Read Iban Adat Lewi 10 Bible Online

Adat Lewi 10 - Iban bible

Adat Lewi 10

¹Dua iku anak lelaki Aron, ke benama Nadap enggau Abihu, lalu mai talam siti siku kena mai bara api, ngengkahka bara api ba kali nya, meri menyan ngagai bara api nya, lalu nyerahka utai nya ngagai TUHAN. Tang api nya ukai api ti kudus, laban TUHAN apin ngasuh seduai iya meri utai nya.

²Tekala nya TUHAN lalu ngasuh api datai, lalu api nya nganguska seduai iya dia, di mua TUHAN.

³Udah nya Moses lalu bejaku enggau Aron, “Tu meh utai ti udah disebut TUHAN, lebuh Iya nyebut, ‘Semua orang ke betuaika Aku, enda tau enda masa pengudus Aku. Aku deka ngayanka mulia Aku ngagai bala nembiak Aku.’ ”[3] Tang Aron mengkang enda bemunyi.

⁴Moses lalu mesanka Misael seduai Elsapan anak Usil, aya Aron empu, lalu bejaku enggau seduai iya. “Datai kitu, lalu bai bangkai petunggal seduai tu ke luar ari Langkau Kain TUHAN, lalu engkahka seduai iya di luar kem.”

⁵Seduai nya datai, lalu megai gari bangkai orang ke dua iku nya, lalu mai bangkai nya ke luar ari kem nya, nitihka asuh Moses.

⁶Udah nya, Moses bejaku enggau Aron, sereta enggau ngagai anak lelaki iya ke benama Eleasar enggau Itamar, “Anang nejuka buk kita enda disugu, tauka nyarikka gari kita, kena ngayanka diri ngulit. Enti kita ngereja nya, kita deka mati, lalu TUHAN deka ringat ngagai semua orang Israel. Tang orang Israel ti bukai tau ngulitka seduai iya ke mati diempa api ti datai ari TUHAN.

⁷Anang pansut ari Langkau Kain TUHAN, enggai ke kita mati, laban kita udah diseraraka ngagai TUHAN ngena minyak tata TUHAN.” Sida lalu ngasika jaku Moses.

⁸Ku TUHAN bejaku ngagai Aron

⁹“Nuan, enggau bala anak lelaki nuan, enda tau tama ngagai Langkau Kain TUHAN udah bekau kita ngirup wain tauka ai ti bisa. Enti kita tama, kita deka mati. Adat tu enda tau enda dititihka semua serak peturun nuan.

¹⁰Kita enda tau enda ngelala utai ti diempu Allah Taala, enggau utai ti dikena mensia, utai ti tuchi, enggau utai ti enda tuchi.

¹¹Kita enda tau enda ngajar orang Israel semua adat ti udah diberi Aku ngagai kita nengah Moses.

¹² Ku Moses bejaku enggau Aron enggau ngagai dua iku anak lelaki iya ti agi idup, Eleasar seduai Itamar, “Ambi piring gandum, laluh ari pemakai ti udah diserahka ngagai TUHAN. Gaga roti ti enda beragi ngena utai nya, lalu empa roti nya ngimbai alta, laban piring nya kudus.

¹³Empa utai nya ba endur ti kudus. Utai tu endang ungkup ke kita enggau bala anak lelaki kita, diambi ari pemakai ti diserahka ngagai TUHAN. Tu utai ti udah diasuh TUHAN kereja aku.

¹⁴ Tang kita enggau ruang bilik kita tau makai isi dada enggau kaki belakang ti diserahka nyadika piring ti manah, ti diberi ngagai TUHAN ngarika bala imam. Kita tau makai utai nya ba endur ti tuchi. Piring nya udah diberi ngagai kita, enggau ngagai bala anak kita nyadika ungkup kita, ari piring pemaik ti diberi orang Israel.

¹⁵Sida deka mai kaki belakang, enggau isi dada, lebuh maya lemak nya diserahka nyadika piring ti diberi ngena api ngagai TUHAN. Utai nya diempu kita, enggau bala anak kita, belama iya, nitihka pesan TUHAN.”

¹⁶Moses lalu nanyaka pasal kambin ti nyadika piring pengampun dosa. Orang lalu madahka ngagai iya, utai nya udah ditunu. Iya lalu ringat ngagai Eleasar seduai Itamar, lalu ku iya nanya seduai iya,

¹⁷ “Nama kebuah seduai enda makai piring ti dikena muai dosa nya ba Langkau Kain TUHAN? Utai nya pemadu kudus, lalu TUHAN udah meri utai nya ngagai seduai, kena muai dosa orang mayuh.

¹⁸Laban darah jelu nya enda dibai ngagai Endur ti Pemadu Kudus dalam Langkau Kain TUHAN, nya alai seduai patut udah makai piring nya din, nitihka jaku aku.”

¹⁹Disaut Aron, “Kati TUHAN deka lantang ati enti aku udah makai piring pengampun dosa sehari tu? Bala orang mayuh udah nyerahka piring sida kena muai dosa sehari tu, lalu sida udah mai piring tunu, tang agi ga utai ti jai tu nyadi ba aku.”

²⁰Moses lalu puas ati lebuh iya ninga saut nya.