Read Iban Adat Lewi 24 Bible Online

Adat Lewi 24 - Iban bible

Adat Lewi 24

¹Ku TUHAN bejaku ngagai Moses,

²“Asuh orang Israel mai ngagai nuan minyak kana ti tulin, ti pemadu manah, ke lampu ti di dalam Langkau Kain TUHAN, ngambika lampu nya seruran menyadi belama.

³Genap lemai, Aron deka nungkun lampu nya lalu nejuka lampu nya menyadi nyentuk ngagai pagi, di mua TUHAN, ari luar kain tirai ti di mua Peti Lampang Batu Adat ti di dalam Endur ti Pemadu Kudus. Adat tu deka dititihka genap serak kita belama iya.

⁴Aron deka ngintu lampu ti ba penuduk lampu ti digaga ari emas nya, lalu nentuka semua lampu nya menyadi belama di mua TUHAN.

⁵ “Ambi dua belas kilogram tepung ti alus, lalu panggang dua belas iti tuku roti.

⁶Tusun tuku roti nya berintai dua, enam iti dalam siti-siti rintai, ba atas mija ti disampak enggau emas ti tulin, ti di mua TUHAN.

⁷Engkahka menyan ti tulin ba siti-siti rintai roti nya, kena nandaka piring ti diberi ngena api nya diserahka ngagai TUHAN, kena nganti roti.

⁸Genap Hari Sabat, datai ke belama iya, roti nya enda tau enda diengkah di mua TUHAN. Tu pengawa ti enda tau enda dikereja orang Israel belama iya.

⁹ Roti nya diempu Aron enggau bala peturun iya, lalu sida deka makai roti nya ba endur ti kudus, laban tu bagi pemakai ti pemadu kudus ti diserahka ngagai TUHAN, ke bala imam.

¹⁰Nyadi sekali bisi siku orang. Apai iya orang Ejip, lalu indai iya orang Israel, ke benama Selomit anak Dibri, ari raban bansa Dan. Lelaki nya belaya ngelaban siku orang Israel. Lebuh seduai iya belaya, iya nyumpah TUHAN. Nya alai sida mai iya ngagai Moses.

¹²Moses lalu ngasuh iya kena tan dulu, nganti TUHAN udah madahka utai ti patut dikereja sida ngagai iya.

¹³TUHAN lalu bejaku ngagai Moses,

¹⁴“Bai orang ke nyumpah nya pansut ari kem tu. Lalu awakka semua orang ke bisi ninga iya nyumpah, ngengkahka jari sida ba pala iya, lalu awakka semua orang Israel nuku iya ngena batu.

¹⁵Lalu padahka ngagai orang Israel: Barang sapa nyumpah Allah Taala, deka betanggungjawapka penyalah diri.

¹⁶Orang ke bejaku busung ngelaban nama TUHAN, deka dibunuh. Semua orang mayuh deka nuku iya ngena batu. Orang kampar enggau orang Israel empu deka dibunuh lebuh iya bejaku busung ngelaban nama TUHAN.

¹⁷ “Orang ke munuh orang, deka dibunuh,

¹⁸lalu orang ke munuh jelu orang bukai, enda tau enda nganti jelu nya, nyawa balas nyawa.

¹⁹Barang sapa ngemakalka orang, deka dibakalka baka orang nya:

²⁰ patah tulang dibalas ngena patah tulang, mata balas mata, ngeli balas ngeli; pemedis ti dikereja iya ngagai orang, deka dikereja ngagai iya empu.

²¹Barang sapa munuh jelu, enda tau enda nganti jelu nya, tang barang sapa munuh mensia, deka dibunuh.

²² Kita semina bisi siti aja adat ke orang Israel enggau ke orang kampar, laban Aku tu TUHAN Allah Taala kita.”

²³Lebuh Moses udah nyebut jaku nya ngagai orang Israel, sida lalu mai lelaki ke bejaku busung nya pansut ari kem nya, lalu nuku iya ngena batu. Nya meh chara orang Israel ngereja jaku ti udah dipesanka TUHAN ngagai Moses.