Read Iban Isaiah 66 Bible Online

Isaiah 66 - Iban bible

Isaiah 66

¹ Ku TUHAN bejaku, “Serega nya kerusi diraja Aku, lalu dunya nyadika pelasar kaki Aku. Nya alai baka ni ku gaya rumah ti deka digaga kita ke Aku? Baka ni ku gaya endur alai Aku deka diau?

²Aku Empu ke ngaga langit enggau dunya! Aku rinduka orang ke baruh ati sereta nesal ati ke dosa sida, ke nangi sereta ngasika Aku.

³“Orang mayuh ngereja utai ti dikedekaka sida. Ba sida, pengawa bebunuhka sapi ti lelaki nyadika piring, tauka munuh mensia nyadika piring, nyayat anak domba tauka matahka rekung ukui, ngenjuk piring tepung tauka piring ari darah babi, meri menyan tauka besampi ngagai engkeramba, semua pengawa nya sebaka magang. Sida rindu besembah ngena jalai ti jai.

⁴Nya alai Aku deka ninggang sida ngena penusah ti besai, iya nya utai ti endang diketakutka sida, laban nadai siku sida nyaut lebuh Aku ngangau, tauka mending lebuh Aku bejaku. Sida endang sengaja enggai ngasika Aku, tang ingin deka ngereja penyai.”

⁵Pendingka utai ti disebut TUHAN, kita ke nangi sereta ngasika Iya. “Laban kita tetap ati ngagai Aku, sekeda bala kita empu deka begedika kita, lalu enggai begulai enggau kita. Sida ngeleseka kita lalu nyebut, ‘Awakka TUHAN ngayanka pemesai kuasa Iya lalu nyelamatka kita, ngambika kami meda lalu rami gaga.’ Tang sida empu deka dipechat!

⁶Pendingka ulih kita! Utai ti inggar bemunyi di nengeri, utai ti bemunyi dalam Rumah Sembiang, nya munyi TUHAN ngukum bala munsuh Iya!

⁷ “Nengeri Aku ti kudus nyau baka indu ke ngenyit beranak tang enda radai.

⁸Kati bisi orang udah kala meda, tauka ninga utai ti baka nya? Kati bansa bisi udah kala didirika dalam sehari? Sion enda ibuh lama merinsa nganti bansa orang Israel ada.

⁹Anang ngumbai Aku deka ngadaka nembiak Aku, lalu enda nyadi ngadaka sida.” TUHAN udah bejaku.

¹⁰Rami gaga ati meh kita enggau Jerusalem. Awakka kita gaga ati ke iya semua kita ke rinduka nengeri tu! Rami gaga ati enggau iya diatu, semua kita ke udah ngulitka iya!

¹¹Kita deka ngelantangka diri ngena pengaya iya, baka anak mit ke nusu ba indai iya.

¹²Ku TUHAN bejaku, “Aku deka ngasuh kita kaya-raja belama iya. Pengaya ari semua bansa deka diberi Aku ngagai kita baka sungai ti enda nemu langkang. Kita deka nyadi baka anak mit ke ditusuka indai iya, dikerendut indai iya, lalu diibun enggau pengerindu.

¹³Aku deka merindang kita ke diau di Jerusalem, baka indai ke merindang anak diri.

¹⁴Lebuh kita meda utai tu nyadi, kita deka gaga ati, lalu utai nya deka ngasuh kita kering sereta bepengerai. Nya baru kita deka nemu Aku ti TUHAN nulung orang ke ngasika Aku, lalu Aku ngayanka pengeringat Aku ngagai bala munsuh Aku.”

¹⁵TUHAN deka datai dalam api. Iya deka nepan sayap kabut, deka ngukum sida ke dikeringatka Iya.

¹⁶Iya deka ngukum ngena api enggau pedang semua mensia ti ditemu Iya salah di dunya tu, lalu mayuh sida deka dibunuh.

¹⁷Ku TUHAN bejaku, “Semua orang ke ngudus lalu nuchi diri deka nyembah engkeramba, ke bejalai bebala mayuh ngagai kebun petara sida, enggau orang ke bepakaika dagin babi enggau tikus enggau pemakai bukai ti kamah, deka lesap magang.

¹⁸Aku nemu runding enggau utai ti dikereja sida, lalu Aku deka datai[78] lalu ngempuruka mensia ari semua bansa. Lebuh sida begempuru, sida deka meda utai ti dikereja kuasa Aku.

¹⁹Nya baru sida deka nemu Aku tu ke ngukum sida. “Tang Aku deka ngalau sekeda sida lalu ngirumka sida ngagai mayuh bengkah bansa enggau menua ti ba tebing tasik, ti nadai kala ninga pasal Aku, tauka meda pemesai kuasa Aku; menua nya nyengkaum Spain, Libia,[79] enggau Lidia enggau bala nembiak iya ti landik nimbakka laja, enggau ngagai Tubal enggau ngagai menua Gerika. Sida deka madahka pemesai kuasa Aku ba semua bansa nya.

²⁰Sida deka mai semua nembiak nuan pulai baru ari semua bansa, nyadika pemeri ti diberi ngagai Aku. Sida deka mai nembiak Aku ngagai bukit Aku ti kudus[80] di Jerusalem ngena kuda, keledai, enggau unta, enggau ngena kerita perang enggau kerita kuda, baka orang Israel ke mai piring tepung ngena sarang ti tuchi ngagai Rumah TUHAN.

²¹Aku deka milih sekeda sida nyadi imam enggau nyadi orang Lewi.

²² “Baka dunya ti baru enggau langit ti baru deka tan belama iya ulih kuasa Aku, baka nya meh peturun enggau nama nuan deka meruan belama iya.

²³Ba genap Gawai Anak Bulan enggau genap Hari Sabat, mensia ari semua bansa deka datai nyembah Aku ditu di Jerusalem,” ku TUHAN bejaku.

²⁴ “Lebuh sida angkat ari endur nya, sida deka tepedaka bangkai orang ke udah angkat ngelaban Aku. Ulat ti makai bangkai sida, enda nemu mati, lalu api ti nunu bangkai sida enda nemu padam. Semua orang deka geli meda bangkai sida.”