Read Iban Isaiah 50 Bible Online

Isaiah 50 - Iban bible

Isaiah 50

¹ Ku TUHAN bejaku, “Kati nuan ngumbai Aku muru bala nembiak Aku baka laki ke muai bini? Enti pia, dini alai surat sarak? Kati nuan ngumbai Aku nyual nuan nyadi orang tangkap baka lelaki ke nyual bala anak diri nyadi ulun? Ukai pia. Kita ditangkap lalu dibuai ngagai menua bukai laban dosa kita. Kita dibuai ngagai menua bukai laban penyalah kita.

²“Nama kebuah bala nembiak Aku enda nyaut lebuh Aku datai ngagai sida deka nebus sida? Nama kebuah sida enda nyaut, lebuh Aku ngangau? Kati Aku tu kelalu lemi nebus sida? Aku ulih ngerangkaika tasik ngena seleka jaku lalu ngubah sungai nyadi menua puang, datai ke semua ikan dalam sungai nya mati laban nadai agi ai.

³Aku ulih ngasuh langit bebali petang, baka ke ngulitka orang ke mati.”

⁴TUHAN ti Pemadu Tinggi udah ngajar Aku utai ti patut disebut, ngambika aku ulih ngeringka orang ke lelak. Genap pagi Iya ngasuh aku gagit ati deka ningaka utai ti deka diajar Iya ngagai aku.

⁵TUHAN udah ngasuh aku mereti, lalu aku enda angkat ngelaban Iya tauka ninggalka Iya.

⁶ Aku ngayanka belakang aku ngagai orang ke malu aku. Aku enda nagang sida, lebuh sida mechat aku, lebuh sida ngentun ragum aku lalu ngeludah mua aku.

⁷Tang jaku pechat sida enda ulih ngemediska aku laban TUHAN ti Pemadu Tinggi nulung aku. Aku ngeringka diri natka pechat sida. Aku nemu diri enda ulih dipechat sida,

⁸ laban Allah Taala semak aku, lalu Iya deka ngumbai aku nadai penyalah. Kati orang bisi berani bedawaka aku? Aram kitai sama mansang ngagai kot! Awakka iya bedawaka aku!

⁹TUHAN ti Pemadu Tinggi deka bejaku ngarika aku. Nya alai, sapa ulih ngumbai aku udah ngereja penyalah? Semua orang ke bedawaka aku, deka lesap magang. Sida deka lesap baka kain ti diempa indu gegat.

¹⁰Semua kita ke nangika TUHAN sereta ngasika jaku ulun Iya, jalai ti ditengah kita nyangka udu petang, tang panggaika pengarap kita ba TUHAN. Panggaika diri ba Allah Taala kita.

¹¹Semua kita ke bepekat deka ngerusak orang bukai, kita empu deka dirusak akal kita empu. TUHAN Empu deka ngasuh utai tu nyadi. Kita deka merinsa.