Read Iban Isaiah 61 Bible Online

Isaiah 61 - Iban bible

Isaiah 61

¹ TUHAN ti Pemadu Tinggi udah ngiri aku enggau Roh Kudus Iya. Iya udah milih aku, lalu ngasuh aku Mai berita manah ngagai orang ke seranta, Nyumanka ati orang ke tusah, Madahka pengelepas ke orang ke kena tangkap Enggau pengelepas ke orang ke dalam rumah jil.

² Iya udah ngasuh aku madahka Maya udah datai Alai TUHAN deka nyelamatka nembiak Iya Lalu ngalahka bala munsuh sida. Iya udah ngasuh aku merindang semua orang ke ngulit,

³Meri ngagai sida ke ngulit di Sion Pengaga enggau pengelantang, kena nganti ati ti tusah, Pantun puji, kena nganti ati ti sinu. Sida deka nyadi baka kayu Ti ditanam TUHAN. Semua sida deka ngereja utai ti ngena, Lalu Allah Taala deka dipuji ketegal semua utai ti udah dikereja Iya.

⁴Sida deka ngaga nengeri ti tembawai nyadi nengeri ti baru.

⁵Nembiak Aku, orang bansa bukai deka betuaika kita. Sida deka ngintu raban jelu tupi kita Lalu bumai ke kita, lalu ngintu kebun anggur kita.

⁶Lalu kita deka dikumbai bala imam TUHAN, Bala nembiak Allah Taala kitai. Kita deka ngelantangka diri ngena pengaya ari mayuh bengkah bansa Lalu temegahka utai ti diempu kita.

⁷Pemalu enggau penyai kita udah abis. Kita deka diau di menua kita empu, Lalu pengaya kita deka betambah dua kali lipat. Pengaga kita deka meruan belama iya.

⁸Ku TUHAN bejaku, “Aku rinduka atur ti lurus, lalu Aku begedika pengawa ti nekanka pengidup orang, enggau kereja ti salah. Aku tetap deka ngupah bala nembiak Aku Lalu ngaga sempekat ti meruan belama iya enggau sida.

⁹Sida deka tebilang nama ba semua bansa. Genap iku orang ke meda sida deka nemu Sida nya endang orang ke udah diberekatka Aku.”

¹⁰ Jerusalem rami gaga ketegal utai ti udah dikereja TUHAN. Jerusalem nyau baka indu ke udah begari sedia deka ditikah. Allah Taala udah ngerasukka pengelepas enggau pemenang ngagai iya.

¹¹Baka leka benih ti tetap deka matuk lalu tumbuh, Baka nya meh TUHAN ti Pemadu Tinggi deka nyelamatka bala nembiak Iya, Lalu semua bansa deka muji TUHAN.