Read Iban Adat Lewi 14 Bible Online

Adat Lewi 14 - Iban bible

Adat Lewi 14

² adat pasal nuchi orang ke udah digeraika ari penyakit kulit ti tau ngerampit. Ba hari orang nya dikumbai tuchi, iya enda tau enda dibai ngagai imam,

³lalu imam deka mai orang nya ke luar ari kem nya, lalu meresa iya. Enti penyakit nya udah gerai,

⁴imam deka ngasuh orang nya mai dua iku burung ti tuchi, sama enggau serepik kayu sidar, siti tali ti mirah, enggau pating isop.

⁵Udah nya imam nya deka ngasuh siku ari burung nya dibunuh ba atas mangkuk ti digaga ari tanah, ti ngundan ai ti diambi ari mata ai.

⁶Iya deka ngambi burung ti kedua, lalu nyepuhka iya, sama enggau repik kayu sidar, tali ti mirah, enggau pating isop, ngagai darah burung ti dibunuh nya.

⁷Iya deka mechikka darah nya tujuh kali ngagai orang ke deka dituchi ari penyakit kulit nya, lalu udah nya, iya deka ngumbai orang nya tuchi. Iya deka ngelepaska burung ti agi idup nya terebai.

⁸Orang nya enda tau enda masu gari diri, ngukur semua buk iya, lalu mandi. Udah nya baru iya tuchi. Iya tau tama ngagai kem, tang iya enda tau enda diau ari luar langkau kain iya empu tujuh hari.

⁹Ba hari ti ketujuh, orang nya enda tau enda ngukur buk, ragum, bulu bansu, enggau semua bulu bukai ti ba tubuh iya. Iya enda tau enda masu gari diri, lalu mandi. Nya baru iya tuchi.

¹⁰Ba hari ti kelapan, orang nya enda tau enda mai dua iku anak domba ti lelaki, enggau siku anak domba ti indu ke umur setaun, ti nadai penimpang, dua kilogram tepung ti dichampur enggau minyak kana, enggau setengah butul minyak kana.

¹¹Imam deka mai orang nya enggau semua piring nya ngagai penama Langkau Kain TUHAN.

¹²Udah nya, imam deka ngambi siku ari anak domba ti lelaki nya, lalu nyerahka jelu nya, sama enggau setengah butul minyak, nyadika piring kena mayar ukum penyalah. Iya deka meri utai nya nyadika pemeri ti manah ngagai TUHAN, ke imam nya.

¹³Iya deka nyayat anak domba nya ba endur ti kudus, ba endur alai nyayat jelu ti diberi nyadika piring pengampun dosa enggau piring tunu. Iya enda tau enda ngereja nya, laban piring ti dikena mayar ukum penyalah, baka piring ti dikena muai dosa, nya endang enggi imam, lalu piring nya kudus.

¹⁴Imam deka ngambi sekeda darah anak domba nya, lalu malitka darah nya ngagai rambing pending kanan, tunjuk indu jari kanan, enggau ngagai tunjuk indu kaki kanan orang ke deka dikumbai tuchi.

¹⁵Imam deka ngambi minyak kana mimit, lalu nuang iya ngagai tapa jari kiba iya empu,

¹⁶nechalka tunjuk jari kanan iya ngagai minyak nya, lalu mechikka minyak nya tujuh kali dia di mua TUHAN.

¹⁷Iya deka ngambi minyak ti ba tapa jari iya mimit, enggau darah anak domba nya mimit, lalu malitka utai nya ngagai rambing pending kanan, tunjuk indu jari kanan, enggau ngagai tunjuk indu kaki kanan orang ke deka dikumbai tuchi.

¹⁸Iya deka ngengkahka teda minyak ti ba tapa iya ngagai pala orang nya. Nya meh chara iya ngereja pengawa nuchi orang nya.

¹⁹Udah nya imam deka ngenjuk piring pengampun dosa, lalu ngereja pengawa nuchi orang nya. Udah lepas nya, iya deka nyayat jelu nya nyadika piring tunu

²⁰lalu nyerahka piring nya sama enggau piring gandum, ba alta. Nya meh chara imam deka ngereja pengawa nuchi orang nya, lalu orang nya nyadi tuchi.

²¹Enti orang nya seranta, lalu enda ulih meri utai ti lebih ari nya, iya tau mai, kena nuchi diri, siku anak domba ti lelaki nyadika piring kena mayar ukum penyalah, pemeri ti manah ti diberi ngagai TUHAN, ke imam nya. Orang nya semina mai sekilogram tepung ti dichampur enggau minyak kana, nyadika piring gandum, enggau setengah butul minyak kana.

²²Iya mega enda tau enda mai dua iku burung achang tauka dua iku burung puna, siku nyadika piring pengampun dosa, lalu siku nyadika piring tunu.

²³Ba hari ti kelapan lebuh orang nya nuchi diri, iya enda tau enda mai burung nya ngagai imam, ba penama ngagai Langkau Kain TUHAN.

²⁴Imam deka ngambi anak domba, enggau minyak kana, lalu meri utai nya nyadika pemeri ti manah ngagai TUHAN, nyadi ungkup ke imam nya.

²⁵Iya deka nyayat anak domba nya, lalu ngambi darah iya mimit, lalu malitka darah nya ngagai rambing pending kanan, ngagai tunjuk indu jari kanan, enggau ngagai tunjuk kaki kanan orang nya.

²⁶Imam deka nuang minyak nya mimit ngagai tapa jari kiba iya empu

²⁷lalu ngena tunjuk ari jari kanan iya, iya deka mechikka minyak nya tujuh kali dia, di mua TUHAN.

²⁸Iya deka ngengkahka minyak nya mimit ba endur alai iya ti udah malitka darah nya tadi ngagai rambing pending kanan, ngagai tunjuk indu jari kanan, enggau ngagai tunjuk indu kaki kanan orang nya.

²⁹Teda minyak ti ba jari iya deka diengkahka iya ba pala orang nya. Nya meh chara imam nya ngereja pengawa nuchi orang nya.

³⁰Udah nya, iya deka meri siku ari burung achang nya

³¹nyadika piring pengampun dosa, lalu siku nyadika piring tunu, sama enggau piring gandum. Nya meh chara imam deka ngereja pengawa nuchi orang nya.

³²Tu adat ke orang ke bisi penyakit kulit ti tau ngerampit, ti enda ulih ngenjuk piring ti diberi baka selama, kena nuchi diri.

³³TUHAN meri ngagai Moses seduai Aron

³⁴adat tu ba pasal rumah ti bekuap. (Adat tu dikena lebuh orang Israel udah datai di menua Kanaan ti deka diberi TUHAN ngagai sida nyadika pesaka sida.) Enti orang nemu TUHAN udah ngasuh rumah iya bekuap, iya enda tau enda madahka utai nya ngagai imam.

³⁵

³⁶Imam deka ngasuh semua utai dipindahka ari rumah nya, sebedau iya meresa kuap nya, enggai ke semua utai dalam rumah nya dikumbai enda tuchi magang. Udah nya baru iya deka mansang ngagai rumah nya

³⁷lalu meresa kuap nya. Enti dinding nya baka ke bisi diempa petik ti gadung, tauka mirah,

³⁸iya deka ninggalka rumah nya, lalu ngunchi rumah nya tujuh hari.

³⁹Ba hari ti ketujuh, iya deka datai lalu meresa rumah nya baru. Enti kuap nya udah nyelamar,

⁴⁰iya deka ngasuh orang muai batu ti bekuap nya ngagai endur ti enda tuchi di luar nengeri nya.

⁴¹Udah nya, iya enda tau enda ngasuh semua dinding dalam rumah nya dikikis magang, lalu semua semin ti udah dikikis nya ditugungka ba endur siti ti enda tuchi, di luar nengeri nya.

⁴²Udah nya, batu bukai deka dikena nganti batu ti udah dibuai, lalu dinding nya disemin baru.

⁴³Enti kuap nya bisi ayan baru dalam rumah nya, udah bekau batu nya dibuai, lalu rumah nya udah dikikis, lalu disemin baru,

⁴⁴imam nya deka mansang lalu meresa utai nya baru. Enti kuap nya udah nyelamar, rumah nya enda tuchi.

⁴⁵Rumah nya enda tau enda dirubuh, lalu batu ari rumah nya, perengka kayu ari rumah nya, enggau semua semin iya, enda tau enda dibai pansut ari nengeri nya, ngagai siti endur ti enda tuchi.

⁴⁶Barang sapa tama ngagai rumah ti udah dikunchi, deka nyadi enda tuchi nyentuk ngagai lemai.

⁴⁷Barang sapa gali, tauka makai dalam rumah nya, enda tau enda masu gari diri.

⁴⁸Lebuh imam nya datai meresa rumah nya, lalu kuap nya nadai ayan baru, udah bekau rumah nya disemin baru, iya deka ngumbai rumah nya tuchi, laban kuap nya udah abis dibuai magang.

⁴⁹Kena nuchi rumah nya, iya deka ngambi dua iku burung, kayu sidar, siti tali ti mirah, enggau sepating isop.

⁵⁰Iya deka munuh siku ari burung nya atas mangkuk sigi ti digaga ari tanah, ti ngundan ai.

⁵¹Udah nya iya deka ngambi kayu sidar, pating isop, tali ti mirah, enggau siku burung ti agi idup, lalu nyepuhka semua utai nya ngagai darah burung ti udah dibunuh nya tadi, enggau ngagai ai nya. Iya deka mechik rumah nya tujuh kali.

⁵²Nya meh jalai iya nuchi rumah nya ngena darah burung, ai, burung ti agi idup, kayu sidar, pating isop, enggau tali ti mirah.

⁵³Udah nya, iya deka ngelepaska burung ti idup nya, ba padang di luar nengeri. Nya meh chara iya deka ngereja pengawa nuchi rumah nya, lalu rumah nya nyadi tuchi.

⁵⁴Tu adat pasal penyakit kulit ti tau ngerampit,

⁵⁵pasal kuris, pisa, bisul, enggau pasal kuap ti bisi ba gari, tauka rumah.

⁵⁶

⁵⁷Tu meh adat kena nemu enti utai nya enda tuchi, tauka tuchi.