Read Iban Isaiah 54 Bible Online

Isaiah 54 - Iban bible

Isaiah 54

¹ Jerusalem, nuan udah baka indu ke nadai anak, tang diatu nuan tau belagu sereta manjung gaga ati. Diatu nuan deka lebih mayuh agi anak ari indu ke nadai kala ditinggalka laki.

²Gaga langkau kain nuan besai agi. Gaga panjai agi tali iya, lalu gaga tegap agi tiang bantil iya!

³Nuan deka nangkir pemesai rampa menua nuan ari tisi sepiak ngagai tisi sepiak. Bala nembiak nuan deka ngambi pulai baru menua ti diuan bansa bukai diatu. Nengeri ti enda diuan orang diatu, deka penuh laban mensia.

⁴Anang takut, laban nuan enda dikemaluka. Nuan enda dipechat. Nuan deka badu agi ingatka diri ti udah enda tetap ati lebuh nuan agi biak, enggau pasal diri ke balu lalu diau seilu-ilu.

⁵Allah Taala ti ngaga nuan deka nyadika laki nuan. Nama Iya TUHAN ti Pemadu Bekuasa. Allah Taala ke disembah orang Israel ti kudus deka nebus nuan. Iya nya ke merintah semua dunya.

⁶Israel, nuan baka bini ke agi biak, ke ditinggalka laki, lalu balat tusah ati. Tang TUHAN ngangauka nuan pulai baru ngagai Iya. Ku iya:

⁷“Aku ninggalka nuan sekejap aja. Aku deka ngambi nuan pulai baru enggau ati ti balat rindu.

⁸Aku nguingka Diri ari nuan enda lama, laban Aku ringat, tang Aku deka ngayanka pengerindu Aku ngagai nuan belama iya.” Pia ku TUHAN ti nebus nuan bejaku.

⁹ “Lebuh maya Noah menya, Aku besemaya enda agi ngampuhka dunya ngena ai bah. Diatu Aku besemaya enda agi ringat ngagai nuan. Aku enda nganu tauka ngukum nuan.

¹⁰ Bukit enggau munggu nyangka tau tumpur, tang pengerindu Aku ke nuan enda nemu abis. Aku deka ngingatka sempekat pemaik Aku belama iya.” Pia ku TUHAN ti rinduka nuan bejaku.

¹¹ Ku TUHAN bejaku, “O Jerusalem, nuan nengeri ti merinsa, ti nadai daya, ti nadai orang merindang. Aku deka ngaga pugu nuan baru ngena batu ti berega.

¹²Aku deka ngaga menara nuan ngena batu sejabu pintu kuta nuan ngena batu ti beperenching baka api, enggau dinding ti ngelingi nuan ngena batu ti berega.

¹³ “Aku Empu deka ngajar bala nembiak nuan lalu meri sida pengaya enggau pemaik.

¹⁴Atur ti betul enggau pengelurus deka ngasuh nuan kering. Nuan deka diau likun ari orang ke nekanka pengidup enggau ari utai ti balat ngenakut.

¹⁵Barang sapa nyerang nuan, ngereja nya ukai ari asuh Aku. Barang sapa ngelaban nuan, deka alah.

¹⁶“Aku tu ke ngaga tukang kambuh, ke nungkunka api lalu ngambuh senyata. Aku mega ngaga soldadu ke bekenaka senyata bebunuhka munsuh.

¹⁷Tang nadai senyata ti digaga ulih ngemediska nuan lalu nuan deka nyaut semua orang ke besalah nuan. Aku deka bejaku ngarika bala nembiak Aku lalu meri sida pemenang.” TUHAN udah bejaku.