Read Iban Adat Lewi 12 Bible Online

Adat Lewi 12 - Iban bible

Adat Lewi 12

¹TUHAN meri adat tu ngagai Moses

²ke orang Israel. Indu ke ngadaka anak lelaki deka mengkang enda tuchi tujuh hari, sebaka enggau lebuh iya datai kain.

³ Ba hari ti kelapan, anak mit nya enda tau enda ditutus.

⁴Udah nya indu nya enda tau enda nganti tiga puluh tiga hari da agi baru iya deka badu agi begetah lalu nyadi tuchi. Iya enda tau negu utai ti kudus, tauka tama ngagai Langkau Kain TUHAN, sebedau iya tembu nuchi diri.

⁵Enti indu nya ngadaka anak indu, iya mengkang enda tuchi dalam kandang empat belas hari, baka ke datai kain. Enam puluh enam hari udah bekau nya, nya baru iya badu agi begetah lalu nyadi tuchi.

⁶Lebuh iya udah tembu nuchi diri, nemuka iya ngadaka anak lelaki, tauka anak indu, iya enda tau enda mai ngagai imam, ba penama ngagai Langkau Kain TUHAN, siku anak domba ti umur setaun, nyadika piring tunu, enggau siku burung puna, tauka burung achang, nyadika piring pengampun dosa.

⁷Imam nya deka nyerahka piring nya ngagai TUHAN, lalu ngereja pengawa kena muai pengutur indu nya. Nya baru indu nya nyadi tuchi. Tu meh utai ti enda tau enda dikereja indu, udah bekau iya beranak.

⁸ Enti indu nya enda ulih meri siku anak domba, iya enda tau enda mai dua iku burung achang tauka dua iku burung puna, siku nyadika piring tunu, lalu siku nyadika piring pengampun dosa, lalu imam nya deka ngereja pengawa kena muai pengamah ari indu nya, lalu indu nya deka nyadi tuchi.