Read Iban Isaiah 59 Bible Online

Isaiah 59 - Iban bible

Isaiah 59

¹Anang ngumbai TUHAN lemi lalu enda ulih ngelepaska kita, tauka bengal lalu enda ulih ningaka kangau kita.

²Penyai kita empu ti udah nyeraraka kita ari Allah Taala kita; dosa kita empu ti udah ngelalaika mua Iya ari kita, ngambika Iya enda ninga.

³Laban jari kita udah kamah laban darah, lalu tunjuk kita udah kamah laban penyai. Mulut kita udah bula, lalu dilah kita nyebut utai ti jai.

⁴Kita mansang ngagai kot, tang ukai laban kita deka meri atur ti lurus. Kita ngarapka pemula ngasuh kita menang. Kita bejalaika pelan kita ke deka ngemediska orang.

⁵Akal ti jai ti digaga kita bisa baka telu ular ti bisa. Enti kita mechahka telu nya, ular pansut! Tang akal kita nadai mai penguntung ngagai kita. Akal nya nadai guna, baka gari ti digaga ari pukat empelawa!

⁷ Kita seruran berunding deka ngereja penyai, lalu kita nyau enda teantika diri ngereja utai nya. Kita nadai kakang ati munuh orang ke nadai penyalah. Kita ngerusak lalu ngaga utai nyadi tembawai di sebarang endur kita bejalai.

⁸Nadai orang ulih diau likun lebuh kita bisi. Semua utai ti dikereja kita endang nadai lurus siti. Jalai kita bingkuk, lalu nadai orang ke niti jalai nya ulih diau likun.

⁹Ku orang mayuh bejaku, “Diatu baru kami nemu kebuah Allah Taala enda ngelepaska kami ari orang ke nekanka pengidup kami. Kami ngarapka penampak deka nenggau jalai kami lebuh kami bejalai, tang semina pemetang aja ti bisi,

¹⁰lalu kami bejalai gapa-gapa baka orang ke buta. Kami tesangkut lebuh tengah hari, baka ke bejalai lebuh malam hari, baka ke bejalai dalam pemetang dunya pemati.

¹¹Kami takut sereta tusah ati. Kami inginka Allah Taala ngelepaska kami ari pengidup ti ditekanka orang enggau ari utai ti salah, tang nadai ga Iya nulung kami.

¹²“TUHAN, kami endang mayuh penyalah ngelaban Nuan. Dosa kami bedawaka kami, lalu kami nemu semua nya.

¹³Kami udah angkat ngelaban Nuan, nulak Nuan, lalu enggai nitihka Nuan. Kami udah nekanka pengidup orang bukai, lalu udah limpang ari Nuan. Kami berundingka utai ti bula, lalu semua leka jaku kami bula magang.

¹⁴Atur ti lurus dibuai, lalu atur ti ngena enda ulih datai semak. Pemendar tesangkut ba padang di puak nengeri, lalu ati ti betul sigi nadai tempat ba endur nya.

¹⁵Ati ti betul endang semina mimit aja, datai ke orang ke badu ngereja penyai nyau nemu diri diperinsaka orang ke ngereja penyalah.” TUHAN udah meda utai nya, lalu Iya enda lantang ati laban Iya nadai meda atur ti lurus.

¹⁶ Iya alit ati meda orang nadai nulung orang ke kena tekan. Nya alai Iya deka ngena kuasa Iya Empu ngelepaska sida, lalu bulih pemenang.

¹⁷ Iya deka ngena atur ti lurus baka ke ngena baju kebal, enggau kuasa pengelepas, baka ke ngena selapuk kebal. Iya deka ngembuan ati ti keran deka ngaduka utai ti salah nyadi utai ti ngena, lalu ngukum sereta malas atur ti enda lurus, ti ditatka orang mayuh.

¹⁸Iya deka ngukum bala munsuh Iya nitihka utai ti udah dikereja sida, nyengkaum orang ke diau di menua ti ba tebing tasik.

¹⁹Semua orang di timur enggau di barat, deka nangika Iya, sereta nangika kuasa Iya ti besai. Iya deka datai baka ai sungai ti deras, baka ribut ti balat.

²⁰ Ku TUHAN bejaku ngagai bala nembiak Iya, “Aku deka datai ngagai Jerusalem laban Aku deka bejaku ngarika kita, lalu nyelamatka semua kita ke nesal ati ke dosa kita.

²¹Lalu Aku ngaga siti sempekat enggau kita: Aku udah meri kita kuasa, enggau jaku ajar nyadika pesaka kita belama iya, lalu kenyau ari diatu kita enda tau enda ngasika Aku, lalu ngajar bala anak enggau peturun kita ngasika Aku belama iya.”