Read Iban Isaiah 51 Bible Online

Isaiah 51 - Iban bible

Isaiah 51

¹Ku TUHAN bejaku, “Pendingka Aku, kita ke minta diri diselamatka, kita ke datai ngagai Aku minta tulung. Kingatka batu ti penatai kita, lumbung batu alai kita ke udah digaga.

²Kingatka aki kita, Abraham, enggau Sarah, ke nurunka kita. Lebuh Aku ngangauka Abraham, iya nadai anak, tang Aku merekatka iya, lalu meri iya mayuh anak. Aku meri iya mayuh peturun.

³“Aku deka ngayanka penyiru Aku ngagai Jerusalem, ngagai semua orang ke diau dalam tembawai iya. Taja pen menua iya udah nyadi menua puang, Aku deka ngaga iya nyadi kebun, baka kebun ti digaga Aku di Eden. Orang deka gaga sereta lantang ati diau dia, sereta nyanyi pantun puji enggau belagu meri terima kasih ngagai Aku.

⁴“Pendingka Aku, kita ke nembiak Aku. Pendingka utai ti disebut Aku: Aku meri jaku ajar Aku ngagai semua bansa. Adat Aku deka meri sida penampak.

⁵Aku deka lengkas datai lalu ngelepaska sida. Maya pemenang Aku nyau semak. Aku Empu deka merintah semua bansa. Menua ti ba tebing tasik nganti penatai Aku. Sida nganti enggau ati ti andal ngadang Aku deka ngelepaska sida.

⁶Engkadah ke langit, perening ngagai dunya! Langit deka lesap baka asap. Dunya deka luya baka kain ti lama, lalu semua orang ke diau dalam dunya, deka mati baka lalat. Tang pengelepas ti dibai Aku, deka meruan belama iya. Pemenang Aku deka meruan belama iya.

⁷“Pendingka Aku, kita ke nemu pengelurus, ti udah ngelekatka ajar Aku dalam ati kita. Anang takut lebuh orang ngelese sereta mechat kita.

⁸Sida deka lesap baka gari ti diempa indu gegat! Tang pengelepas ti dibai Aku deka meruan belama iya. Pemenang Aku deka tan belama iya.”

⁹Dani, O TUHAN, lalu tulung kami! Kena meh kuasa Nuan, lalu selamatka kami. Kena meh kuasa nya baka ke dikereja Nuan dulu kelia. Nuan Empu ke mepat antu tasik ke benama Rahap.[64]

¹⁰Nuan Empu ke ngerangkaika tasik lalu ngaga jalai raya nengah ai, ngambika sida ke diselamatka Nuan, ulih meraka ke seberai.

¹¹Sida ke udah dilepaska Nuan deka datai di Jerusalem enggau ati ti gaga, belagu sereta manjung gaga ati. Sida deka lantang ati belama iya, dilepaska belama iya ari ati ti sinu sereta tusah.

¹²Ku TUHAN bejaku, “Aku tu ke meri kita pengering. Nama kebuah kita takutka mensia, ti nadai lebih agi tan ari rumput?

¹³Kati kita enda ingatka TUHAN ti udah ngaga kita, ke mintarka langit lalu nudukka pugu dunya? Nama kebuah kita seruran takutka pengeringat orang ke nekanka pengidup kita, orang ke sedia deka ngerusak kita? Pengeringat sida enda ulih negu kita agi.

¹⁴Orang ke kena jil, deka dilepaska enda lama da agi. Sida deka panjai umur lalu nadai suntuk pemakai.

¹⁵“Aku tu TUHAN Allah Taala kita. Aku ngirau tasik lalu ngasuh gelumbang besegum. Nama Aku TUHAN ti Pemadu Bekuasa!

¹⁶Aku mintarka[65] langit lalu nudukka pugu dunya. Ku Aku bejaku ngagai Jerusalem, ‘Kita tu nembiak Aku! Aku udah meri jaku ajar Aku ngagai kita, lalu Aku nyaga kita ngena jari Aku.’ ”

¹⁷O Jerusalem, dani nuan! Dani lalu angkat! Nuan udah ngirup mangkuk ukum ti udah diasuh TUHAN irup nuan lebuh Iya ringat. Nuan udah ngirup ari mangkuk nya, lalu iya ngasuh nuan guir-guir.

¹⁸Nadai orang ngiring nuan. Nadai siku ari bala nembiak nuan deka megai jari nuan.

¹⁹Dua bengkah penusah ti besai udah ninggang nuan. Menua nuan udah rusak laban perang, lalu bala nembiak nuan udah keberuran. Nadai orang mandangka penyiru ngagai nuan.

²⁰Ba genap sukut jalai raya bala nembiak nuan rebah lembut tulang. Sida iya baka rusa ti disintak jarin. Sida udah ngasaika pengeringat Allah Taala.

²¹Kita orang Jerusalem ke merinsa, kita ke guir-guir baka orang ke mabuk,

²²TUHAN Allah Taala kita bejaku ngarika kita, ku Iya, “Aku ngambi mangkuk ti udah diberi Aku ngagai kita lebuh Aku ringat. Kita enda agi ibuh ngirup wain ti ngasuh kita guir-guir.

²³Aku deka meri wain nya ngagai orang ke nekanka pengidup kita, ngagai sida ke ngasuh kita gali ba jalai raya lalu ngelunjak kita, baka ke ngelunjak tanah.”