Read Iban Isaiah 60 Bible Online

Isaiah 60 - Iban bible

Isaiah 60

¹Angkat, Jerusalem, lalu manchar baka mata hari. Mulia TUHAN manchar ngagai nuan!

²Semua bansa bukai deka dibap pemetang, Tang penampak TUHAN deka manchar ngagai nuan. Penampak mulia Iya deka meruan enggau nuan.

³Semua bansa deka datai ngagai penampak nuan, lalu bala raja deka datai ngagai penampak hari nuan ti baru.

⁴ Perening ngagai utai ti ngelingi nuan, lalu peda utai ti nyadi: Bala nembiak nuan begempuru laban sida deka pulai baru ngagai menua sida empu! Bala anak lelaki nuan deka datai ari menua ti jauh. Bala anak indu nuan deka dibai baka ke mai anak mit.

⁵Nuan deka meda nya, lalu ati nuan deka penuh laban pengaga. Nuan deka getar-getar gagit ati. Pengaya semua bansa deka dibai ngagai nuan. Pengaya sida deka datai ari tasik luar.

⁶Rintai bala unta deka datai ari Midian enggau ari Epah. Sida deka datai ari Sheba, mai emas enggau menyan. Orang mayuh deka madahka berita ti manah pasal utai ti udah dikereja TUHAN!

⁷Semua jelu bedus di Kedar enggau di Nebaiot Deka dibai ngagai nuan nyadika piring Lalu diserahka ba alta kena ngerinduka ati TUHAN. TUHAN deka ngaga Rumah Sembiang Iya bemulia agi ari ti udah.

⁸Sapa orang nya ke ngelayang baka remang, Baka burung achang ti pulai ngagai tansang?

⁹Sida nya kapal ti datai ari menua ti ba tebing tasik, Mai bala nembiak Allah Taala pulai ngagai menua sida empu. Sida mai pirak enggau emas Kena ngemesaika nama TUHAN, Allah Taala ke disembah orang Israel ti kudus, Ke udah ngasuh semua bansa masa bala nembiak Iya.

¹⁰Ku TUHAN bejaku ngagai Jerusalem, “Orang bansa bukai deka nirika dinding kuta nuan baru, Lalu bala raja sida deka betuaika nuan. Lebuh Aku ringat suba, Aku ngukum nuan, Tang diatu Aku deka ngayanka pengerindu enggau pengasih Aku ke nuan.

¹¹ Pintu kuta nuan deka tebuka siang malam, Ngambika raja ari mayuh bengkah bansa Mai pengaya sida ngagai nuan.

¹²Tang bansa ti enda betuaika nuan Deka abis dirusak.

¹³“Ramu ti digaga ari kayu pain, juniper, enggau ari saipris, Kayu ti pemadu manah ari utan menua Lebanon, Deka dibai kena nirika nuan baru, Jerusalem, Kena ngemanahka gaya Rumah Aku, Kena ngemuliaka nengeri Aku.

¹⁴ Peturun orang ke udah nekanka pengidup kita, deka datai lalu meremi masa nuan. Semua orang ke udah mechat nuan, deka nyembah di kaki nuan. Sida deka ngumbai nuan ‘Nengeri TUHAN,’ ‘Sion, Nengeri Allah Taala ke disembah orang Israel ti kudus.’

¹⁵“Nuan enda agi ditinggal lalu dipegedika, Nengeri ti ditinggalka sereta nadai orang nguan. Aku deka ngaga nuan besai sereta manah gaya, Nyadika endur alai pengaga deka meruan belama lama iya.

¹⁶Semua bansa enggau raja deka ngintu nuan Baka indai ke nusuka anak diri. Nuan deka nemu, Aku ti TUHAN udah nebus nuan, nemu Allah Taala ke disembah orang Israel ti bekuasa udah nebus nuan.

¹⁷“Aku deka mai emas ngagai nuan, ukai mai temaga, Pirak enggau temaga, ukai besi enggau kayu, Mai besi, ukai mai batu. Orang ke merintah nuan enda agi nekanka pengidup nuan. Aku deka ngasuh sida merintah enggau lurus sereta enggau pemaik.

¹⁸Orang ke bamuk nadai agi didinga. Pengerusak nadai agi ngerusak menua nuan. Aku deka ngelindung sereta nyaga nuan baka dinding kuta. Nuan deka muji Aku, laban Aku udah nyelamatka nuan.

¹⁹ “Nuan enda agi begunaka penampak mata hari lebuh siang hari Tauka penampak bulan lebuh malam hari, Laban Aku ti TUHAN deka nyadika penampak nuan belama iya. Penampak mulia Aku deka manchar ngagai nuan.

²⁰Nuan enda agi tusah ati Laban Aku ti TUHAN deka nyadika penampak nuan belama iya, Ti tan lama agi ari mata hari enggau bulan.

²¹Semua bala nembiak nuan deka ngereja utai ti ngena, Lalu deka bempu menua tu belama iya. Aku udah nanam sida, Aku udah ngaga sida, Kena mandangka pemesai kuasa Aku ngagai semua mensia.

²²Indah suku raban bansa ti pemadu mit, ti pemadu baruh pendiau Deh deka besai kuasa, baka bansa ti besai kuasa. Lebuh maya ti ngena datai, Aku deka ngasuh utai tu lengkas nyadi. Aku tu TUHAN!”