Read Iban Isaiah 58 Bible Online

Isaiah 58 - Iban bible

Isaiah 58

¹Ku TUHAN bejaku, “Peradakka nyawa nuan enggau naka penginggar! Padahka ngagai nembiak Aku penyalah sida, padahka ngagai orang Israel dosa sida!

²Sida nyembah Aku tiap hari, madahka diri keran deka nemu jalai Aku sereta ngasika adat Aku. Sida madahka diri minta Aku meri sida adat ti lurus, lalu madahka diri gaga ati nyembah Aku.”

³Ku sida nanya, “Nama kebuah kami bepasa, enti Nuan enda meda kami? Nama kebuah kami ngemaruhka diri, enti Nuan enda bedulika kami?” Ku TUHAN bejaku ngagai sida, “Iya ti bendar, lebuh kita bepasa, kita ngereja utai kena kita ngulihka penguntung ke diri empu[69] lalu kita nekanka pengidup orang ke gawa ke kita.

⁴Kita mangah lebuh kita bepasa, lalu kita belaya lalu berekak. Kati kita ngumbai bepasa ti baka nya ulih nyungkak Aku mendingka sampi kita?

⁵Lebuh kita bepasa, kita endang sengaja ngemediska diri empu; kita kunduk-kunduk baka daun rumput, lalu gali malai kain guni enggau amau. Kati nya gaya utai ti dikumbai kita bepasa? Kati kita ngumbai Aku rinduka utai ti baka nya?

⁶“Baka tu ku gaya bepasa ti dikedekaka Aku: muai rantai ti nekanka pengidup orang, muka tali tangkun ti merinsaka sida, ngelepaska orang ke kena perinsa, lalu matahka semua kungkung;

⁷ magi pemakai kita enggau orang ke lapar; ngelaluka orang ke seranta, ke nadai endur alai diau ke dalam rumah kita; meri gari ngagai orang ke nadai gari; lalu nulung kaban belayan kita empu.

⁸Nya baru penampak kita deka manchar baka mata hari ti tumbuh pagi hari, lalu telih kita deka lengkas suman. Pengelurus kita deka bejalai dulu ari kita, lalu mulia TUHAN deka nyaga kita ari belakang.

⁹Udah nya, lebuh kita ngangauka TUHAN, Iya deka nyaut. Lebuh kita ngangauka Iya, Iya deka nyebut, “Tu Aku”. “Enti kita badu agi nekanka pengidup orang, badu agi mechat orang, lalu badu agi bejaku jai;

¹⁰enti kita meri pemakai kita ngagai orang ke lapar, lalu ngemuaska ati orang ke suntuk, nya baru penampak kita deka manchar dalam pemetang, lalu pemetang ti ngelingi kita deka nyadi baka penampak tengah hari.

¹¹Lalu TUHAN deka seruran ngiring kita lalu ngemuaska kita enggau utai ti manah, lalu ngasuh kita kering; lalu kita deka nyadi baka kebun ti selalu dipanjah enggau ai, baka mata ai ti nadai nemu langkang.

¹²Nengeri kita ke udah runtuh, deka didirika baru; Kita deka nirika iya baru ba endur asal iya; Orang deka ngumbai kita orang ke nirika dinding kuta ti udah rusak, ke ngaduka rumah ti udah rusak ngambika bisi alai diau.”

¹³Enti kita bebasaka Hari Sabat lalu enda ngereja utai ti dikedekaka kita empu ba hari Aku ti kudus nya, tang gaga ati ke hari nya, lalu ngumbai hari nya hari ti patut dibasa; enti kita bebasaka hari nya lalu enda gawa, enda ngelantangka diri, lalu berandau ngapa ba hari nya,

¹⁴nya baru kita deka gaga ati ke TUHAN, lalu Aku deka ngasuh kita dibasa semua orang di serata dunya. Aku deka nupi kita ngena pesaka aki kita Jakop. TUHAN udah bejaku.”