Read Iban Adat Lewi 16 Bible Online

Adat Lewi 16 - Iban bible

Adat Lewi 16

¹Udah bekau anak lelaki Aron ke dua iku kena bunuh lebuh seduai iya meri api ti enda kudus ngagai TUHAN, TUHAN lalu bejaku ngagai Moses.

² Ku Iya, “Padahka ngagai menyadi nuan, Aron, iya tau tama ngagai Langkau Kain TUHAN di belakang tirai semina ba maya ti patut aja, laban endur nya alai Aku pegari dalam mua hari ari atas tudung Peti Lampang Batu Adat. Enti iya enda ngasi, iya deka dibunuh.

³ Iya semina tau tama ngagai Endur ti Pemadu Kudus lebuh iya udah mai siku sapi ti lelaki ti biak nyadika piring pengampun dosa, enggau siku bedus ti lelaki nyadika piring tunu.

⁴Sebedau Aron mansang ngagai Endur ti Pemadu Kudus, iya enda tau enda mandi, lalu ngerasukka pekayan imam, iya nya, baju panjai enggau tanchut pandak ti digaga ari kain linin, belulang, enggau labung.

⁵Orang Israel deka meri ngagai Aron dua iku kambin ti lelaki nyadika piring pengampun dosa, enggau siku bedus ti lelaki nyadika piring tunu.

⁶Iya deka meri siku sapi ti lelaki nyadika piring pengampun dosa ke iya empu, enggau ke sida sebilik.

⁷Udah nya iya deka mai kambin ti dua iku nya ngagai penama Langkau Kain TUHAN.

⁸Iya deka bechabut undi dia, ngena dua igi batu. Sigi dikelai ngena leka jaku “Ke TUHAN” lalu sigi “Ke Asasel”[6]

⁹Aron deka meri kambin ti diundi ke TUHAN, nyadika piring pengampun dosa.

¹⁰Kambin ti diundi ke Asasel deka diberi idup-idup ngagai TUHAN, lalu dilepaska di menua puang ngagai Asasel, ngambika iya nabanka dosa orang mayuh.

¹¹Lebuh Aron meri sapi ti lelaki nyadika piring pengampun dosa ke iya empu enggau ke sida sebilik,

¹²iya deka mai siti talam ti penuh laban bara api ari alta, enggau dua genggam menyan ti alus, lalu mai semua utai nya ngagai Endur ti Pemadu Kudus.

¹³Di mua TUHAN dia, iya deka nabakka menyan nya ngagai api nya, lalu asap menyan nya deka ngelalaika tudung Peti Lampang Batu Adat, ngambika Aron enda meda tudung nya, enggai ke iya mati.

¹⁴Iya deka ngambi sekeda darah sapi ti lelaki nya, lalu mechikka darah nya di mua tudung nya, lalu udah nya, mechikka darah nya tujuh kali di mua Peti Lampang Batu Adat nya.

¹⁵ Udah nya, iya deka nyayat kambin nya nyadika piring pengampun dosa ke orang mayuh, mai darah jelu nya ngagai Endur ti Pemadu Kudus, lalu mechikka darah nya ngagai tudung Peti Lampang Batu Adat, lalu udah nya, di mua Peti nya, baka chara iya ke ngena darah sapi.

¹⁶Nya meh chara iya nuchi Langkau Kain TUHAN ari pengamah orang Israel, enggau ari semua dosa sida. Iya enda tau enda ngereja nya ngagai Langkau Kain TUHAN, laban Langkau Kain nya bediri ba tengah-tengah kem ti enda tuchi nya.

¹⁷Kenyau ari maya Aron tama ngagai Langkau Kain TUHAN ngereja pengawa nuchi bansa, nyentuk ngagai maya iya pansut, orang nadai tau mengkang dalam Langkau Kain TUHAN. Lebuh iya udah ngereja pengawa nuchi diri empu, enggau sida sebilik, enggau semua orang Israel,

¹⁸iya enda tau enda pansut ngagai alta alai ti nunu piring, lalu nuchi alta nya. Iya enda tau enda mai sekeda darah sapi ti lelaki nya, enggau sekeda darah kambin, lalu malitka darah nya ngagai tanduk sukut alta nya.

¹⁹Iya enda tau enda mechikka darah nya ngena tunjuk iya tujuh kali ngagai alta nya. Nya meh chara iya nuchi alta nya ari dosa orang Israel, ngambika alta nya kudus.

²⁰Lebuh Aron udah tembu ngereja pengawa nuchi Endur ti Pemadu Kudus, enggau semua endur ti bukai dalam Langkau Kain TUHAN, enggau alta nya, iya deka meri ngagai TUHAN siku kambin ti idup, ti udah diundi ke Asasel.[7]

²¹Iya deka ngengkahka jari iya kedua piak ba pala kambin nya, lalu ngaku atas pala kambin nya semua penyai, dosa, enggau ulah orang Israel ke ngelaban TUHAN, ngambika mindahka semua utai nya ngagai pala kambin nya. Udah nya, kambin nya enda tau enda diburu ngagai menua puang, ulih orang ke udah dipaduka ngereja pengawa nya.

²²Kambin nya deka mai semua dosa sida ngagai endur ti nadai mensia.

²³ Udah nya, Aron deka tama ngagai Langkau Kain TUHAN, muka pekayan imam ti udah dikena iya sebedau iya tama ngagai Endur ti Pemadu Kudus, lalu ninggalka pekayan nya dia.

²⁴Iya enda tau enda mandi ba Endur ti Kudus, lalu ngerasukka gari iya empu. Udah nya, iya deka pansut lalu ngenjuk piring tunu, kena muai dosa iya empu, enggau dosa orang mayuh.

²⁵Iya deka nunu, ba alta nya, lemak jelu ti nyadika piring pengampun dosa.

²⁶Orang ke muru kambin nya ngagai Asasel di menua puang, enda tau enda masu gari diri, lalu mandi, sebedau iya tama ngagai kem.

²⁷ Sapi lelaki enggau kambin ti nyadika piring pengampun dosa, ti bempu darah ti udah dibai ngagai Endur ti Pemadu Kudus kena muai dosa, deka dibai ke luar ari kem nya, lalu ditunu. Kulit, isi, enggau perengka dalam jelu nya deka ditunu magang.

²⁸Orang ke nunu utai nya enda tau enda masu gari diri, lalu mandi, sebedau iya pulai ngagai kem.

²⁹ Adat tu enda tau enda dititihka belama iya. Kena sepuluh hari bulan ti ketujuh, orang Israel enggau orang bansa bukai ke diau begulai enggau sida, enda tau enda bepasa, lalu enda tau gawa.

³⁰Ba hari nya, Imam Besai deka ngereja pengawa nuchi orang mayuh ari semua dosa sida.

³¹Hari nya deka diintu nyadika hari ti amat kudus, hari sida bepasa lalu enda gawa. Adat tu enda tau enda dititihka belama iya.

³²Imam Besai, ti udah dichiri lalu diserahka ngagai TUHAN ngambika bisi nganti apai iya, deka ngereja pengawa nuchi orang ari semua dosa sida. Iya deka ngerasukka pekayan imam

³³lalu ngereja pengawa nuchi Endur ti Pemadu Kudus, endur bukai dalam Langkau Kain TUHAN, alta, bala imam, enggau semua orang Israel.

³⁴Adat tu enda tau enda dititihka belama iya. Pengawa tu enda tau enda dikereja sekali setaun, kena nuchi orang Israel ari dosa sida.” Nya alai Moses[8] ngereja utai ti diasuh TUHAN.