Read Iban Adat Lewi 20 Bible Online

Adat Lewi 20 - Iban bible

Adat Lewi 20

¹Ku TUHAN bejaku ngagai Moses,

²“Sebut ngagai orang Israel: Enti kita orang Israel, tauka orang kampar ti diau begulai enggau kita, nyerahka anak diri ngagai petara Molek, orang nya deka dituku semua orang Israel ngena batu datai ke iya mati.

³Enti orang nyerahka anak iya ngagai Molek, lalu ngamahka Langkau Kain Aku ti kudus, sereta mechat nama Aku ti kudus, Aku deka ngelaban iya, lalu enggai agi ngumbai iya nembiak Aku.

⁴Lalu enti orang Israel enda bedulika utai ti udah dikereja iya, lalu enda munuh iya,

⁵Aku Empu deka ngelaban iya, sereta ngelaban semua sida sebilik, enggau ngelaban semua orang ke sama enggau iya enda tetap ati ngagai Aku, lalu nyembah Molek. Aku enggai agi ngumbai sida nembiak Aku.

⁶“Enti orang betanya ngagai orang ke bejaku enggau semengat orang ke udah mati, tauka betanya ngagai manang, Aku deka ngelaban iya lalu enda agi ngumbai iya nembiak Aku.

⁷Kita enda tau enda kudus, laban Aku tu TUHAN Allah Taala kita.

⁸Kita enda tau enda ngasika adat Aku, laban Aku tu TUHAN ti nguduska kita.

⁹ “Barang sapa nyumpah apai tauka indai diri, deka dibunuh. Kita empu deka betanggungjawapka pemati diri.

¹⁰ “Enti lelaki butang enggau bini orang Israel, lelaki enggau indu nya deka sama dibunuh.

¹¹ Lelaki ke beleman enggau siku ari bala bini apai iya, ngemaluka apai iya, lalu iya enggau indu nya deka sama dibunuh. Seduai iya deka betanggungjawapka pemati diri.

¹² Enti lelaki beleman enggau menantu indu iya, seduai iya deka sama dibunuh. Seduai iya udah ngereja seks ti salah, lalu seduai iya deka betanggungjawapka pemati diri.

¹³ Enti lelaki beleman enggau lelaki, seduai iya udah ngereja utai ti jai, lalu seduai iya deka sama dibunuh. Seduai iya deka betanggungjawapka pemati diri.

¹⁴ Enti lelaki jadi enggau indu, lalu jadi mega enggau indai indu nya, semua sida tiga nya deka ditunu datai ke mati, ketegal utai ti balat ngemalu ti udah dikereja sida. Utai ti baka nya enda tau ditejuka nyadi ba bala kita.

¹⁵ Enti lelaki beleman enggau jelu, iya enggau jelu nya deka sama dibunuh.

¹⁶Enti indu nguji beleman enggau jelu, iya enggau jelu nya deka sama dibunuh. Seduai iya deka betanggungjawapka pemati diri.

¹⁷ Enti lelaki jadi enggau menyadi indu diri, tauka menyadi-tiri diri, seduai iya deka dipechat di mua orang mayuh, lalu dibuai ari bansa orang Israel. Lelaki nya udah beleman enggau menyadi indu diri, lalu iya deka betanggungjawapka penyalah nya.

¹⁸ Enti lelaki beleman enggau indu ke datai kain, seduai iya deka sama dibuai ari bansa orang Israel, laban seduai iya udah ngelanggar adat pasal utai ti enda tuchi.

¹⁹ Enti lelaki beleman enggau ibu iya empu, seduai iya deka sama betanggungjawapka penyalah nya laban seduai iya udah ngereja seks ti salah.

²⁰Enti lelaki beleman enggau bini aya iya, iya ngemaluka aya iya, lalu iya enggau indu nya deka sama kena ukum. Seduai iya deka sama punas.

²¹ Enti lelaki ngambi bini menyadi diri, seduai nya deka mati punas. Lelaki nya udah ngereja utai ti enda tuchi, lalu udah ngemaluka menyadi iya empu.

²²Ku TUHAN bejaku, “Titihka semua adat enggau pesan Aku, ngambika kita enda ditulak menua Kanaan, alai Aku ti deka mai kita.

²³Anang nitihka adat asal orang ke diau di menua nya. Aku udah muru orang bansa bukai ari menua nya, ngambika kita tau tama ngagai menua nya. Sida udah ngasuh Aku keji laban semua penyai ti udah dikereja sida.

²⁴Tang Aku udah besemaya deka meri menua ti kaya sereta ami nya nyadika pesaka kita, lalu Aku deka meri menua nya ngagai kita. Aku tu TUHAN Allah Taala kita, lalu Aku udah nyeraraka kita ari semua bansa bukai.

²⁵Nya alai, kita enda tau enda ngaga bida entara jelu enggau burung ti tuchi ari sida ke enda tuchi. Anang makai jelu enggau burung ti enda tuchi. Aku udah ngumbai sida enda tuchi, lalu enti kita makai sida, utai nya deka ngasuh kita enda tuchi.

²⁶Kita deka nyadi kudus lalu diempu Aku siku aja, laban Aku tu TUHAN, lalu Aku tu kudus. Aku udah nyeraraka kita ari bansa bukai, ngambika kita diempu Aku siku aja.

²⁷“Lelaki tauka indu ke bejaku enggau semengat orang ke udah mati, deka dituku ngena batu datai ke mati. Barang sapa ngereja utai nya, deka betanggungjawapka pemati diri.”