Read Iban Isaiah 65 Bible Online

Isaiah 65 - Iban bible

Isaiah 65

¹ Ku TUHAN bejaku, “Aku sedia deka nyaut sampi bala nembiak Aku, tang sida enda besampi. Aku sedia minta Diri ditemu sida, tang sida enda ngiga Aku. Orang Israel enda besampi ngagai Aku, taja pen Aku endang seruran sedia deka nyaut, ‘Tu Aku ditu. Tu Aku ditu.’

² Aku endang seruran sedia deka nerima bala nembiak Aku, ti seruran kieh deka ngereja utai ti salah, lalu nitihka jalai sida empu.

³Sida enda nemu malu ke diri ke seruran nyungkak Aku ringat. Sida ngenjuk piring ba kebun petara orang kapir lalu nunu menyan ba alta petara nya.

⁴Lebuh malam hari sida mansang ngagai lubang gua enggau ngagai lumbung, deka betanyaka utai ngagai roh orang ke udah mati. Sida makai dagin babi lalu ngirup kuah ti digaga ari dagin ti udah diberi nyadika piring ngagai petara orang kapir.

⁵Udah nya sida lalu nyebut ngagai orang bukai, ‘Anang semak kami. Kami tu kudus lalu enda tau ditegu kita!’ Aku enda tan meda orang ke baka nya. Aku ringat ngagai sida baka api ti enda nemu padam.

⁶“Aku endang udah ngeletak ukum ke sida, lalu ukum sida udah ditulis. Aku enda tau enda ibuhka utai ti udah dikereja sida, lalu deka malas sida

⁷ketegal dosa sida enggau ketegal dosa aki ini sida. Sida udah nunu menyan ba rumah sembiang orang kapir ba atas munggu, lalu udah bejaku jai pasal Aku. Nya alai Aku deka ngukum sida nitihka utai ti udah dikereja sida.”

⁸Ku TUHAN bejaku, “Orang enda ngerusak buah anggur ti manah, tang sida ngena buah nya begagaka wain. Aku pen enda mega ngerusak semua nembiak Aku - Aku deka nyelamatka sida ke betuaika Aku.

⁹Aku deka merekatka orang Israel ke ari raban bansa Judah, lalu peturun sida deka bempu menua Aku ti bebukit. Bala nembiak ke dipilih Aku, ke betuaika Aku, deka diau dia.

¹⁰ Sida deka nyembah Aku lalu deka nguluka jelu bedus enggau jelu sapi sida ngagai padang rumput ba Emperan Saron di barat enggau ba Emperan Penusah di timur.

¹¹“Tang utai ti lain agi ari nya deka nyadi ba kita ke udah ninggalka Aku, ke nulak Sion, bukit Aku ti kudus,[75] lalu nyembah Gat seduai Meni, iya nya petara penguntung enggau nasit.

¹²Kita deka mati dibunuh orang, laban kita enda nyaut lebuh Aku ngangauka kita, lalu kita enda mending lebuh Aku bejaku. Kita endang sengaja enggai ngasika Aku lalu kita ngereja penyai.

¹³Nya alai Aku madahka ngagai kita, orang ke nyembah sereta ngasika Aku deka mayuh utai diempa enggau utai diirup, tang kita deka lapar sereta aus. Sida deka diau lantang, tang kita deka dipechat.

¹⁴Sida deka belagu gaga ati, tang kita deka nyabak tusah ati.

¹⁵Nembiak ti udah dipilih Aku deka ngena nama kita nyadika leka jaku sumpah.[76] Aku TUHAN ti Pemadu Tinggi, deka munuh kita. Tang Aku deka meri nama ti baru ngagai orang ke ngasika Aku.

¹⁶Barang sapa minta berekat di menua tu, deka minta diri diberekatka Allah Taala ti tetap ati. Barang sapa besumpah, deka besumpah atas nama Allah Taala ti tetap ati. Penusah ti dulu kelia nadai agi nyadi, lalu enda agi dikingatka.

¹⁷ Ku TUHAN bejaku, “Aku ngaga langit ti baru enggau dunya ti baru. Semua utai ti lama, enda agi dikingatka.

¹⁸Lantang lalu rami gaga belama iya meh kita, ke utai ti digaga Aku. Jerusalem ti baru, ti digaga Aku deka gaga ati, lalu orang ke diau dalam iya deka lantang.

¹⁹ Aku Empu deka gaga ati ketegal Jerusalem enggau nembiak iya. Orang dia nadai nyabak agi, tauka kaung-kaung ngangau minta tulung.

²⁰Anak mit enda mati lebuh sida agi mit, lalu semua orang deka gayu-guru magang. Sida ke manggai seratus taun, deka dikumbai agi biak. Enti sida mati sebedau nya, nya tanda Aku udah ngukum sida.

²¹Orang deka ngaga rumah lalu diau dia. Rumah nya enda diuan orang bukai. Sida deka bekebun anggur lalu ngelantangka diri ngirup wain. Wain nya enda diirup orang bukai. Nembiak Aku deka idup panjai umur baka kayu. Sida deka lantang ati bekenaka utai ti udah ulih sida.

²³Pengawa sida deka mujur, lalu bala anak sida enda dituntung penusah. Aku deka merekatka sida, enggau peturun sida belama iya.

²⁴Indah sebedau sida badu besampi ngagai Aku, deh Aku deka nyaut sampi sida.

²⁵ Ukui kampung enggau anak domba deka begulai makai. Jelu singa deka makai rumput baka sapi, lalu ular enda agi mantuk. Nadai utai ti tau ngemedis tauka jai bisi di Sion, bukit Aku ti kudus.[77]