⁷Ku Allah Taala ke disembah orang Israel ti kudus enggau Juruselamat bejaku ngagai siku orang ke balat dipechat, ke dipegedika semua bansa lalu nyadi ulun bala raja: “Bala raja deka meda nuan dilepaska lalu sida deka bediri ngayanka basa sida ngagai nuan. Bala anak raja deka mega meda nuan dilepaska, lalu sida deka meremi baruh masa nuan.” Utai tu deka nyadi laban TUHAN udah milih ulun Iya. Allah Taala ke disembah orang Israel ti kudus ngamatka semaya Iya.

⁸ Ku TUHAN bejaku ngagai bala nembiak Iya, “Lebuh maya Aku deka nyelamatka kita, Aku deka kasihka kita lalu nyaut sabak kita ke minta tulung. Aku deka nyaga sereta ngelindung kita lalu nengah kita Aku deka ngaga siti sempekat enggau semua bansa. Aku deka ngasuh kita ngentapka diri, sekali agi, di menua kita empu ti nadai orang nguan diatu.

⁹Aku deka nyebut ngagai orang tangkap, ‘Kita diatu dilepaska!’ lalu ngagai sida ke diau dalam petang, ‘Pansut ngagai penampak!’ Sida deka nyadi baka jelu bedus ti ngulam ba munggu.

¹⁰ Sida nadai agi lapar tauka aus. Pengangat panchar mata hari enggau pengangat menua puang enda agi ngemediska sida, laban sida deka diuluka siku ti rinduka sida. Iya deka nguluka sida ngagai mata ai.

¹¹“Lalu Aku deka ngaga jalai raya ngerenchah bukit lalu nyendiaka jalai ti deka ditengah bala nembiak Aku.

¹²Bala nembiak Aku deka datai ari jauh, ari utara enggau ari barat, enggau ari Aswan [63] di selatan.”

¹³Belagu meh nuan langit! Manjung gaga ati meh nuan dunya! Awakka bukit belagu! TUHAN deka merindang bala nembiak Iya. Iya deka sinu ati ke bala nembiak Iya ke merinsa.

¹⁴Tang ku orang Jerusalem bejaku, “TUHAN udah ninggalka kitai! Iya enda agi ingatka kitai.”

¹⁵Nya alai TUHAN nyaut, “Kati indu enda ingatka anak diri lalu enda rinduka anak ke diadaka iya empu? Enti sema indai enda ingatka anak diri, Aku deka seruran ingatka kita.

¹⁶Jerusalem, Aku deka seruran ingatka nuan! Aku udah nuliska nama nuan ba tapa jari Aku.

¹⁷“Sida ke deka nirika nuan baru, deka datai enda lama da agi, lalu sida ke udah ngerusak nuan, deka mupuk.

¹⁸Malik kiba-kanan lalu peda utai ti benung nyadi ngelingi nuan! Bala nembiak nuan benung begempuru. Sida iya pulai ngagai nuan! Nya alai laban Aku tu Allah Taala ti idup, kita deka temegahka bala kita empu, baka indu ke ditikah ke temegahka batu berega ti dikena iya.

¹⁹“Menua kita udah nyadi tembawai lalu nadai orang nguan, tang diatu menua kita nya kelalu mit lalu enda ulih ngundan sida ke datai lalu deka diau dia. Lalu sida ke udah ngaga nuan nyadi tembawai deka dibuai jauh ari nuan.

²⁰Bala nembiak nuan ti udah diadaka di menua bukai deka jemah ila nyebut ngagai nuan, ‘Menua tu kelalu mit, kami begunaka menua ti luas agi alai diau!’

²¹Udah nya nuan deka bejaku dalam ati diri, ‘Sapa udah beranakka bala nembiak tu ke aku? Bala anak aku udah lenyau, lalu aku enda ulih beranak agi. Aku udah dibuai lalu diburu ngagai menua bukai. Sapa udah nupi bala nembiak tu? Aku tinggal kediri-diri, nya alai, ari ni penatai bala nembiak tu?’ ”

²² Ku TUHAN ti Pemadu Tinggi bejaku ngagai bala nembiak Iya: “Aku deka meri tanda ngagai semua bansa, lalu sida deka mai bala nembiak nuan pulai baru ngagai menua sida empu.

²³Bala raja deka nyadi baka apai nuan. Bala kuin deka nyadi baka indai nuan. Sida deka meremi baruh di mua nuan, lalu ngemesaika nuan. Enggau ati ti baruh sida deka masa nuan. Nya baru nuan deka nemu Aku endang TUHAN. Nadai orang ke nganti tulung ari Aku, deka asa ngapa.”

²⁴Kati nuan ulih ngerampas perapasan ari jari soldadu? Kati nuan ulih ngelepaska orang tangkap ari jari orang ke jai?

²⁵Ku TUHAN nyaut, “Nya meh utai ti deka nyadi. Orang ke udah ditangkap soldadu, deka ditabanka, lalu perapasan ti udah ulih orang ke jai, deka dirampas. Aku deka ngelaban barang sapa ke ngelaban nuan, lalu Aku deka ngelepaska bala anak nuan.

²⁶Aku deka ngasuh orang ke nekanka pengidup nuan, bebunuhka pangan diri. Sida deka mabuk laban ati ti seruran deka bebunuh pedis ati. Nya baru semua bansa deka nemu Aku endang TUHAN, ke nyelamat sereta ngelepaska nuan. Sida deka nemu Aku tu Allah Taala ti bekuasa orang Israel.”