Read Iban Adat Lewi 3 Bible Online

Adat Lewi 3 - Iban bible

Adat Lewi 3

¹Lebuh kita meri siku ari jelu sapi kita nyadika piring pemaik ngagai TUHAN, jelu nya nadai tau bisi penimpang, nemuka sapi nya lelaki, tauka indu.

²Kita enda tau enda ngengkahka jari kita ba pala jelu nya, lalu nyayat iya ba penama ngagai Langkau Kain TUHAN. Bala anak lelaki Aron ti nyadi imam deka ngunsaika darah jelu nya ngagai semua empat iti tisi alta.

³Kita enda tau enda meri, ari piring pemaik nya semua lemak ti malut, enggau lemak ti ngelingi, sengkilung perut jelu nya, tungkul sengayuh, enggau lemak ti malut tungkul sengayuh nya, enggau sebagi ti pemadu manah ari atau jelu nya, nyadika piring ti diberi ngena api ngagai TUHAN.

⁵Imam nya deka nunu semua utai nya retung ba alta begulai enggau piring tunu ba kayu ba alta nya. Bau piring tunu nya, piring ti diberi ngena api, deka ngerinduka ati TUHAN.

⁶Enti jelu bedus, tauka kambin, diberi nyadika piring pemaik, jelu nya enda tau bisi penimpang, nemuka jelu nya lelaki tauka indu.

⁷Enti kita meri siku jelu bedus, kita enda tau enda mai jelu nya ngagai TUHAN,

⁸lalu ngengkahka jari kita ba pala jelu nya, lalu nyayat iya di mua Langkau Kain TUHAN. Bala imam deka ngunsaika darah jelu nya ngagai semua empat iti tisi alta nya

⁹lalu nyerahka semua perengka tubuh jelu nya nyadika piring ti diberi ngena api ngagai TUHAN, iya nya lemak, semua lemak ti ba pun iku, ti dipipil nyempil tulang belakang iya, semua lemak ti malut perengka dalam,

¹⁰tungkul sengayuh, enggau lemak ti lekat ba tungkul sengayuh nya, enggau bagi ti pemadu manah ari atau jelu nya.

¹¹Imam ke bekereja dia deka nunu semua utai nya ba alta, nyadika piring ti diberi ngena api ngagai TUHAN.

¹²Enti kita meri siku kambin, kita enda tau enda mai jelu nya ngagai TUHAN,

¹³lalu ngengkahka jari kita ba pala jelu nya, lalu nyayat iya di mua Langkau Kain TUHAN. Bala imam deka ngunsaika darah iya ngagai semua empat iti tisi alta

¹⁴lalu nyerahka semua perengka tubuh jelu nya nyadika piring ti diberi ngena api ngagai TUHAN, iya nya, semua lemak ti malut perengka dalam,

¹⁵semua tungkul sengayuh, enggau lemak ti lekat ba sida, enggau bagi ti pemadu manah ari atau jelu nya.

¹⁶Imam nya deka nunu semua utai nya ba alta, nyadika piring ti diberi ngena api, ti bebau rengut. Semua lemak diempu TUHAN magang.

¹⁷Kita orang Israel enda tau makai lemak tauka darah. Adat tu enda tau enda dititihka semua orang Israel belama iya, di semua endur alai sida diau.