Read Iban Adat Lewi 21 Bible Online

Adat Lewi 21 - Iban bible

Adat Lewi 21

¹Lalu ku TUHAN bejaku ngagai Moses, “Bejaku nuan ngagai sida imam, iya nya sida anak Aron, lalu sebut ngagai sida: Nadai siku sida tau ngaga diri enda tuchi ketegal kaban belayan diri ke mati,

²kelimpah ari indai, apai, anak lelaki, anak indu, menyadi lelaki,

³tauka menyadi indu ke apin belaki, ti diau dalam rumah iya.

⁴Iya enda tau ngaga diri enda tuchi ngena pengawa nyenggai kaban belayan ari bini iya.[16]

⁵ “Imam enda tau ngukur pala diri, tauka mipil ragum diri, tauka ngurik tubuh diri kena ngayanka diri ngulit.

⁶Iya enda tau enda kudus, lalu enda tau ngemaluka nama Aku, laban iya ngenjuk piring ti diberi ngena api ngagai Aku. Nya kebuah iya enda tau enda kudus.

⁷Imam enda tau jadi enggau indu ke udah nyundal, tauka enggau indu ke ukai dara bungas, tauka indu ke udah sarak ari laki iya, laban imam nya kudus.

⁸Orang mayuh enda tau enda ngumbai imam nya kudus, laban iya ngenjuk piring ti diberi ngena api ngagai Aku. Aku tu TUHAN. Aku tu kudus, lalu Aku nguduska bala nembiak Aku.

⁹Enti anak indu imam nyundal, iya ngemaluka apai iya. Iya enda tau enda ditunu datai ke mati.

¹⁰“Imam Besai udah ditata ngena minyak tata ti dituang ba pala iya, lalu udah diserahka ngagai TUHAN, ngambika iya tau ngena pekayan imam. Nya alai iya enda tau nejuka buk diri enda disugu, lalu enda tau nyarikka gari diri kena ngayanka diri ngulit.

¹¹Iya enda tau tama ngagai endur ti bisi bangkai; iya enda tau ngamahka diri empu ngintu bangkai apai tauka indai iya.

¹²Iya enda tau pansut ari Langkau Kain TUHAN, enggai ke iya ngamahka Langkau Kain TUHAN Allah Taala iya; laban iya udah ditata ngena minyak Allah Taala iya: Aku tu TUHAN.

¹³Iya semina tau jadi enggau indu ke dara bungas.

¹⁴Iya enda tau jadi enggau indu ke balu, tauka indu ke udah sarak, tauka udah nyundal. Iya enda tau enda jadi enggau indu dara bungas ari raban peturun iya empu.

¹⁵Enti enda, bala anak iya ke patut kudus, deka nyadi enda tuchi. Aku tu TUHAN, lalu Aku udah nyeraraka iya nyadi Imam Besai.”

¹⁶Ku TUHAN bejaku ngagai Moses

¹⁷“Sebut ngagai Aron: peturun nuan, ke tachat, enda tau ngenjuk piring ti diberi ngena api ngagai Aku. Adat tu deka dikena belama iya.

¹⁸Tu gaya orang ke tachat ti enda tau datai semak ngagai Aku: orang ke buta, orang ke enda ulih engkebut, ti enda menyana gamal, tauka menawa,

¹⁹ke patah kaki tauka jari,

²⁰tauka bungkuk, tauka pandak tasal, orang ke sakit mata tauka sakit kulit, tauka orang ke udah dipeliri.

²¹Peturun Imam Aron, ke bisi penimpang tubuh, enda tau ngenjuk piring ti diberi ngena api ngagai Aku. Laban iya bisi penimpang, iya enda tau datai semak lalu meri roti ngagai Allah Taala.

²²Iya tau makai roti Allah Taala, nyengkaum roti ti kudus, enggau roti ti pemadu kudus,

²³tang iya enda tau datai semak ngagai kain tirai tauka datai semak ngagai alta, laban tubuh iya bisi penimpang, enggai ke iya ngamahka Endur Aku ti Kudus, laban Aku tu TUHAN, ti nguduska utai nya.”

²⁴Nya meh utai ti disebut Moses ngagai Aron, ngagai bala anak lelaki Aron, enggau ngagai semua orang Israel.