Read Iban Adat Lewi 22 Bible Online

Adat Lewi 22 - Iban bible

Adat Lewi 22

¹Lalu ku TUHAN bejaku ngagai Moses,

²“Asuh Aron enggau bala anak lelaki iya bejimat enggau pemeri ti kudus ti diberi orang Israel ngagai Aku, ngambika sida enda mechat nama Aku ti kudus. Aku tu TUHAN.

³Sebut ngagai sida, ‘Enti siku ari peturun nuan, ba genap iti serak, datai semak ngagai pemeri ti kudus ti diserahka orang Israel ngagai Aku, lebuh iya agi mengkang enda tuchi, iya enda tau agi bekereja ba alta. Aku tu TUHAN.

⁴“Nadai siku ari peturun Aron, ke bisi penyakit kulit ti tau ngerampit, tauka bisi utai kamah pansut ari tubuh iya, tau makai pemeri ti kudus, datai ke udah nyadi tuchi baru. Imam nyadi enda tuchi enti iya negu utai ti enda tuchi, nemuka utai nya bangkai, tauka ai mani iya ti bisi pansut,

⁵tauka iya udah negu jelu ti enda tuchi, tauka negu orang ke enda tuchi.

⁶Imam ti nyadi enda tuchi, deka mengkang enda tuchi nyentuk ngagai lemai. Tang taja pen hari nyau lemai, iya enda tau makai pemeri ti kudus, enti iya apin mandi.

⁷Lebuh padam mata panas nya baru iya tuchi. Udah nya baru iya tau makai pemeri ti kudus, ti endang pemakai iya.

⁸Iya enda tau makai dagin jelu ti mati sakit tauka mati ngapa, tauka mati laban jelu babas. Utai nya deka ngasuh iya enda tuchi. Aku tu TUHAN.’

⁹Sida enda tau enda nitihka adat ti diberi Aku, enggai ke sida salah lalu mati dalam Langkau Kain TUHAN ketegal sida enda ngasika adat ti kudus. Aku tu TUHAN, ke nguduska adat nya.

¹⁰“Orang bukai enda tau makai pemeri ti kudus nya. Orang ke diau enggau imam, tauka orang gaji iya pen enda meh tau makai pemeri nya.

¹¹Tang ulun imam, ke dibeli ngena duit imam nya empu, tauka ada dalam rumah imam, tau makai pemakai imam.

¹²Enti anak indu imam jadi enggau orang ke ukai imam, iya enda tau makai pemeri ti kudus nya.

¹³Tang anak indu imam, ke balu, tauka udah dibuai laki lalu nadai anak, sereta udah pulai lalu diau dalam rumah apai iya baru, lalu nyadi orang tupi apai iya, tau makai pemakai apai iya ti nyadi imam. Semina sida imam sebilik aja tau makai pemakai nya.

¹⁴“Enti orang ke ukai sebilik enggau imam makai piring ti kudus, enggau enda sengaja, sida enda tau enda mayar semua rega piring nya ngagai imam, ditambahka enggau dua puluh peratus.

¹⁵Imam enda tau ngamahka pemeri ti kudus ti diberi orang Israel ngagai TUHAN,

¹⁶ti tau ngasuh sida betanggungjawapka penyalah ti begunaka piring kena muai penyalah, ketegal sida makai pemeri ti kudus: laban Aku tu TUHAN ti nguduska pemeri nya.”

¹⁷Lalu ku TUHAN bejaku ngagai Moses,

¹⁸“Sebut ngagai Aron, enggau ngagai bala anak lelaki iya, enggau ngagai semua orang Israel: Lebuh orang Israel, tauka orang kampar ti diau begulai enggau orang Israel, ngenjuk piring tunu, nemuka piring nya kena ngamatka semaya, tauka nyadika piring ti diberi nitihka peneka ati diri, jelu nya enda tau bisi penimpang.

¹⁹Jelu nya deka diterima enti iya lelaki lalu nadai penimpang.

²⁰ Enti kita meri jelu ti bisi penimpang, TUHAN enggai nerima jelu nya.

²¹Lebuh orang ngenjuk piring pemaik ngagai TUHAN, nemuka piring nya kena ngamatka semaya, tauka nyadika piring ti diberi nitihka peneka ati diri, jelu nya nadai tau bisi penimpang. Nya baru jelu nya deka diterima.

²²Anang meri ngagai TUHAN jelu ti buta, tauka jelu ti enda tau bejalai, tauka bakal, tauka bisi kuris, tauka bisi kulit ti meletur, tauka kulit iya nyau penuh laban tutup kuris. Anang meri jelu ti baka nya ba alta nyadika piring ti diberi ngena api.

²³Nyadi pasal piring ti diberi kita nitihka peneka ati diri, kita tau meri jelu ti tasal, tauka enda menyana gamal, tang piring nya enda diterima kena ngamatka semaya.

²⁴Anang meri ngagai TUHAN jelu ti udah pechah pelir, tauka pelir iya bisi telih, malui, tauka udah tingkil. Utai ti baka nya enda tau dikereja di menua kita.

²⁵Anang meri jelu ti diambi kita ari orang bansa bukai nyadika piring ti diberi ngena api. Jelu ti baka nya dikumbai jelu ti bisi penimpang, lalu enda diterima.

²⁶Lalu ku TUHAN bejaku ngagai Moses,

²⁷“Lebuh anak sapi tauka anak domba, tauka anak kambin ada, iya enda tau diambi ari indai iya dalam kandang tujuh hari. Ba hari ti kelapan nya baru iya diterima nyadika piring ti diberi ngena api ngagai TUHAN.

²⁸Anang meri sapi ti indu enggau anak iya, tauka indu jelu bedus enggau anak iya, tauka jelu kambin enggau anak iya sama hari nyadika piring.

²⁹Lebuh kita ngenjuk piring terima kasih ngagai TUHAN, titihka adat tu, ngambika kita diterima.

³⁰Empa piring nya ba hari nya, lalu anang nejuka utai nya beteda ngagai pagi hari siti.

³¹“Nya alai kita enda tau enda ngasika, lalu ngereja pesan Aku. Aku tu TUHAN.

³²Lalu kita enda tau mechat nama Aku ti kudus. Semua orang Israel enda tau enda ngumbai Aku kudus. Aku tu TUHAN ti nguduska kita,

³³ti udah mai kita pansut ari menua Ejip ngambika Aku nyadi Allah Taala kita. Aku tu TUHAN.”