Read Iban Isaiah 9 Bible Online

Isaiah 9 - Iban bible

Isaiah 9

¹ Sida nadai jalai ngerarika diri ari maya penusah tu. Menua raban bansa Sebulun enggau Naptali udah sekali kena pechat, tang jemah ila menua nya deka dibasa, berengkah ari Tasik Tengah nyentuk ngagai menua ti di timur Sungai Jordan, enggau ngagai menua Galili empu, ti alai orang kampar diau.

² Orang ke bejalai dalam petang udah meda penampak ti besai. Sida diau di menua pemetang, tang diatu penampak manchar ngagai sida.

³Nuan udah ngasuh sida balat gaga,[16] TUHAN. Nuan udah ngasuh sida lantang ati. Sida rami gaga ke utai ti udah dikereja Nuan, baka orang ke rami gaga lebuh sida ngetau gandum tauka lebuh sida bedua perapasan.

⁴Laban Nuan udah matahka kungkung ti nating sida enggau tungkat ti malu bau sida. Nuan udah ngalahka bansa ti nekanka pengidup sereta ngambi ulih ba nembiak Nuan, baka Nuan ti ngalahka bala soldadu orang Midian dulu kelia.

⁵Kasut bala soldadu ti datai nyerang enggau semua gari sida ke dibalut darah deka dirusak ngena api.

⁶Siku anak mit udah ada ke kitai! Siku anak lelaki udah diberi ngagai kitai! Lalu iya deka nyadi raja kitai. Iya deka dikumbai “Penyaup ti Badas,” “Allah Taala ti Bekuasa,” “Apai ti Meruan belama iya,” “Raja Pemaik.”

⁷ Kuasa diraja iya deka majak mansang. Perintah iya deka seruran bisi pemaik. Iya deka megai perintah nganti Raja David, nudukka kuasa iya ba atur ti ngena sereta lurus, kenyau ari diatu nyentuk ngagai pengujung dunya. TUHAN ti Pemadu Bekuasa endang mutus ati deka ngereja semua utai tu.

⁸TUHAN udah ngeletak ukum ke perintah menua Israel, iya nya peturun Jakop.

⁹Semua orang Israel, genap iku orang ke diau di nengeri Samaria, deka nemu TUHAN udah ngereja utai tu. Diatu sida iya sumbung sereta tinggi ati. Ku sida,

¹⁰“Rumah ti digaga ari batu bata, udah runtuh, tang kami deka nganti rumah nya ngena rumah ti digaga ari batu. Tiang ti digaga ari kayu sikamur udah ditebang, tang kami deka nganti tiang nya ngena kayu sidar ti pemadu manah.”

¹¹TUHAN udah nyungkak munsuh [17] nyerang sida.

¹²Siria di timur enggau Pilistin di barat udah merangapka nyawa deka nelan Israel. Tang TUHAN mengkang ringat. Jari Iya agi mengkang dikedarka Iya laban Iya deka ngukum.

¹³Orang Israel apin nesal ati. Taja pen TUHAN ti Pemadu Bekuasa udah ngukum sida, sida mengkang enggai pulai baru ngagai Iya.

¹⁴Dalam sehari aja TUHAN deka ngukum bala tuai bansa enggau orang Israel empu. Iya deka mumpung pala lalu netak iku sida.

¹⁵Bala orang ke tuai umur sereta dibasa orang, nya meh pala, lalu bala nabi ke meri ajar ti bula nya meh iku!

¹⁶Orang ke nguluka sida udah mai sida tesat, lalu nyarutka runding sida.

¹⁷Nya alai TUHAN enggai ngemendarka sida ke bujang ngerarika diri, lalu Iya enggai sinu ati ke indu ke balu, enggau orang ke nadai apai indai, laban semua orang bela enda arapka Allah Taala sereta jai, lalu semua utai ti disebut sida endang jai magang. Tang pengeringat TUHAN enda abis naka nya aja. Jari Iya mengkang dikedarka Iya laban Iya deka ngukum.

¹⁸Penyai orang mayuh nyelar baka api ti nganguska madang duri enggau madang emperingat. Iya menyadi baka api ti berasap makai rimba.

¹⁹Laban TUHAN ti Pemadu Bekuasa ringat, ukum Iya mau baka api ti nganguska semua menua tu, lalu munuh mensia, lalu genap iku kitai enda tau enda ngidupka nyawa diri.

²⁰Di semua endur dalam menua tu, orang ngerampas lalu makai sebarang sedak pemakai ti ditemu sida, tang sida mengkang lapar. Indah anak sida empu deh diempa sida!

²¹Orang ari menua Manasi enggau orang ari menua Epraim nyerang pangan diri, lalu sida sama nyerang Judah. Tang taja pia, TUHAN mengkang enda badu ringat. Jari Iya mengkang dikedarka deka ngukum.