Read Iban Isaiah 8 Bible Online

Isaiah 8 - Iban bible

Isaiah 8

¹Ku TUHAN bejaku ngagai aku, “Ambi sesingkap batu-tulis ti besai, lalu tulis ngena urup ti besai [12] ba batu-tulis nya: ‘Jampat Dichuri, Jampat Dirampas.’

²Pesanka dua iku orang ke tau dikarapka, Imam Uriah enggau Sekariah anak Jeberekiah, nyadika saksi.”

³Enda tentu lama udah bekau nya, bini aku ngandung. Lebuh anak lelaki kami duai ada, TUHAN bejaku ngagai aku, “Beri iya nama ‘Jampat Dichuri Jampat Dirampas.’

⁴Sebedau anak mit nya nemu nyebut ‘Indai’ enggau ‘Apai,’ semua pengaya Damaskus enggau semua perapasan ari Samaria deka ditabanka raja menua Asiria.”

⁵TUHAN bejaku ngagai aku baru.

⁶Ku Iya, “Laban orang tu udah nulak ai ti enda beriak di Sungai Siloah[13] lalu getar-getar [14] di mua Raja Resin enggau Raja Pekah,

⁷Aku, TUHAN, deka mai raja menua Asiria enggau semua bala soldadu iya nyerang menua Judah. Sida deka nyerang baka ai bah ti ngampuhka tebing Sungai Eupratis.

⁸Sida deka ngelanggar menua Judah baka bah ti datai ba tandan bau lalu ngampuhka semua utai.” Allah Taala bisi enggau kitai! Sayap Iya ngerembai nyaga menua tu.[15]

⁹Begempuru enggau ati ti nangi kita semua bansa! Anang enda mending, kita menua ti jauh. Sediaka diri belaban, tang kita mesti takut! Sigi amat, sedia, tang kita mesti takut!

¹⁰Gaga meh pelan kita! Tang pelan nya enda ulih mujur. Bejaku meh kita enggau sepeneka ati kita! Tang jaku kita nya nadai guna, laban Allah Taala bisi enggau kami.

¹¹Ngena kuasa Iya ti besai TUHAN meri aku jaku tangkan, enda nyagi aku niti jalai ti ditengah orang mayuh. Ku Iya,

¹² “Anang bepekat enggau orang mayuh, lalu anang nangika utai ti dikenangika sida.

¹³Ingat: Aku TUHAN ti Pemadu Bekuasa endang kudus. Nuan enda tau enda nangika Aku.

¹⁴ Laban Aku endang amat kudus, Aku nyadi baka batu ti ngasuh orang tesangkut. Aku baka panjuk ti deka nyintak orang ari menua Judah enggau menua Israel, enggau orang Jerusalem.

¹⁵Mayuh orang deka tesangkut. Sida deka rebah, lalu alah. Sida deka disintak panjuk.”

¹⁶Kita ke murid aku enda tau enda nyaga sereta nyimpan semua pesan ti udah diberi Allah Taala ngagai aku.

¹⁷ TUHAN udah ngelalaika Diri ari bala nembiak Iya, tang aku arapka Iya, lalu manggaika pengadang aku ba Iya.

¹⁸ Tu aku enggau bala anak ke diberi TUHAN ngagai aku. TUHAN ti Pemadu Bekuasa, ti diau ba Bukit Sion, udah ngirumka kami nyadi pesan ti idup ngagai orang Israel.

¹⁹Tang orang deka ngasuh kita minta pesan ari orang ke tau tujum, enggau ari manang ke enchiap sereta muchau. Sida deka nyebut, “Orang patut betanyaka pesan ari bala antu, enggau ari orang ke udah mati, ngarika orang ke agi idup.”

²⁰Kita enda tau enda nyaut sida munyi tu, “Pendingka utai ti diajar TUHAN ngagai kita. Anang mendingka orang ke tau tujum; laban utai ti dipadahka sida ngagai kita enda ulih nyeliahka penusah ari kita.”

²¹Orang mayuh deka bejalai segau-segau nengah menua tu, lemi semengat sereta lapar. Lebuh sida lapar sereta ringat, sida deka nyumpah raja sida, enggau Allah Taala sida. Sida nyangka engkadah ke langit

²²tauka genung-genung merening ngagai tanah, tang sida nadai meda utai bukai kelimpah ari penusah enggau pemetang ti balat ngenakutka, endur alai sida deka dibuai.