Read Iban Isaiah 63 Bible Online

Isaiah 63 - Iban bible

Isaiah 63

¹ “Sapa orang nya ke datai ari nengeri Bosrah di menua Edom? Sapa orang nya ke ngena pekayan ti mirah, ke bejalai[70] ngena kuasa enggau pengering?” Iya nya TUHAN ti bekuasa, ke kering nyelamat, ke datai madahka pemenang Diri.

²“Nama kebuah pekayan iya ngemalat nya mirah, baka gari orang ke udah ngindik buah anggur kena ngaga wain?”

³ Ku TUHAN nyaut, “Aku udah ngindik semua bansa baka buah anggur, lalu nadai orang datai nulung Aku. Aku ngindik semua bansa laban Aku ringat, lalu darah sida udah ngamahka pekayan Aku.

⁴Aku udah mutuska runding, maya udah datai alai Aku patut nebus bala nembiak Aku, lalu ngukum munsuh sida.

⁵ Aku tekenyit ati lebuh Aku malik lalu nadai meda orang nulung Aku. Tang pengeringat Aku ngasuh Aku kering, lalu Aku menang.

⁶Aku ringat lalu ngindik semua bansa lalu ngalahka sida, lalu Aku mubuhka darah sida ba tanah.”

⁷Aku deka madahka pasal pengerindu TUHAN ti meruan belama iya. Aku muji Iya ketegal semua utai ti udah dikereja Iya ke kitai. Iya udah meri mayuh berekat ngagai orang Israel, ketegal pengasih enggau pengerindu Iya ti meruan.

⁸Ku TUHAN bejaku, “Sida nya nembiak Aku. Sida enggai nipu Aku.” Nya alai Iya ngelepaska sida

⁹ari semua pemerinsa sida. Ukai melikat tang TUHAN Empu ke nebus sida. Iya nebus sida ketegal pengerindu enggau penyiru Iya ke sida. Dulu kelia Iya endang seruran ngibun sida,

¹⁰tang sida angkat ngelaban Iya, lalu ngenusahka ati Iya. Nya alai TUHAN nyadika munsuh sida, lalu beperang ngelaban sida.

¹¹Tang sida[71] ingatka utai ti udah nyadi dulu kelia lebuh rambau nembiak TUHAN ke benama Moses, sida lalu nanya, “Dini alai TUHAN diatu, TUHAN ke udah nyelamatka bala tuai nembiak Iya ari tasik? Dini alai TUHAN ke udah meri Roh Kudus Iya ngagai Moses?

¹² Dini alai TUHAN, ke udah ngena kuasa Iya ngereja pengawa ti besai ngena Moses, nyeraraka ai tasik, lalu nguluka bala nembiak Iya nengah ai ti dalam, lalu ngasuh nama Iya tebilang belama iya?” Lebuh sida diuluka TUHAN, kaki sida bejalai tegap baka kuda babas, lalu enda tesangkut.

¹⁴Baka raban sapi ti diuluka ngagai lebak ti ami, baka nya meh TUHAN ngasuh bala nembiak Iya belelak. Iya nguluka bala nembiak Iya lalu mai basa ngagai nama Iya.

¹⁵TUHAN, malik ngagai kami ari serega, alai Nuan ti diau dalam pengudus enggau mulia. Kini ke tunga penyiru Nuan ke kami? Kini ke tunga kuasa Nuan? Kini ke tunga pengerindu enggau penyiru Nuan? Anang enda ibuhka kami,

¹⁶laban Nuan endang Apai kami. Aki kami Abraham enggau Jakop enda ngelala kami, tang Nuan, TUHAN, endang Apai kami, ke nebus kami.

¹⁷Nama kebuah Nuan nejuka kami limpang ari jalai Nuan? Nama kebuah Nuan ngasuh kami balat kieh, datai ke kami nyau ninggalka Nuan? Pulai ngagai kami baru, ketegal sida ke betuaika Nuan, ketegal orang ke endang seruran enggi Nuan.

¹⁸Kami, bala nembiak Nuan ti kudus tu, udah diburu bala munsuh kami enda lama. Sida udah ngelunjak endur Nuan ti kudus.[72]

¹⁹Nuan ngaga kami baka orang ke nadai udah kala diperintah Nuan, baka ke nadai udah kala nyadi nembiak Nuan.