Read Iban Adat Lewi 13 Bible Online

Adat Lewi 13 - Iban bible

Adat Lewi 13

¹TUHAN meri adat tu ngagai Moses seduai Aron.

²Enti orang bisi kuris ba kulit, tauka bisi pisa, tauka bisi isi ti kembai, ti tau nyadi siti penyakit kulit ti tau ngerampit, iya enda tau enda dibai ngagai imam ke ari peturun Aron.

³Imam nya deka meresa kuris nya, lalu enti bulu ba kuris nya udah bebali burak, lalu kuris nya baka ti dalam agi ari kulit ti ngelingi kuris nya, penyakit nya penyakit kulit ti tau ngerampit, lalu imam nya deka ngumbai orang nya enda tuchi.

⁴Tang enti kuris nya burak, lalu baka ke enda ngeruang dalam agi ari kulit ti ngelingi kuris nya, lalu bulu ba senentang nya pen enda mega bebali burak, imam nya deka nyeraraka iya ari orang mayuh enam hari.

⁵Imam nya deka meresa iya baru ba hari ti ketujuh, lalu enti, ba penemu imam nya, kuris nya mengkang enda berubah, lalu enda nangkir, iya deka nyeraraka iya ari orang mayuh tujuh hari da agi.

⁶Imam nya deka meresa iya baru ba hari ti ketujuh udah lepas nya, lalu enti kuris nya nyau nadai agi, lalu enda nangkir, iya deka ngumbai orang nya tuchi. Utai nya semina kuris aja. Orang nya enda tau enda masu gari diri, lalu nyadi tuchi.

⁷Tang enti kuris nya nyau nangkir udah bekau imam ke meresa iya, lalu ngumbai iya tuchi, iya enda tau enda betemu enggau imam nya baru.

⁸Imam nya deka meresa iya baru, lalu enti kuris nya udah nangkir, iya enda tau enda ngumbai orang nya enda tuchi. Penyakit nya penyakit kulit ti tau ngerampit.

⁹Enti orang bisi penyakit kulit ti tau ngerampit, iya enda tau enda dibai ngagai imam,

¹⁰lalu imam nya deka meresa iya. Enti kuris ti ba kulit iya nya udah ngasuh bulu ba senentang nya bebali burak, lalu penuh laban nanah,

¹¹penyakit nya penyakit kulit ti enda nemu gerai. Imam nya deka ngumbai orang nya enda tuchi. Iya enda ibuh diseraraka ari orang mayuh, laban iya endang nyata enda tuchi.

¹²Enti penyakit nya nyau nyelamar ba sebelah tubuh iya, kenyau ari punjung pala nyentuk ngagai ujung kaki,

¹³imam nya deka meresa iya baru. Enti imam nya nemu penyakit nya udah nyelamar ba sebelah tubuh orang nya, iya deka ngumbai orang nya tuchi. Enti semua kulit orang nya udah bebali burak magang, iya tuchi.

¹⁴Tang enti iya bisi kuris ti dilak-dilak ba tubuh iya, iya enda tuchi.

¹⁵Imam nya deka meresa iya baru, lalu enti iya tepedaka kuris ti dilak-dilak, iya deka ngumbai orang nya enda tuchi. Kuris ti ayan dilak-dilak nunjukka penyakit kulit ti tau ngerampit, lalu orang nya enda tuchi.

¹⁶Tang lebuh kuris nya gerai, lalu nyadi burak baru, orang nya enda tau enda betemu enggau imam.

¹⁷Imam nya deka meresa iya baru. Enti kuris nya udah bebali burak, orang nya tuchi, lalu imam nya deka ngumbai iya tuchi.

¹⁸Enti orang bisi pisa ti udah gerai

¹⁹lalu enti, udah bekau nya, litan pisa nya kembai tauka bebali mirah, iya enda tau enda betemu enggau imam.

²⁰Imam deka meresa iya, lalu enti endur nya baka ke ngeruang, lalu bulu ba senentang nya udah bebali burak, iya deka ngumbai orang nya enda tuchi. Penyakit nya penyakit kulit ti tau ngerampit, ti bepun ari pisa nya.

²¹Tang enti imam nya meresa utai nya, lalu nemu bulu ba senentang nya enda bebali burak, lalu endur nya enda ngeruang, tang puchat, imam nya deka nyeraraka iya ari orang mayuh tujuh hari.

²²Enti utai nya nangkir, imam deka ngumbai orang nya enda tuchi. Orang nya bisi penyakit.

²³Tang enti utai nya enda berubah gamal, lalu enda nangkir, utai nya semina litan pisa aja, lalu imam deka ngumbai iya tuchi.

²⁴Enti orang betu laban api, lalu isi ba senentang nya bebali burak, tauka mirah,

²⁵imam nya deka meresa iya. Enti bulu ba senentang nya udah bebali burak, lalu endur ba senentang nya baka ke ngeruang, nya nunjukka penyakit kulit ti tau ngerampit ti bepun ari betu nya, lalu imam deka ngumbai orang nya enda tuchi.

²⁶Tang enti bulu ba endur nya enda bebali burak, lalu endur ba senentang nya enda ngeruang, tang puchat, imam deka nyeraraka iya ari orang mayuh tujuh hari.

²⁷Imam deka meresa iya baru ba hari ti ketujuh, lalu enti utai nya nyau nangkir, utai nya penyakit kulit ti tau ngerampit, lalu imam deka ngumbai orang nya enda tuchi.

²⁸Tang enti petik nya mengkang enda berubah, lalu enda nangkir, tang puchat, utai nya ukai penyakit kulit ti tau ngerampit. Imam deka ngumbai iya tuchi, laban utai nya semina litan betu aja.

²⁹Lebuh lelaki tauka indu bisi kuris ba pala tauka ba dagu,

³⁰imam deka meresa utai nya. Enti utai nya baka ke ngeruang, lalu bulu ti ba senentang nya pirang sereta alus, nya penyakit kulit ti tau ngerampit, lalu iya deka ngumbai orang nya enda tuchi.

³¹Enti lebuh imam nya meresa orang nya, kuris nya baka ke enda ngeruang, tang nadai bulu ti menyana ba endur nya, imam deka nyeraraka iya ari orang mayuh tujuh hari.

³²Imam deka meresa kuris nya baru ba hari ti ketujuh, lalu enti kuris nya enda nangkir, sereta nadai bulu ti pirang ba endur nya, lalu endur nya baka ke enda ngeruang,

³³orang nya enda tau enda ngukur pala diri, kelimpah ari endur ti ngelingi kuris nya. Udah nya imam deka nyeraraka iya ari orang mayuh tujuh hari da agi.

³⁴Ba hari ti ketujuh udah bekau nya, imam deka meresa kuris nya baru, lalu enti kuris nya nadai udah nangkir, lalu baka ke enda ngeruang, iya deka ngumbai orang nya tuchi. Orang nya enda tau enda masu gari diri, lalu iya nyadi tuchi.

³⁵Tang enti kuris nya nangkir udah bekau iya dikumbai tuchi,

³⁶imam deka meresa iya baru. Enti kuris nya udah nangkir, iya enda ibuh begigaka bulu ti pirang. Orang nya endang terang enda tuchi.

³⁷Tang enti, dalam penemu imam nya, kuris nya apin nangkir, lalu bulu ti menyana bisi tumbuh ba endur nya, kuris nya udah gerai, lalu imam deka ngumbai orang nya tuchi.

³⁸Lebuh lelaki tauka indu bisi petik ti burak ba kulit iya,

³⁹imam deka meresa iya. Enti petik nya enda tentu burak, utai nya semina raing aja. Orang nya tuchi.

⁴⁰Enti bulu pala orang lelaki gugur di mua enggau di belakang, nya ukai reti iya enda tuchi.

⁴¹

⁴²Tang enti kuris ti mirah bisi ayan ba endur ti nadai buk, utai nya penyakit kulit ti tau ngerampit.

⁴³Imam deka meresa orang nya, lalu enti orang nya bisi kuris ti mirah,

⁴⁴imam deka ngumbai orang nya enda tuchi, laban penyakit kulit ti tau ngerampit bisi ba pala iya.

⁴⁵Enti orang bisi penyakit kulit ti tau ngerampit, orang nya enda tau enda ngena gari ti charik, nejuka buk diri enda disugu, mungkur mua diri di baruh, lalu ngangau, “Enda tuchi! Enda tuchi!”

⁴⁶Orang nya deka mengkang enda tuchi seagi-agi iya bisi penyakit nya, lalu iya enda tau enda diau ari luar kem, jauh ari orang bukai.

⁴⁷Lebuh gari bekuap[5] nemuka gari nya digaga ari bulu bedus tauka ari linin,

⁴⁸tauka kain linin, tauka kain ti digaga ari bulu bedus, tauka kulit jelu, tauka utai ti digaga ari kulit jelu bekuap,

⁴⁹enti kuap nya bechura gadung tauka mirah, nya bansa kuap ti tau ngerampit, lalu enda tau enda dipadahka ngagai imam.

⁵⁰Imam deka meresa utai nya, lalu nyimpan utai nya tujuh hari.

⁵¹Iya deka meresa utai nya baru ba hari ti ketujuh, lalu enti kuap nya udah nangkir, utai ti dirampit nya enda tuchi.

⁵²Imam deka nunu utai nya, laban nya kuap ti tau ngerampit, lalu enda tau enda dirusak ngena api.

⁵³Tang enti imam nya nemu kuap nya enda berampit, lebuh iya meresa utai nya,

⁵⁴iya deka ngasuh orang masu utai nya, lalu nyimpan utai nya tujuh hari da agi.

⁵⁵Udah nya iya deka meresa utai nya baru, lalu enti kuap nya nadai berubah chura, taja pen iya enda nyelamar, utai nya mengkang enda tuchi. Kita enda tau enda nunu utai nya, nemuka kuap nya makai di luar tauka di dalam.

⁵⁶Tang enti kuap nya nyau udah kurang agi, lebuh imam meresa utai nya, iya enda tau enda nyarikka endur ti alai kuap nya bejangkit ari gari tauka kulit nya.

⁵⁷Udah nya, enti kuap nya ayan baru, nya nunjukka kuap nya udah berampit baru. Orang ke bempu utai nya enda tau enda nunu utai nya.

⁵⁸Enti iya masu utai nya, lalu petik nya lenyau, iya enda tau enda masu utai nya baru. Nya baru utai nya deka nyadi tuchi.

⁵⁹Nya alai, tu meh adat pasal bekuap ti tau nyadi ba gari ti digaga ari bulu bedus, tauka ari linin, tauka ba kain linin tauka kain ti digaga ari bulu bedus, tauka ba sebarang utai ti digaga ari kulit jelu. Tu meh jalai ngaga pemutus penemu, nemuka utai nya tuchi tauka enda.