Read Iban Adat Lewi 2 Bible Online

Adat Lewi 2 - Iban bible

Adat Lewi 2

¹Lebuh kita ngenjuk piring gandum ngagai TUHAN, kita enda tau enda ngaga piring nya ari tepung gandum ti alus. Kita enda tau enda ngengkahka minyak kana enggau menyan ba utai nya

²lalu mai iya ngagai bala anak lelaki Aron ti nyadi imam. Imam ke gawa dia deka ngambi segenggam tepung enggau minyak kana enggau menyan nya, lalu nunu utai nya retung ba alta, kena ngelai utai nya udah diberi ngagai TUHAN. Bau piring tunu nya deka ngerinduka ati TUHAN.

³Teda piring gandum nya deka diempu bala imam, lalu nya bagi ti pemadu kudus ari piring nya, laban iya diambi ari piring tunu, ti diberi ngagai TUHAN.

⁴Lebuh kita ngenjuk piring gandum ti dipanggang, piring nya enda tau enda digaga ari tepung ti alus. Kita tau meri roti ti enda beragi, ti dichampur enggau minyak kana, tauka roti ti mipis, ti enda beragi, dipalitka enggau minyak kana.

⁵Enti piring nya roti ti dipanggang ba papak besi, iya enda tau enda digaga ari tepung ti alus dichampur enggau minyak kana, tang enda dichampur enggau ragi.

⁶Peruk utai nya, lalu tuang minyak kana ngagai utai nya lebuh kita meri utai nya nyadika piring.

⁷Enti piring gandum nya dipanduk ngena kali, iya enda tau enda digaga ari tepung ti alus enggau minyak kana.

⁸Bai piring gandum nya ngagai TUHAN, lalu beri iya ngagai imam, ti deka mai iya ngagai alta.

⁹Imam deka ngambi piring gandum nya mimit nyadika tanda semua utai nya udah diberi ngagai TUHAN, lalu iya deka nunu piring nya retung ba alta. Bau piring tunu nya deka ngerinduka ati TUHAN.

¹⁰Teda piring gandum nya deka diempu bala imam, lalu nya bagi ti pemadu kudus ari piring nya, laban iya diambi ari piring tunu, ti diberi ngagai TUHAN.

¹¹Piring gandum ti diberi kita ngagai TUHAN, enda tau dichampur enggau ragi. Kita enda tau sekali-kali nunu ragi tauka ai manyi nyadika piring ngagai TUHAN.

¹²Piring ti digaga ari gandum ti terubah diketau kita tiap taun, deka dibai ngagai TUHAN, tang utai nya enda tau ditunu ba alta.

¹³Gerami enggau garam semua piring gandum, laban garam nandaka sempekat kita enggau Allah Taala. (Kita enda tau enda ngerami semua piring kita enggau garam.)

¹⁴Lebuh kita mai ngagai TUHAN piring ti digaga ari gandum ti terubah diketau kita, beri gandum ti udah digirau ba kali, tauka gandum ti udah dikisar.

¹⁵Tuang minyak kana, lalu geramika menyan ngagai piring nya. Piring nya piring gandum.

¹⁶Imam deka ngambi sebagi ari gandum ti udah dikisar nya, minyak kana, enggau semua menyan nya, kena ngelai utai nya udah nyadika piring tunu, ti diberi ngagai TUHAN.