Read Iban Isaiah 57 Bible Online

Isaiah 57 - Iban bible

Isaiah 57

¹Orang ke manah mati, lalu nadai orang mereti tauka ibuhka sida. Tang lebuh sida mati, penusah nadai agi ulih ngemediska sida.

²Orang ke idup menyana, deka tetemuka pemaik lalu belelak lebuh sida mati.

³Datai kitu kita orang ke bedosa, ngambika kita diakim! Kita tu nadai lebih ari manang, tauka orang ke butang, tauka indu sundal.

⁴Sapa ke dikeduan kita? Kita orang ke bula, sapa ke dikeleseka kita?

⁵Kita beleman di baruh kayu keramat kita, kena kita nyembah petara ti ngasuh peridi. Kita nyerahka bala anak kita nyadika piring dalam lubang gua ti semak sungai.

⁶Kita ngambi batu ti alus ari endur nya, lalu nyembah batu nya nyadika petara. Kita nuang wain nyadika piring ti diberi kita ngagai sida, lalu mai ngagai sida piring tepung. Kati kita ngumbai Aku rinduka semua utai nya?

⁷Kita niki ngagai bukit ti tinggi ngenjuk piring lalu beleman enggau pangan diri.

⁸Kita nirika engkeramba kita ke kamah ngimbai mua pintu kita ari dalam. Kita ninggalka Aku. Kita muka gari kita, lalu niki ngagai katil kita ke besai, ngagai ambai kita ke digaji kita tinduk enggau kita. Dia meh alai kita ngemuaska ati diri ti kanji.

⁹Kita ngena minyak wangi enggau minyak unsut, lalu mansang nyembah petara Molek. Kita ngirumka bala seruan ngagai mayuh bengkah menua, nyentuk ke ngagai dunya pemati, begigaka petara ti deka disembah kita.

¹⁰Kita nyau lelak begigaka petara bukai, tang kita enda nemu badu. Kita ngumbai engkeramba kita ke kamah nya ulih meri kita pengering ngambika kita enda lembut tulang.

¹¹Ku TUHAN bejaku, “Sapa petara nya ti ngasuh kita takut, datai ke kita nyau madahka utai ti bula ngagai Aku, lalu enda agi ingatka Aku? Kati kita badu ngemesaika Aku laban Aku lama udah enda bemunyi?

¹²Kita ngumbai utai ti dikereja kita nya utai ti ngena, tang Aku deka mandangka semua ulah kita, lalu engkeramba kita enda ulih nulung kita.

¹³Lebuh kita nyabak minta tulung, awakka bala engkeramba kita ngelepaska kita! Kesuh ribut aja ulih ngebuka sida! Tang orang ke manggaika diri ba Aku, deka idup di menua tu lalu deka nyembah Aku dalam Rumah Aku.”

¹⁴Ku TUHAN bejaku, “Awakka bala nembiak Aku pulai ngagai Aku baru. Buai semua utai ti nekul jalai sida! Gaga lalu sediaka jalai raya!

¹⁵“Aku tu Allah Taala ti tinggi, ti kudus, ti idup belama iya. Aku diau ba endur ti tinggi sereta kudus, tang Aku mega diau begulai enggau bala nembiak Aku ke baruh ati sereta udah nesal ati ke dosa sida, ngambika Aku ulih mulaika ati ti kempang enggau pengadang ngagai sida baru.

¹⁶Aku udah meri nembiak Aku pengidup, lalu Aku enda agi majak besalah sida, tauka ringat ngagai sida belama iya. [68]

¹⁷Suba Aku udah ringat ngagai sida ketegal dosa enggau pengamu sida. Nya alai Aku ngukum sida lalu ngelengkaka sida. Tang sida kieh, lalu majak nitihka jalai sida empu.

¹⁸“Aku udah meda jalai sida ngereja utai, tang Aku deka ngeraika sida. Aku deka nguluka sida, lalu nulung sida, lalu Aku deka merindang sida ke ngulit.

¹⁹ Aku meri pemaik ngagai semua orang ke semak enggau ke jauh! Aku deka ngeraika nembiak Aku.

²⁰Tang orang ke jai deka nyadi baka tasik ti enda ngetu begelumbang, ti enda nemu badu ngalun ngagai tebing, mai pengamah enggau tanah luchak.

²¹ Orang ke bedosa sigi nadai pengelikun,” ku TUHAN bejaku.