Read Iban Isaiah 56 Bible Online

Isaiah 56 - Iban bible

Isaiah 56

¹Ku TUHAN bejaku ngagai bala nembiak Iya, “Kereja utai ti lurus sereta ngena, laban Aku deka ngelepaska kita enda lama da agi.

²Aku deka merekatka orang ke seruran ngintu Hari Sabat, lalu enda ngamahka hari nya. Aku deka merekatka orang ke enda ngereja penyai.”

³Orang ari menua bukai ti diau begulai enggau nembiak TUHAN, enda patut nyebut, “TUHAN enggai ngemendarka aku besembiang enggau bala nembiak Iya.” Orang ke udah dipeliri, enda tau berunding ngumbai diri enda tau nyadi raban nembiak Allah Taala, ketegal iya enda ulih bisi anak.

⁴ Ku TUHAN bejaku ngagai orang ke baka nya, “Enti nuan ngintu Hari Sabat kena nuan ngemesaika Aku, lalu enti nuan ngereja utai ti ngerinduka ati Aku, lalu tetap ati ngasika sempekat Aku,

⁵nya baru nama nuan deka dikingatka dalam Rumah Aku, enggau ba bala nembiak Aku, lama agi ari enti nuan bisi anak lelaki enggau anak indu. Nuan deka dikingatka belama iya.”

⁶Lalu ku TUHAN bejaku enggau bala orang kampar ti udah nyadi raban nembiak TUHAN, ti rinduka Iya, lalu betuaika Iya, ke ngintu Hari Sabat sereta ngasika sempekat Iya enggau ati ti tetap:

⁷ “Aku deka mai kita ngagai Sion, bukit Aku ti kudus,[67] meri kita ati ti gaga dalam rumah sembiang Aku, lalu nerima piring ti diberi kita ba alta Aku. Rumah Aku deka dikumbai rumah sembiang ke orang ari semua bansa.”

⁸TUHAN ti Pemadu Tinggi, ti udah mai bala nembiak Iya Israel pulai ari menua alai sida ke udah dibuai, udah besemaya madahka Diri deka mai orang bukai nyadika raban sida.

⁹TUHAN udah ngasuh bansa bukai datai baka jelu babas, lalu makai bala nembiak Iya.

¹⁰Ku Iya, “Semua bala tuai, ke dikarapka Aku meri jaku tangkan ngagai bala nembiak Aku, buta magang! Sida nadai nemu utai. Sida baka ukui ti dikarapka jaga tang enda nemu nyalak. Sida semina gali lalu bemimpi. Naka meh peneka sida tinduk!

¹¹Sida nya baka ukui ti bam, ti nadai nemu kenyang. Bala tuai tu nadai nemu reti utai. Genap iku sida ngereja utai nitihka peneka ati diri, lalu ngambi ulih ke diri empu.

¹²Ku bala pemabuk tu bejaku, ‘Aram ngambi wain lalu ngirup enggau naka ulih! Pagila deka manah agi ari sehari tu!’ ”