Read Iban Adat Lewi 25 Bible Online

Adat Lewi 25 - Iban bible

Adat Lewi 25

¹ Ku TUHAN bejaku ngagai Moses ba Bukit Sinai:

²“Sebut ngagai orang Israel: Lebuh kita tama ngagai menua ti diberi TUHAN ngagai kita, kita enda tau nanam utai dalam genap taun ti ketujuh, kena kita ngemesaika Iya.

³Kita tau nanam utai ba tanah kita, nyarau anggur ba kebun kita, lalu ngetau utai ti ditanam kita dalam kandang enam taun.

⁴Tang dalam taun ti ketujuh kita enda tau enda nejuka tanah kita enda dipumai, taun ti diserahka ngagai TUHAN. Anang nanam utai ba tanah kita, tauka nyarau anggur kita.

⁵Indah gandum ti tumbuh-diri, deh enda tau diketau, lalu anang ngumpul buah anggur ari batang anggur ti enda dijarau kita. Taun nya nyadika taun alai kita nejuka tanah kita enda dipumai.

⁶Taja pen tanah kita enda ditanam enggau utai dalam taun nya, tanah nya deka mansutka pemakai ke kita, ti ulun kita, ke orang gaji kita, ke orang kampar ti diau begulai enggau kita,

⁷ke jelu tupi kita, enggau ke jelu babas ti ba tanah kita. Semua asil ari tanah kita, tau diempa magang.

⁸“Itung tujuh kali tujuh taun, empat puluh semilan taun semua iya.

⁹Udah nya, kena sepuluh hari bulan ti ketujuh, iya nya Hari Pengampun Dosa, asuh orang nyepu terumpit di serata menua kita.

¹⁰Nya chara kita deka nguduska taun ti kelima puluh, lalu ngelepaska semua orang ke diau di menua kita. Dalam taun nya, semua reta tengkira ti udah dijual, deka dipulaika baru ngagai orang ke asal bempu utai nya, tauka ngagai raban bansa sida, lalu orang ke udah dijual nyadi ulun, deka pulai baru ngagai ruang bilik sida empu.

¹¹Kita enda tau nanam utai ba tanah kita, tauka ngetau gandum ti tumbuh-diri, tauka ngumpul buah anggur ba kebun anggur ti enda dijarau kita.

¹²Taun Jubili nya deka nyadi kudus ke kita. Kita semina tau makai utai ti tumbuh-diri ba tanah kita.

¹³Dalam Taun Jubili nya, semua reta tengkira ti udah dijual, deka dipulaika baru ngagai orang ke asal bempu iya.

¹⁴Nya alai lebuh kita nyual tanah ngagai orang Israel, tauka meli tanah, anang ngelakar.

¹⁵Rega tanah nya enda tau enda diletak nitihka berapa taun tanah nya ulih mansutka asil sebedau Taun Jubili ti deka datai.

¹⁶Enti Taun Jubili nya agi jauh, rega tanah nya mar, tang enti taun nya nyau semak, rega iya murah, laban utai ti dijual nya semina asil ari tanah nya empu.

¹⁷Anang nipu pangan diri, tang kita patut nangika Allah Taala kita; laban Aku tu TUHAN Allah Taala kita.

¹⁸“Nya alai kita enda tau enda ngasika semua adat enggau pesan Aku, ngambika kita tau diau likun di menua tu.

¹⁹Menua tu deka mansutka asil, lalu kita deka chukup semua utai diempa, sereta diau likun.

²⁰Lalu enti kita nyebut, ‘Nama utai ti deka diempa kitai enti kitai nadai nanam tauka ngetau utai?’

²¹Aku deka merekatka menua tu dalam taun ti keenam, ngambika menua tu mansutka pemakai chukup diempa dalam tiga taun.

²²Lebuh kita nanam utai ba tanah kita dalam taun ti kelapan, kita deka mengkang makai utai ti diketau kita dalam taun ti keenam, nyentuk ngagai taun ti kesemilan, maya utai ti ditanam kita dalam taun ti kelapan nya diketau kita.

²³“Tanah kita enda tau dijual terus, laban tanah nya enggi Aku; laban kita tu orang kampar ti diau enggau Aku.

²⁴Lalu lebuh tanah dijual, orang ke asal bempu tanah nya bisi hak meli tanah nya pulai baru.

²⁵“Enti kita orang Israel bisi suntuk, lalu ketegal nya enda tau enda nyual tanah diri, kaban belayan iya ke pemadu nyempil enda tau enda meli tanah nya pulai baru.

²⁶Enti iya nadai kaban belayan ke ulih meli tanah nya pulai baru, lalu iya nyangka jemah ila tau nyadi kaya-raja, lalu bisi chukup duit kena iya meli tanah nya pulai baru.

²⁷awakka iya mayar ngagai orang ke udah meli tanah nya, ngena rega ti chukup ke berapa taun ti agi tinggal sebedau Taun Jubili ti deka datai, iya nya taun alai tanah nya enda tau enda dipulaika baru ngagai iya.

²⁸Tang enti iya nadai chukup duit kena meli tanah nya pulai baru, tanah nya mengkang diempu orang ke udah meli tanah nya, nyentuk ngagai Taun Jubili ti deka datai. Dalam taun nya, tanah nya deka dipulaika baru ngagai orang ke asal bempu iya.

²⁹“Enti orang nyual rumah dalam nengeri ti bekuta, iya tau meli rumah nya pulai baru dalam setaun penuh udah bekau rumah nya dijual iya.

³⁰Tang enti iya enda meli rumah nya pulai baru dalam setaun nya, iya nadai agi hak meli rumah nya pulai baru, lalu rumah nya deka terus nyadi pesaka orang ke meli rumah nya, enggau bala peturun iya. Rumah nya enda dipulaika baru dalam Taun Jubili.

³¹Tang rumah ba genturung pendiau ti enda bekuta, deka digaga nyadi baka tanah umai. Orang ke asal bempu rumah nya, bisi hak meli rumah nya pulai baru, lalu rumah nya deka dipulaika baru dalam Taun Jubili.

³²Tang orang Lewi bisi hak meli pesaka sida pulai baru ba sebarang maya, dalam nengeri ti udah diungkupka ngagai sida.

³³Enti rumah dalam nengeri ti baka nya dijual orang Lewi, lalu enda dibeli pulai baru, rumah nya enda tau enda dipulaika baru ngagai orang nya empu dalam Taun Jubili, [18] laban rumah ti diempu orang Lewi dalam nengeri nya, endang pesaka sida dalam bansa orang Israel.

³⁴Tang padang rumput ti ngelingi nengeri ti udah diungkupka ngagai orang Lewi, enda tau dijual. Padang rumput nya endang pesaka sida belama iya.

³⁵ “Enti orang Israel ti diau semak kita suntuk lalu enda ulih ngidupka diri agi, kita enda tau enda meri iya utai ti dipeguna sida, baka kita ke ngaga orang gaji kita, ngambika sida ulih majak diau semak kita.

³⁶Anang minta anak duit ari orang Israel, tang nangika Allah Taala, ngambika sida ulih diau semak kita.

³⁷ Anang minta bayar anak duit ti dijali kita ngagai iya, tauka ngiga untung ari pemakai ti dijual kita ngagai iya.

³⁸Aku tu TUHAN Allah Taala kita, ti udah mai kita pansut ari menua Ejip ngambika meri menua Kanaan tu ngagai kita, ngambika Aku nyadi Allah Taala kita.

³⁹ “Enti orang Israel ti diau semak kita suntuk, lalu iya nyual diri nyadi ulun kita, anang ngasuh sida ngereja pengawa ulun.

⁴⁰Iya deka diau enggau kita nyadi orang gaji. Iya deka bekereja ke kita nyentuk ngagai Taun Jubili ti deka datai.

⁴¹Lebuh maya nya ila, iya enggau sida menyanak deka ninggalka kita, lalu pulai baru ngagai ruang bilik sida empu, ngagai pesaka aki ini sida empu.

⁴²Laban orang Israel endang nembiak Aku, ti udah dibai Aku pansut ari menua Ejip. Sida enda tau dijual nyadi ulun.

⁴³Anang kasar enggau sida, tang nangika Allah Taala kita.

⁴⁴Pasal ulun ti lelaki enggau ti indu ke diau enggau kita, kita tau meli ulun ari bansa bukai ke ngelingi kita.

⁴⁵Kita tau mega meli anak orang bansa bukai ke diau begulai enggau kita, ke ada dalam menua kita. Sida tau nyadika pesaka kita.

⁴⁶Kita tau meri sida ngagai anak uchu kita, nyadika pesaka sida belama iya; kita tau ngaga sida nyadi ulun, tang kita enda tau merintah orang Israel, lalu enda tau kasar enggau sida.

⁴⁷“Enti sema orang bansa bukai ke diau begulai enggau kita nyadi kaya, tang orang Israel nyadi seranta, lalu nyual diri empu nyadi ulun orang bansa bukai nya, tauka nyual diri ngagai orang ke ari ruang bilik orang bansa bukai nya,

⁴⁸lebuh sida udah nyual diri, sida agi tau dibeli pulai baru. Menyadi lelaki sida tau meli sida pulai baru,

⁴⁹tauka aya, tauka petunggal, tauka kaban belayan ke nyempil, tau meli sida pulai baru. Tauka, enti sida udah bulih duit, sida tau nebus diri empu.

⁵⁰Sida enda tau enda betanya ngagai orang ke udah meli sida, lalu sida enda tau enda ngitung pengelama sida udah nyual diri, nyentuk ngagai Taun Jubili ti deka datai, lalu ngeletak ungkus tebus sida beduduk ba gaji ti diberi ngagai orang gaji.

⁵¹Sida enda tau enda mulaika sekeda rega ti dikena orang meli sida, nitihka penyampau taun ti agi tinggal,

⁵²

⁵³baka reti orang gaji ke digaji ari taun siti ngagai taun siti. Tuan sida enda tau kasar enggau sida.

⁵⁴Enti sida enda dilepaska ngena atur nya, sida enggau sida menyanak, enda tau enda dilepaska dalam Taun Jubili.

⁵⁵Orang Israel enda tau digaga nyadi ulun belama iya, laban orang Israel endang nembiak Aku, ke dibai Aku pansut ari menua Ejip: Aku tu TUHAN Allah Taala kita.