Read Iban Isaiah 62 Bible Online

Isaiah 62 - Iban bible

Isaiah 62

¹Aku deka bejaku meransang Jerusalem. Aku enggai badu bejaku datai ke udah diselamatka, Lalu pemenang iya manchar terang baka lampu lebuh malam hari.

²Jerusalem, semua bansa deka meda nuan menang! Semua raja sida deka meda mulia nuan. Nuan deka dikumbai ngena nama ti baru, Nama ti diberi TUHAN Empu.

³Nuan deka nyadi baka makota ti manah gaya ke TUHAN.

⁴Nuan enda agi dikumbai “Ditinggalka” Lalu menua nuan enda agi dikumbai “Bini ke Ditinggalka.” Nama baru nuan nya “Allah Taala Gaga Ati Ke Iya.” Menua nuan deka dikumbai, “Lantang Ati Belaki,” Laban TUHAN gaga ati ke nuan Lalu Iya deka nyadi baka laki ke menua nuan.

⁵Baka orang bujang ke ngambi siku dara bungas nyadika bini iya, Baka nya meh Iya ti udah ngaga nuan, deka jadi enggau nuan. Baka laki ke gaga ati ke bini iya, Baka nya meh Allah Taala deka gaga ati ke nuan.

⁶Aku udah ngengkahka bala jejaga ba atas dinding kuta nuan, Jerusalem. Sida enda tau enda bemunyi siang malam. Sida enda tau enda ngasuh TUHAN ngamatka semaya Iya Lalu enda tau sekali-kali nejuka Iya enda ingatka semaya Diri.

⁷Sida enda tau nejuka Iya belelak, datai ke Iya udah nirika nengeri Jerusalem baru Lalu ngaga nengeri nya nyadika nengeri ti dipuji orang di serata dunya.

⁸TUHAN udah besemaya ngena sumpah Lalu ulih kuasa Iya, Iya deka ngamatka semaya nya: “Gandum nuan enda agi nyadika pemakai munsuh, Lalu orang bansa bukai enda agi ngirup wain nuan.

⁹Tang kita ke nanam enggau ngetau gandum Deka makai roti nya lalu muji TUHAN. Kita ke ngintu kebun lalu ngetau buah anggur Deka ngirup wain nya ba tengah laman Rumah Aku.”

¹⁰Orang Jerusalem, pansut kita ari nengeri tu Lalu gaga sebatang jalai raya ke bala kita ke deka pulai ari menua bukai! Sediaka jalai raya ti besai. Buai batu ari jalai raya nya! Dirika siti tanda ngambika semua bansa nemu

¹¹ TUHAN madahka ngagai semua dunya: “Padahka ngagai orang Jerusalem Pasal TUHAN ti deka datai lalu nyelamatka kita, Ke deka mai sama enggau Iya orang ke udah diselamatka Iya.”

¹²Kita deka dikumbai “Nembiak Allah Taala ti kudus,” “Orang Ke Udah Diselamatka TUHAN.” Jerusalem deka dikumbai, “Nengeri Ti Dikerinduka Allah Taala,” “Nengeri Ti Enda Ditinggalka Allah Taala.”