Read Iban Isaiah 5 Bible Online

Isaiah 5 - Iban bible

Isaiah 5

¹ Pendingka aku lebuh aku bepantun ngena lagu tu, lagu pasal pangan aku enggau kebun anggur iya. Pangan aku bisi sebidang kebun anggur ba munggu ti udu ami.

²Iya nyangkul tanah lalu muai semua batu ari tanah nya. Iya nanam anggur ti pemadu manah. Iya ngaga siti menara kena nyaga kebun nya, numbak siti lubang alai mitan buah anggur. Iya nganti buah anggur nya mansau, tang semua buah anggur nya masam magang.

³Nya alai pangan aku nya lalu bejaku, “Awakka kita ke diau di Jerusalem enggau di menua Judah, ngakim entara aku enggau kebun anggur aku.

⁴Kati aku nadai udah ngereja sekeda utai ba kebun tu? Nama kebuah kebun tu mansutka buah anggur ti masam, lalu enda mansutka buah ti manah, ti diadang aku?

⁵“Tu utai ti deka dikereja aku ngagai kebun anggur aku tu: aku deka muai pagar ti ngelingi kebun tu, lalu ngeruntuhka dinding ti dikena nyaga iya, lalu nejuka jelu babas ngulam lalu ngelunjak iya.

⁶Aku deka nejuka kebun tu tumbuh rumput. Aku enggai nyarau batang anggur, tauka nyangkul tanah, tang aku deka nejuka iya dilamun madang duri. Aku deka nagang mua hari mai ai ujan ngagai iya.”

⁷Israel nya meh kebun anggur TUHAN ti Pemadu Bekuasa. Orang Judah nya meh batang anggur ti ditanam Iya. Iya ngadang sida deka ngereja utai ti manah, tang sida bebunuhka orang. Iya ngadang sida deka ngereja utai ti ngena, tang sida merinsaka orang lalu orang nya nyabak minta atur ti lurus.

⁸Tulah meh kita ke meli mayuh agi rumah enggau umai kena nambahka rumah enggau umai ti udah dikemisi kita. Enda lama da agi, menua tu nadai agi endur alai orang bukai diau, lalu semina kita empu aja deka diau di menua tu.

⁹Aku udah ninga TUHAN ti Pemadu Bekuasa bejaku, “Semua rumah ti besai, ti manah tu deka nyadi tembawai magang lalu nadai orang nguan.

¹⁰Batang anggur ti tumbuh ba lima ikar tanah deka mansutka semina dua puluh liter wain. Seratus lapan puluh liter benih, deka mansutka semina lapan belas liter gandum.”

¹¹ Tulah meh kita ke angkat tumu pagi lalu belabuh ngirup ai bisa, lalu tiap lemai kita ngemabukka diri.

¹²Ba pengerami makai besai, kita bisi belikan, tamborin enggau kesuling, enggau wain. Tang kita enda meretika utai ti dikereja TUHAN,

¹³nya alai kita deka ditabanka nyadi orang tangkap. Bala tuai kita deka mati keberuran, lalu orang mayuh deka mati aus.

¹⁴Dunya pemati nyau lapar nganti sida, lalu iya merangapka nyawa iya. Iya nelan bala orang Jerusalem ti tinggi pangkat, sama enggau orang mayuh ke ragak.

¹⁵Genap iku orang deka dipechat, lalu semua orang ke sumbung deka dikemaruhka.

¹⁶Tang TUHAN ti Pemadu Bekuasa deka ngayanka pemesai kuasa Iya lebuh Iya ngereja utai ti ngena, lalu Iya mandangka pengudus Iya lebuh Iya ngakim bala nembiak Iya.

¹⁷Anak domba deka ngulam rumput ba tembawai nengeri, lalu anak kambin deka tetemuka rumput dia.[7]

¹⁸Tulah meh kita ke enda ulih ngelepaska diri ari dosa kita.

¹⁹Ku kita bejaku, “Awakka TUHAN datai enggau jampat, lalu ngereja utai munyi ti ku Iya, ngambika kitai ulih meda utai nya. Awakka Allah Taala ke disembah orang Israel ti kudus bejalaika pelan Iya. Awakka kitai meda utai ti ku ati Iya.”

²⁰Tulah meh kita ke ngumbai utai ti jai manah, lalu utai ti manah jai. Kita ngaga pemetang nyadi penampak, lalu penampak nyadi pemetang. Kita ngaga utai ti pait nyadi manis, lalu utai ti manis nyadi pait.

²¹Tulah meh kita ke ngumbai diri bepenemu-dalam, ngumbai diri pintar.

²²Tulah meh kita ke nakal ngirup wain, ke berani sereta nadai takut bechampurka ai ti bisa!

²³Tang kita makai suap lalu ngelepaska orang ke bepenyalah, lalu kita enggai meri atur ti lurus ngagai orang ke nadai penyalah.

²⁴Nya alai diatu, kita baka rumput ti rangkai. Kita ngeriut lalu angus diempa api, lalu urat kita deka buruk lalu bungai kita deka rangkai lalu dikebuka ribut, laban kita udah nulak ajar TUHAN ti Pemadu Bekuasa, Allah Taala ke disembah orang Israel ti kudus.

²⁵TUHAN ringat ngagai bala nembiak Iya, lalu udah ngangkatka jari Iya deka ngukum sida. Bukit deka berenyang, lalu bangkai orang ke mati deka ditinggalka ba jalai raya baka uras. Tang taja pia, pengeringat TUHAN enda badu, lalu jari Iya mengkang dikedarka deka ngukum.

²⁶TUHAN meri siti tanda kena Iya ngangauka bansa di menua ti jauh. Iya ngensung kena Iya manggil sida datai ari ujung dunya. Lalu sida datai, laju sereta jampat!

²⁷Nadai siku sida lelak. Nadai siku sida tesangkut. Sida enda ngantuk tauka tinduk. Belulang sida enda gerah. Tali kasut sida enda putus.

²⁸Laja sida tajam, lalu panah sida sedia deka ditimbakka. Tunjing kuda sida kering baka batu, lalu kaki kerita perang sida bepusin baka ribut puting beliung.

²⁹Bala soldadu sida rauh-rauh baka raban singa ti negung udah bekau sida munuh jelu lalu nabanka jelu nya ngagai endur alai orang enda ulih ngerampas jelu nya ari sida.

³⁰Lebuh sida nyerang menua Israel, sida deka manjung nginggar pangka gelumbang. Peda menua tu dibalut pemetang sereta tusah! Penampak nyau bebali nyadi petang.