Read Iban Isaiah 7 Bible Online

Isaiah 7 - Iban bible

Isaiah 7

¹ Lebuh Raja Ahas anak Jotam, uchu Usiah, merintah di menua Judah, perang bisi nyadi. Raja Resin menua Siria, enggau Raja Pekah anak Remaliah ari menua Israel, nyerang Jerusalem, tang seduai iya enda ulih ngalahka nengeri nya.

²Lebuh raja menua Judah ninga berita bala soldadu menua Siria bisi di menua Israel, iya enggau semua nembiak iya balat amat takut. Sida getar-getar baka kayu ti beguyat laban ribut.

³Ku TUHAN bejaku ngagai Isaiah, “Bai anak nuan Sear Jasup,[8] lalu mansang ngagai Raja Ahas. Nuan deka nemu iya ba jalai raya ba endur alai tukang kain gawa, ba ujung parit ti mai ai ari telaga ti di atas.

⁴Asuh iya bejaga, sereta enda irau ati, enda takut tauka teguran. Pengeringat Raja Resin enggau bala orang Siria, enggau bala Raja Pekah enda ulih ngasuh bebadi baka asap ti pansut ari dua iti rangkang ti diempa api.

⁵Menua Siria, enggau menua Israel enggau raja menua Israel, udah bepekat

⁶deka nyerang menua Judah, ngemba orang Judah ngambika sida ngalih ari sida, lalu udah nya nyiri anak lelaki Tabeel nyadi raja.

⁷“Tang Aku ti TUHAN madahka utai tu enda ulih nyadi.

⁸Nama kebuah? Laban Siria enda kering agi ari Damaskus, indu nengeri iya empu, lalu Damaskus enda kering agi ari Raja Resin. Nyadi pasal Israel, dalam kandang enam puluh lima taun, iya deka balat rusak, lalu enda ulih nyadi siti bansa.

⁹Israel enda kering agi ari Samaria, indu nengeri iya empu, lalu Samaria enda kering agi ari Raja Pekah. “Enti pengarap kita enda tan, kita empu enda ulih tan.”

¹⁰TUHAN ngirumka siti agi pesan ngagai Ahas:

¹¹“Pinta siti tanda ari TUHAN Allah Taala nuan. Nuan tau minta tanda nya datai ari buntut dunya pemati, tauka ari endur ti tinggi di serega.”

¹²Disaut Ahas, “Aku enggai minta tanda, laban aku enggai nguji TUHAN.”

¹³Isaiah lalu nyaut, “Pendingka diatu, kita ke peturun Raja David. Kita udah ngabas pengeliat ati mensia. Kati kita deka mega ngabas pengeliat ati Allah Taala?

¹⁴ Diatu TUHAN Empu deka meri kita siti tanda: siku indu dara[9] deka ngandung lalu ngadaka anak lelaki siku, lalu iya deka meri anak mit nya nama ‘Imanuel.’[10]

¹⁵Iya deka beridup ba ai tusu enggau ai manyi [11] lebuh iya nyau nemu nyeliahka utai ti jai lalu milih utai ti manah.

¹⁶Laban sebedau anak mit nya nemu nyeliahka utai ti jai lalu milih utai ti manah, menua ti diperintah dua iku raja ti balat diketakutka kita deka puang nadai orang nguan.

¹⁷“TUHAN deka ngasuh raja menua Asiria datai, lalu nuan, bala nembiak nuan, enggau semua bala sida raja sebilik, deka natka penusah ti lebih besai agi ari penusah ti udah kala nyadi kenyau ari maya perintah Israel enggau perintah Judah pechah.

¹⁸“Lebuh maya nya ila, TUHAN deka ngensung kena Iya manggil orang Ejip datai baka lalat ari pati Sungai Nile ti pemadu jauh, enggau kena manggil orang Asiria datai ari menua sida baka manyi.

¹⁹Sida deka datai lalu inggap ba sebelah lebak, enggau dalam lubang batu, lalu sida deka inggap ba semua madang duri, enggau semua padang rumput.

²⁰“Lebuh maya nya ila, TUHAN deka ngaji siku tukang guntin ari seberai Sungai Eupratis, iya nya raja menua Asiria! Lalu raja nya deka ngukur ragum kita, enggau buk ti ba pala enggau ba tubuh kita.

²¹“Lebuh maya nya ila, enti orang bumai ulih ngalau siku sapi ti indu enggau dua iku kambin,

²²jelu nya deka meri iya ai tusu lebih ari ti chukup ke iya. Genap iku orang ke agi idup di menua tu deka beridup ba ai tusu enggau ai manyi.

²³“Lebuh maya nya ila, kebun anggur ti manah, ti ngundan seribu pun anggur dalam sebidang, ti berega seribu singkap pirak, deka alah laban madang duri enggau randau.

²⁴Orang deka ngasu ba endur nya ngena panah enggau laja. Semua menua tu deka penuh laban randau enggau madang duri.

²⁵Semua munggu ti udah alai betanamka utai, deka alah laban madang duri, datai ke orang enggai agi kia. Menua tu deka nyadi endur alai jelu sapi enggau bedus ngulam.”