Read Iban Adat Lewi 23 Bible Online

Adat Lewi 23 - Iban bible

Adat Lewi 23

¹Ku TUHAN bejaku ngagai Moses,

²“Sebut ngagai orang Israel: Tu gawai TUHAN ti deka dikumbai kita gawai ti kudus.

³ Kita bisi enam hari alai kita gawa, tang hari ti ketujuh nya Hari Sabat, hari kita belelak, hari alai kita besembiang bebala mayuh. Kita enda tau gawa, laban hari nya Hari Sabat TUHAN, lalu enda tau enda diintu kita di semua endur alai kita diau.

⁴“Baka tu ku gawai TUHAN, alai kita besembiang bebala mayuh, ti deka diintu kita ba maya ti diletak.

⁵ Ba bulan ti kesatu, kena empat belas hari bulan nya, ba tumbuh nyang lemai nya kita deka ngintu Gawai Paska TUHAN.

⁶ Lalu kena lima belas hari bulan, kita enda tau enda ngintu Gawai Roti Ti Enda Beragi ke TUHAN. Kita deka makai roti ti enda beragi dalam kandang tujuh hari.

⁷Ba hari ti keterubah, kita deka besembiang bebala mayuh. Kita enda tau gawa.

⁸Tang kita enda tau enda ngenjuk piring ngena api ngagai TUHAN tujuh hari. Ba hari ti ketujuh, kita enda tau enda besembiang bebala mayuh. Kita enda tau gawa.”

⁹Lalu ku TUHAN bejaku ngagai Moses,

¹⁰“Sebut ngagai orang Israel: Lebuh kitai datai di menua ti diberi Aku ngagai kita, lalu ngetau utai di menua nya, kita enda tau enda mai gempung tangkai ti terubah diketau kita ngagai imam.

¹¹Imam nya deka miauka gempung tangkai gandum nya di mua TUHAN, ngambika TUHAN nerima kita. Pagi hari siti, udah bekau Hari Sabat, imam deka miauka gempung tangkai nya.

¹²Lalu ba hari kita miauka gempung tangkai gandum nya, beri mega siku jelu bedus ti lelaki, ti umur setaun, ti nadai penimpang, nyadika piring tunu.

¹³Sama enggau nya, kita enda tau enda mega meri dua kilogram tepung ti dichampur enggau minyak kana, nyadika piring ti diberi ngena api. Bau piring nya deka ngerinduka ati TUHAN. Kita enda tau enda mega meri, sama enggau nya, dua butul wain.[17]

¹⁴Anang makai gandum ti baru, nemuka gandum nya diempa mata, tauka digirau, tauka digaga nyadi roti, sebedau kita mai piring nya ngagai TUHAN. Adat tu enda tau enda dititihka semua serak peturun kita belama iya di semua endur alai sida diau.

¹⁵ Itung tujuh minggu penuh belabuh ari sehari udah bekau Hari Sabat lebuh kita ke mai lalu meri gempung gandum kita ngagai TUHAN.

¹⁶Ba hari ti kelima puluh, sehari udah bekau Hari Sabat ti ketujuh, beri ngagai TUHAN siti agi piring ti digaga ari gandum ti baru diketau.

¹⁷Genap ruang bilik enda tau enda mai dua iti tuku roti, lalu meri utai nya ngagai TUHAN nyadika pemeri ti manah. Genap iti tuku roti nya deka digaga ari dua kilogram tepung, diberi ragi, dipanggang, lalu diserahka ngagai TUHAN nyadika piring gandum ari gandum ti terubah diketau.

¹⁸Orang Israel deka meri, sama enggau roti nya, tujuh iku anak domba ti umur setaun, siku sapi ti lelaki, enggau dua iku bedus ti lelaki, lalu semua sida nya nadai penimpang magang. Semua jelu nya diserahka ngagai TUHAN nyadika piring tunu, sama enggau piring gandum, enggau piring wain. Piring tu deka bebau rengut lalu ngerinduka ati TUHAN.

¹⁹Beri mega siku kambin ti lelaki nyadika piring pengampun dosa, enggau dua iku anak domba ti umur setaun nyadika piring pemaik.

²⁰Imam deka meri roti nya enggau anak domba ti dua iku nya nyadika piring ti manah ngagai TUHAN, ke bala imam. Semua piring tu kudus magang.

²¹Ba hari nya, nadai siku kita tau gawa, tang besembiang bebala mayuh. Peturun kita enda tau enda nitihka adat tu belama-lama, di semua endur alai sida diau.

²² Lebuh kita ngetau umai kita, anang ngetau gandum ti ba tisi umai kita, lalu anang pulai kia baru lalu ngumpul semeli. Tinggalka utai nya ke orang ke seranta enggau ke orang kampar. Aku tu TUHAN Allah Taala kita.”

²³Lalu ku TUHAN bejaku ngagai Moses,

²⁴“Sebut ngagai orang Israel: Kena satu hari bulan ti ketujuh, kita enda tau enda ngintu siti hari alai diau, lalu besembiang bebala mayuh, lebuh terumpit disepu.

²⁵Kita enda tau gawa; lalu kita enda tau enda ngenjuk piring ngena api ngagai TUHAN.”

²⁶Lalu ku TUHAN bejaku ngagai Moses,

²⁷ “Sepuluh hari bulan ti ketujuh tiap taun nya hari pengampun dosa. Ba hari nya kita enda tau enda besembiang bebala mayuh, bepasa, lalu ngenjuk piring ti diberi ngena api ngagai TUHAN.

²⁸Lalu kita enda tau gawa lebuh hari nya, laban nya hari pengampun dosa, alai kita minta TUHAN Allah Taala kita ngampun dosa kita.

²⁹Barang sapa enda bepasa lebuh hari nya, deka badu agi dikumbai nembiak Allah Taala.

³⁰Lalu barang sapa gawa lebuh hari nya, deka Aku bunuh.

³¹Kita enda tau gawa lebuh hari nya. Adat tu deka dititihka semua peturun kita, enda milih endur alai sida diau.

³²Belabuh ari padam mata panas ba semilan hari bulan nya, nyentuk ngagai sepuluh hari bulan, intu hari nya nyadika hari alai kita belelak, lalu sehari nya kita enda tau enda bepasa.

³³ Lalu ku TUHAN bejaku ngagai Moses,

³⁴“Sebut ngagai orang Israel: Berengkah ari lima belas hari bulan ti ketujuh, dalam pengelama tujuh hari, kita enda tau enda ngintu Gawai Belangkau ke TUHAN.

³⁵Ba hari ti keterubah, kita enda tau enda besembiang bebala mayuh, lalu kita enda tau gawa.

³⁶Genap hari kita enda tau enda ngenjuk piring ti diberi ngena api ngagai TUHAN. Ba hari ti kelapan, kita enda tau enda besembiang bebala mayuh, lalu ngenjuk piring ti diberi ngena api ngagai TUHAN. Nya hari alai kita besembiang bebala mayuh, lalu kita enda tau gawa. (

³⁷Nya meh gawai pengarap ti dikena kita ngemesaika TUHAN, ti deka dikumbai kita maya alai kita besembiang bebala mayuh, alai kita ngenjuk piring ti diberi ngena api, piring tunu, piring gandum, piring jelu, enggau piring wain, ti diguna ba hari ti patut.

³⁸Piring tu nambahka piring ti diberi lebuh Hari Sabat, sereta nambahka piring ti diberi kita ngena chara selama, piring kena kita ngamatka semaya, enggau piring ti diberi nitihka peneka ati diri, ti diberi kita ngagai TUHAN.)

³⁹“Kena lima belas hari bulan ti ketujuh, lebuh kita udah tembu ngetau, kita enda tau enda ngintu gawai ke TUHAN tujuh hari. Hari ti keterubah nya hari kita belelak. Hari ti kelapan nya hari alai kita belelak.

⁴⁰Ba hari ti keterubah, ambi sekeda buah ti pemadu manah ari kayu buah kita, ambi dan kayu engkerema, enggau dan ari kayu ti lebat daun, lalu rami gaga di mua TUHAN Allah Taala kita dalam pengelama tujuh hari.

⁴¹Intu gawai nya tujuh hari dalam setaun. Adat tu enda tau enda dititihka bala peturun kita datai ke belama iya. Kita ngintu gawai nya dalam bulan ti ketujuh.

⁴²Kita deka diau dalam langkau kain kita tujuh hari; semua orang Israel deka diau dalam langkau kain sida tujuh hari,

⁴³ngambika peturun kita nemu TUHAN udah ngasuh orang Israel diau dalam langkau kain, lebuh Aku mai sida pansut ari menua Ejip. Aku tu TUHAN Allah Taala kita.”

⁴⁴Nya meh chara Moses meri ngagai orang Israel semua adat ti dikena sida ngintu gawai pengarap, kena sida ngemesaika TUHAN.