Read Iban Adat Lewi 11 Bible Online

Adat Lewi 11 - Iban bible

Adat Lewi 11

¹TUHAN meri adat tu ngagai Moses seduai Aron

²ke orang Israel. Kita tau makai jelu ti idup di darat

³ti belah tunjing, sereta ngunyah pemakai ti udah diluaka iya baru ari perut raya iya,

⁴tang kita enda tau makai jelu unta, jelu badger batu, tauka tikus belanda. Sida tu enda tau dikumbai tuchi. Sida amat ngunyah pemakai ti diluaka baru ari perut raya sida, tang tunjing sida enda belah.

⁷Anang makai babi. Sida tu enda tau dikumbai tuchi. Tunjing sida amat belah, tang sida nadai ngunyah pemakai ti diluaka baru ari perut raya sida.

⁸Anang makai jelu nya, tauka negu bangkai sida. Jelu nya enda tuchi.

⁹Kita tau makai semua ikan ti bisi pidin enggau tisik,

¹⁰tang semua utai ti idup dalam ai, ti nadai pidin, enggau nadai tisik, enda tau diempa.

¹¹Ikan ti baka nya dikumbai enda tuchi. Kita enda tau makai sida, tauka negu bangkai sida.

¹²Kita enda tau makai utai ti idup dalam ai, ti nadai pidin enggau nadai tisik.

¹³Tu burung ti enda tau diempa kita: lang, burung puk, menaul pipit, menaul punggu, kempat tiang, menaul rimba, kak; burung unta; burung tasik, burung undan, burung gurun, burung raya, burung ti makai but;[4] sengayan tauka kusing.

²⁰Semua indu utai ti bisi sayap enda tuchi magang,

²¹kelimpah ari sida ke nemu engkechit.

²²Kita tau makai buntak kaban, buntak malam, tauka buntak endar.

²³Tang semua utai ti mit, ti bisi sayap sereta ngerayap, enda tuchi magang.

²⁴Enti kita negu bangkai utai nya, kita enda tuchi nyentuk ngagai lemai: semua jelu ti betunjing, semadi meh tunjing sida bebagi, lalu sida ngunyah pemakai ti diluaka sida ari perut raya sida, enggau semua jelu ti bekaki empat ti bisi tapa. Enti kita ngesan bangkai jelu nya, kita enda tau enda masu gari kita, tang kita deka mengkang enda tuchi nyentuk ngagai lemai.

²⁹Chuik, tikus, chit, enggau tichak, sigi enda tuchi.

³¹Barang sapa negu sida, tauka negu bangkai sida, deka nyadi enda tuchi nyentuk ngagai lemai.

³²Lalu enti bangkai sida labuh ninggang utai, utai nya nyadi enda tuchi. Utai nya nyengkaum utai ti digaga ari kayu, gari, kulit jelu, tauka guni, enda milih nama guna utai nya. Utai nya enda tau enda disepuhka ngagai ai, tang iya mengkang enda tuchi nyentuk ngagai lemai.

³³Lalu enti bangkai sida labuh ngagai periuk tanah, semua utai ti dalam periuk tanah nya enda tuchi magang, lalu kita enda tau enda mechahka periuk nya.

³⁴Pemakai ti endang tau diempa, tang udah kena laban ai ti dibubuhka ari periuk nya, nyadi enda tuchi, lalu sebarang utai irup dalam periuk nya, nyadi enda tuchi.

³⁵Semua utai ti ditinggang bangkai, nyadi enda tuchi. Dapur tanah, tauka dapur besi, enda tau enda dipechahka,

³⁶tang mata ai, tauka tangki ai, deka mengkang tuchi, taja pen semua utai bukai ti negu bangkai sida nyadi enda tuchi.

³⁷Enti bangkai sida labuh ngagai leka benih ti deka ditanam, leka benih nya mengkang tuchi.

³⁸Tang enti leka benih nya benung direndam dalam ai, lalu bangkai utai nya labuh ngagai leka benih nya, leka benih nya nyadi enda tuchi.

³⁹Enti jelu ti tau diempa mati, orang ke negu bangkai jelu nya nyadi enda tuchi nyentuk ngagai lemai.

⁴⁰Lalu enti kita bisi makai sebarang perengka tubuh jelu nya, kita enda tau enda masu gari kita, tang kita deka mengkang enda tuchi nyentuk ngagai lemai. Kita ti udah mai bangkai utai nya enda tau enda masu gari kita, tang kita deka mengkang enda tuchi nyentuk ngagai lemai.

⁴¹Kita enda tau makai jelu ti mit ti bejalai ba tanah,

⁴²nemuka sida nya ngerayap, tauka bejalai ngena kaki empat, tauka mayuh kaki.

⁴³Anang makai utai nya laban nya ngasuh kita enda tuchi.

⁴⁴ Aku tu TUHAN Allah Taala kita, lalu kita enda tau enda kudus, laban Aku kudus.

⁴⁵Aku tu TUHAN ti mai kita pansut ari menua Ejip, ngambika Aku nyadi Allah Taala kita. Kita enda tau enda kudus, laban Aku kudus.

⁴⁶Nya alai, tu meh adat pasal jelu enggau burung, pasal semua utai ti idup dalam ai, enggau semua utai ti bejalai ba tanah.

⁴⁷Kita enda tau enda ngelala bagi utai ti tuchi enggau utai ti enda tuchi, bagi jelu ti tau diempa enggau ti enda tau diempa.