Read Iban Adat Lewi 26 Bible Online

Adat Lewi 26 - Iban bible

Adat Lewi 26

¹ “Anang ngaga engkeramba tauka ngaga anak patung, tauka tiang keramat, tauka batu ti ditebuk ngambika bisi disembah; laban Aku tu TUHAN Allah Taala kita.

²Intu gawai pengarap, lalu beri basa ngagai Langkau Kain TUHAN alai Aku ke disembah. Aku tu TUHAN.

³ “Enti kita diau nitihka adat Aku, lalu ngasika pesan Aku, lalu ngereja pesan nya,

⁴nya baru Aku deka ngasuh hari ujan ba maya ti patut, ngambika menua kita mansutka asil, lalu kayu deka bebuah.

⁵Utai ti ditanam kita deka mansutka mayuh asil, datai ke kita agi ngetau gandum lebuh maya kita deka ngetau buah anggur, lalu kita agi ngetau buah anggur lebuh maya kita nyau deka nugalka gandum kita. Kita deka bulih semua utai ke diempa kita, lalu kita deka diau likun dalam menua kita.

⁶Aku deka meri kita pemaik dalam menua kita, lalu kita ulih tinduk enda takutka orang. Aku deka muai semua jelu ti mangah ari menua kita, lalu perang nadai agi nyadi di menua kita.

⁷Lalu kita deka begagaika munsuh kita, lalu sida deka mati dipantap kita.

⁸Lima iku kita deka begagaika seratus iku, lalu seratus iku kita deka begagaika sepuluh ribu iku, lalu munsuh kita deka mati dipantap kita.

⁹Aku deka merekatka kita, lalu meri kita mayuh anak. Aku deka ngingatka sempekat ti udah digaga Aku enggau kita.

¹⁰Utai ti diketau kita deka lebih ari chukup diempa kita setaun, tang taja pia, kita enda tau enda muai gandum ti lama, ngambika bisi endur alai kita nyimpan gandum ti baru.

¹¹Aku deka diau begulai enggau kita, dalam Langkau Kain Aku ti kudus, lalu Aku enggai sekali-kali ninggalka kita

¹² Aku deka meruan enggau kita. Aku deka nyadi Allah Taala kita, lalu kita deka nyadi nembiak Aku.

¹³Aku tu TUHAN Allah Taala kita, ti udah mai kita pansut ari menua Ejip, ngambika kita badu agi nyadi ulun; lalu Aku udah matahka kuasa ti nekanka pengidup kita, lalu Aku udah ngasuh kita bejalai enggau nadai pemalu agi.”

¹⁴ “Tang enti kita enggai mendingka Aku, lalu enggai ngereja utai ti dipesanka Aku ngagai kita,

¹⁵enti kita enggai ngasika adat enggau pesan Aku, enggai ngereja semua utai ti dipesanka Aku, tang ngelanggar sempekat ti udah digaga Aku enggau kita,

¹⁶Aku deka ngereja tu ngagai kita: Aku deka ngasuh kita ditinggang penusah ti besai, penyakit ti enda ulih diubat, enggau penyakit chelap-angat ti ngasuh mata kita buta, lalu munuh kita. Kita deka nanam utai, tang utai nya nadai mai penguntung ngagai kita, laban munsuh kita deka makai utai nya.

¹⁷Aku deka ngelaban kita, lalu kita deka alah laban munsuh kita; orang ke begedika kita, deka merintah kita; lalu kita deka rari, taja pen orang nadai begagaika kita.

¹⁸Lalu enti kita mengkang enggai mendingka Aku, udah bekau semua utai nya nyadi, Aku deka nambahka ukum kita tujuh kali lipat ketegal dosa kita,

¹⁹lalu Aku deka matahka kuasa penyumbung kita, lalu Aku deka ngaga langit rangkai baka besi, lalu tanah kita baka temaga;

²⁰lalu semua pengawa kita nadai pulai ke penguntung, laban menua kita enda mansutka asil, lalu kayu buah kita enda bebuah.

²¹“Udah nya, enti kita majak ngelaban Aku, lalu enggai mendingka Aku, Aku deka nambahka ukum kita tujuh kali lipat nitihka pemayuh dosa kita.

²²Lalu Aku deka ngasuh jelu babas datai ngelaban kita, lalu sida deka munuh anak kita, munuh jelu tupi kita, lalu ninggalka semina mimit aja ari bala kita idup, datai ke jalai kita nyau sunyi nadai orang nengah.

²³“Lalu enti, udah bekau Aku ngukum kita, kita mengkang enggai mendingka Aku, tang majak ngelaban jaku Aku,

²⁴Aku deka ngelaban kita, lalu Aku Empu deka ngukum kita tujuh kali balat agi ari ti dulu ketegal dosa kita.

²⁵Lalu Aku deka ngasuh perang nyadi di menua kita, kena Aku ngukum kita, laban kita ngelanggar sempekat ti digaga Aku enggau kita, lalu enti kita begempuru dalam nengeri kita ngiga pengelikun, Aku deka ngasuh penyakit ti enda ulih diubat ninggang kita, lalu kita deka diserahka ngagai munsuh kita.

²⁶Lebuh Aku mutuska penatai pemakai kita, sepuluh iku indu deka manggang roti ngena siti aja dapur, lalu sida deka bedua roti nya, lalu lebuh kita udah makai semua roti nya, kita agi mengkang lapar.

²⁷“Lalu enti, udah bekau nya, kita agi majak enggai mendingka Aku, tang majak ngelaban Aku,

²⁸Aku deka ringat lalu ngelaban kita, lalu nambahka ukum kita tujuh kali lipat ketegal dosa kita.

²⁹Kita deka makai isi anak lelaki kita, lalu kita deka makai isi anak indu kita.

³⁰Lalu Aku deka ngerusak endur alai kita besembiang, lalu ngeruntuhka alta ti alai kita nunu menyan, lalu nikauka bangkai kita atas engkeramba kita; lalu Aku deka begedika kita.

³¹Lalu Aku deka ngeruntuhka nengeri kita, lalu ngaga endur alai kita besembiang nyadi tembawai, lalu enda agi nyium bau piring kita.

³²Lalu Aku deka ngerusak semua utai di menua kita, datai ke munsuh ti nguan menua kita deka tegenung meda nya.

³³Lalu Aku deka mambarka kita ngagai mayuh bengkah menua, lalu Aku deka nyintak pedang Aku begagaika kita; lalu menua kita nadai orang nguan, lalu nengeri kita rusak magang.

³⁴“Nya baru menua kita deka ngetu dipumai kita, seagi-agi iya nadai orang nguan, lebuh kita dibuai ngagai menua munsuh kita. Nya baru menua kita deka ngetu dipumai.

³⁵Seagi-agi menua nya nadai orang nguan, iya mengkang enda dipumai, enda baka lebuh kita ke diau di menua nya.

³⁶Nyadi pasal kita ke tinggal, Aku deka ngasuh kita takut diau di menua munsuh, datai ke kita rari ninga kerus daun ti dipuputka ribut, baka ke rari ari munsuh lebuh beperang, lalu kita deka rebah taja pen munsuh nadai begagaika kita.

³⁷Kita deka tesangkut ba pangan diri, baka ke rari ari munsuh, taja pen munsuh nadai begagaika kita, lalu kita enda ulih ngelaban munsuh kita.

³⁸Lalu kita deka mati di menua orang, lalu dikuburka di menua munsuh kita.

³⁹Lalu kita ke agi tinggal deka tusah ati diau di menua munsuh kita ketegal dosa kita, enggau ketegal dosa apai kita.

⁴⁰ “Tang enti sida ngaku dosa sida, enggau dosa aki ini sida ke udah nulak sereta angkat ngelaban Aku,

⁴¹ti ngujungka Aku ngelaban sida, lalu muai sida ngagai menua munsuh sida; enti sida ngemaruhka diri lalu nerima ukum ke penyai sida;

⁴² nya baru Aku deka ingatka sempekat Aku enggau Jakop, sempekat Aku enggau Isak, enggau sempekat Aku enggau Abraham, lalu deka ingatka menua tu.

⁴³Tang sida deka ninggalka menua tu, ngambika menua tu enda dipumai laban nadai orang nguan; lalu sida deka nerima ukum ke penyai sida laban sida nulak adat Aku, lalu kejika adat Aku.

⁴⁴Tang taja pia, lebuh sida agi diau di menua munsuh sida, Aku enggai ninggalka sida, tauka begedika sida lalu ngerusak sida abis lengis, lalu ngelanggar sempekat Aku enggau sida, laban Aku tu TUHAN Allah Taala sida;

⁴⁵tang, ke penguntung sida, Aku deka ngingatka sempekat ti udah digaga Aku enggau aki ini sida, ke dibai Aku pansut ari menua Ejip, dipeda semua bansa, ngambika Aku nyadi Allah Taala sida; Aku tu TUHAN.”

⁴⁶Tu meh semua adat enggau pesan ti diberi TUHAN ngagai Moses ba Bukit Sinai, ke orang Israel.