Read Iban Adat Lewi 4 Bible Online

Adat Lewi 4 - Iban bible

Adat Lewi 4

¹TUHAN ngasuh Moses

²madahka ngagai orang Israel, barang sapa bedosa lalu ngelanggar pesan TUHAN, tang ukai sengaja, enda tau enda nitihka adat tu.

³Enti orang ke ngereja dosa nya Imam Besai, lalu mai orang mayuh ditinggang penyalah, iya enda tau enda meri siku jelu sapi ti lelaki, ti agi biak, ti nadai penimpang, lalu ngaga jelu nya nyadika piring ti diberi ngagai TUHAN, kena muai dosa iya empu.

⁴Iya enda tau enda mai jelu sapi ti lelaki nya ngagai penama Langkau Kain TUHAN, ngengkahka jari iya ba pala jelu nya, lalu nyayat jelu nya dia, di mua TUHAN.

⁵Udah nya Imam Besai nya deka ngambi sekeda ari darah jelu nya, lalu mai darah nya ngagai Langkau Kain TUHAN.

⁶Iya deka nyepuhka tunjuk iya ngagai darah nya, lalu mechikka darah nya tujuh kali, ngagai kain tirai ti di mua Endur ti Pemadu Kudus.

⁷Udah nya iya deka malitka darah nya ngagai tanduk sukut alta ti alai nunu menyan dalam Langkau Kain TUHAN. Iya deka nuang teda darah nya ngagai kaki alta ti alai nunu piring, ba penama ngagai Langkau Kain TUHAN.

⁸Iya deka ngambi ari jelu nya semua lemak, lemak ti malut perengka dalam,

⁹semua tungkul sengayuh, enggau lemak ti malut sida, enggau bagi ti pemadu manah ari atau jelu nya.

¹⁰Imam nya deka mai semua lemak nya, lalu nunu iya retung ba alta ti alai nunu piring tunu, baka ke dikereja iya ngagai lemak jelu ti disayat nyadika piring pemaik.

¹¹Tang iya deka ngambi kulit jelu nya, semua isi iya, pala iya, kaki iya, enggau semua perengka dalam, nyengkaum sengkilung perut iya,

¹²mai utai nya ke luar ari kem nya, ngagai endur ti tuchi, alai orang muai amau, lalu nunu utai nya dia ngena api kayu.

¹³Enti semua orang Israel bedosa, lalu salah ngelanggar siti ari pesan TUHAN, tang ukai sengaja,

¹⁴lalu udah nya iya ditemu, semua orang Israel enda tau enda mai siku jelu sapi ti lelaki, nyadika piring pengampun dosa. Sida deka mai utai nya ngagai Langkau Kain TUHAN.

¹⁵Bala tuai bansa deka ngengkahka jari sida ba pala jelu nya, lalu nyayat iya dia.

¹⁶Imam Besai enda tau enda mai sekeda darah jelu nya ngagai Langkau Kain TUHAN,

¹⁷nyepuhka tunjuk iya ngagai darah nya, lalu mechikka darah nya tujuh kali di mua kain tirai nya.

¹⁸Iya deka malitka darah nya ngagai tanduk sukut alta ti alai nunu menyan dalam Langkau Kain TUHAN, lalu nuang teda darah nya ba kaki alta ti alai nunu piring tunu, ba penama ngagai Langkau Kain TUHAN.

¹⁹Udah nya, iya enda tau enda ngambi semua lemak jelu nya, lalu nunu lemak nya retung ba alta.

²⁰Iya enda tau enda ngereja sapi ti lelaki siku tu baka chara iya ti ngereja sapi ti lelaki ti digaga nyadika piring pengampun dosa. Nya meh chara iya deka ngaga piring pengampun dosa ke orang mayuh, lalu sida deka diampun.

²¹Udah nya iya enda tau enda mai jelu sapi nya ke luar ari kem nya, lalu nunu iya, baka chara iya ke nunu jelu sapi ti lelaki ti diberi kena muai dosa iya empu. Tu piring pengampun dosa ke orang mayuh.

²²Enti orang ke ngereja dosa nya orang ke megai perintah, lalu iya salah ngelanggar siti ari pesan TUHAN, tang ukai sengaja,

²³lalu udah nya orang nunjukka dosa nya ngagai iya, iya enda tau enda mai siku kambin ti lelaki, ti nadai penimpang, nyadika piring iya.

²⁴Iya deka ngengkahka jari iya ba pala kambin nya, lalu nyayat jelu nya ba tisi utara alta nya, ba endur alai ti nyayat jelu ti digaga nyadika piring tunu. Tu piring pengampun dosa.

²⁵Imam nya deka nyepuhka tunjuk iya ngagai darah jelu nya, malitka darah nya ngagai tanduk sukut alta nya, lalu nuang teda darah nya ba kaki alta nya.

²⁶Udah nya iya enda tau enda nunu semua lemak jelu nya retung ba alta, baka chara iya ti ngereja jelu ti disayat nyadika piring pemaik. Nya meh chara imam nya deka ngenjuk piring pengampun dosa ke orang ke megai perintah nya, lalu orang nya deka diampun.

²⁷ Enti orang bedosa, lalu salah laban iya ngelanggar siti ari pesan TUHAN, tang ukai sengaja,

²⁸lalu udah nya, lebuh iya dipadahka pasal dosa iya, iya enda tau enda mai siku kambin ti indu ke nadai penimpang, nyadika piring iya.

²⁹Iya enda tau enda ngengkahka jari iya ba pala jelu nya, lalu nyayat jelu nya ba tisi utara alta nya, ba endur alai nyayat jelu ti diberi nyadika piring tunu.

³⁰Imam deka nyepuhka tunjuk iya ngagai darah jelu nya, malitka darah nya ngagai tanduk sukut alta nya, lalu nuang teda darah nya ba kaki alta nya.

³¹Udah nya iya enda tau enda ngambi semua lemak jelu nya, baka chara iya ke ngambi lemak ari jelu ti disayat nyadika piring pemaik, lalu iya deka nunu lemak nya retung ba alta, nyadika piring ti bebau rengut ke TUHAN. Nya meh chara imam nya deka ngenjuk piring pengampun dosa ke orang nya, lalu orang nya diampun.

³²Enti nuan mai siku jelu bedus nyadika piring pengampun dosa, jelu nya enda tau enda indu, lalu nadai penimpang.

³³Nuan deka ngengkahka jari nuan ba pala jelu nya, lalu nyayat iya ba tisi utara alta, ba endur alai nyayat jelu ti digaga nyadika piring tunu.

³⁴Imam nya deka nyepuhka tunjuk iya ngagai darah jelu nya, malitka darah nya ngagai tanduk sukut alta nya, lalu nuang teda darah nya ba kaki alta nya.

³⁵Udah nya, iya deka ngambi semua lemak jelu nya, baka chara iya ke ngambi semua lemak ari jelu bedus ti disayat nyadika piring pemaik, lalu iya deka nunu lemak nya ba alta, sama enggau piring ti diberi ngena api ngagai TUHAN. Nya meh chara imam deka ngenjuk piring pengampun dosa ti udah dikereja nuan, lalu nuan deka diampun.