Read Iban Adat Lewi 1 Bible Online

Adat Lewi 1 - Iban bible

Adat Lewi 1

¹TUHAN ngangauka Moses, lalu bejaku ngagai iya ari Langkau Kain TUHAN. Ku Iya,

²“Padahka ngagai orang Israel: Lebuh orang ari bala kita mai piring ngagai TUHAN, kita deka mai jelu sapi tauka bedus tauka kambin nyadika piring kita, ari raban jelu kita empu.

³Enti piring nya piring tunu, iya enda tau enda nyerahka siku sapi ti lelaki, ti nadai penimpang. Iya deka nyerahka jelu nya ba penama ngagai Langkau Kain TUHAN, ngambika iya diterima di mua TUHAN.

⁴Iya deka ngengkahka jari iya ba pala jelu ti diserahka nyadika piring tunu, lalu jelu nya deka diterima nyadika genselan kena muai dosa iya.

⁵Udah nya iya deka nyayat sapi nya di mua TUHAN, lalu bala anak lelaki Aron ti nyadi imam deka nyerahka darah jelu nya ngagai TUHAN, lalu ngunsaika darah nya ngagai semua empat iti tisi alta nya, ti ba penama ngagai Langkau Kain TUHAN.

⁶Lalu orang nya deka niti kulit jelu nya, lalu ngelampang isi iya,

⁷lalu bala anak lelaki Imam Aron deka ngengkahka bara api ba alta, lalu nugungka kayu ba atas bara api nya,

⁸lalu bala anak lelaki Aron ti nyadi imam deka nusun lampang jelu nya, pala enggau lemak iya ba atas kayu ti ba atas bara api ti ba alta nya.

⁹Tang orang nya deka masu semua perengka dalam, enggau kaki jelu nya. Lalu imam deka nunu semua piring nya ba alta, nyadika piring tunu, piring ti diberi ngena api, ti bebau rengut, ti ngerinduka ati TUHAN.

¹⁰Enti piring tunu nya ari raban jelu iya empu, nemuka nya jelu bedus tauka kambin, iya deka meri jelu ti lelaki ti nadai penimpang,

¹¹lalu iya deka nyayat jelu nya ba tisi utara alta nya di mua TUHAN, lalu bala anak lelaki Aron ti nyadi imam deka ngunsaika darah jelu nya ngagai semua empat iti tisi alta nya.

¹²Lalu iya deka ngelampang jelu nya, lalu imam deka ngengkahka lampang jelu nya, sama enggau pala sereta enggau lemak iya ba atas kayu ti ba atas bara api ti ba alta nya.

¹³Tang orang nya deka masu perengka dalam enggau kaki jelu nya. Lalu imam deka nyerahka semua piring nya, lalu nunu iya retung ba alta. Nya piring tunu, piring ti diberi ngena api, ti bebau rengut, ti ngerinduka ati TUHAN.

¹⁴Enti iya meri burung ngagai TUHAN nyadika piring tunu, iya meri burung puna tauka burung achang.

¹⁵Lalu imam nya deka mai burung nya ngagai alta lalu mulas sereta mutuska rekung burung nya, lalu nunu iya retung ba alta nya. Lalu darah burung nya deka ditejuka neritik ba tisi alta nya.

¹⁶Lalu iya deka muai kuman enggau bulu burung nya, lalu nibarka utai nya ngimbai tisi timur alta nya, ba endur alai ngengkahka amau.[1]

¹⁷Iya deka megai burung nya ba sayap, lalu nyarikka tubuh burung nya, tang enda mutuska tubuh burung nya. Lalu imam nya deka nunu burung nya retung ba alta nya, ba atas kayu ti ba atas bara api. Nya piring tunu, piring ti diberi ngena api, ti bebau rengut, ti ngerinduka ati TUHAN.