Read Iban Adat Lewi 17 Bible Online

Adat Lewi 17 - Iban bible

Adat Lewi 17

¹TUHAN ngasuh Moses

²meri adat tu ngagai Aron, enggau ngagai bala anak lelaki iya, enggau ngagai semua orang Israel:

³Enti orang Israel nyayat sapi, tauka bedus tauka kambin ari luar kem,

⁴lalu enda mai utai nya ngagai penama Langkau Kain TUHAN, ngambika utai nya diserahka nyadi pemeri ngagai TUHAN di mua langkau sembiang, orang nya ngelanggar adat. Iya udah ngasuh darah nyaya, lalu iya enda agi dikumbai nembiak Allah Taala.

⁵Tu reti pesan tu: ngelamatu orang Israel udah nyayat jelu di padang. Tang diatu sida enda tau enda mai jelu nya ngagai TUHAN. Sida deka mai jelu nya ngagai imam ba penama ngagai Langkau Kain TUHAN, lalu nyayat jelu nya dia nyadika piring pemaik.

⁶Imam nya deka ngunsaika darah jelu nya ngagai tisi alta ti ba penama ngagai Langkau Kain TUHAN, lalu nunu lemak jelu nya ngambika iya bebau rengut lalu ngerinduka ati TUHAN.

⁷Orang Israel enda tau enda tetap ati ngagai TUHAN, lalu badu agi nyayat jelu sida di padang nyadika piring ngagai antu kambin. Orang Israel enda tau enda nitihka atur tu belama iya.

⁸Enti orang Israel tauka orang kampar ti diau begulai enggau sida ngenjuk piring tunu, tauka piring bukai

⁹nyadika piring ti diberi ngagai TUHAN ba endur bukai kelimpah ari ba penama ngagai Langkau Kain TUHAN, sida deka badu agi dikumbai nembiak Allah Taala.

¹⁰ Enti orang Israel, tauka orang kampar ti diau begulai enggau sida, makai dagin ti agi bedarah, TUHAN deka ngelaban sida, lalu Iya deka badu agi ngumbai sida nembiak Iya.

¹¹ Seput semua utai ti idup endang dalam darah. Nya kebuah TUHAN udah bejaku ngasuh semua darah dituang magang ba alta, kena muai dosa orang mayuh. Darah, iya nya nyawa, muai dosa.

¹²Nya kebuah TUHAN udah madahka ngagai orang Israel, sida tauka orang kampar ti diau begulai enggau sida, enda tau makai dagin ti agi bedarah.

¹³Enti orang Israel, tauka orang kampar ke begulai enggau sida, nangkap jelu tauka burung ti enda tuchi, sida enda tau enda nejuka darah jelu nya neritik ke tanah, lalu ngelamun darah nya ngena tanah.

¹⁴Seput semua utai ti idup nya dalam darah sida. Nya kebuah TUHAN udah madahka ngagai orang Israel, sida enda tau makai dagin ti agi bedarah. Semua orang ke makai dagin ti agi bedarah, deka badu agi dikumbai nembiak Allah Taala.

¹⁵Barang sapa, nemuka iya nya orang Israel, tauka orang kampar, makai dagin ari jelu ti ditemu mati, tauka udah mati laban jelu babas, enda tau enda masu gari diri, mandi, lalu mengkang enda tuchi nyentuk ngagai lemai.

¹⁶Enti sida enda, sida deka betanggungjawapka penyalah nya.