Read Iban Adat Lewi 6 Bible Online

Adat Lewi 6 - Iban bible

Adat Lewi 6

¹ TUHAN meri adat tu ngagai Moses.

²Piring enda tau enda diberi enti orang bedosa ngelaban TUHAN, ketegal iya ke enggai mulaika gadai ti ditinggalka siku orang Israel ba iya, tauka iya ngenchuri utai ari orang nya, tauka iya nipu orang nya

³tauka iya bulaka pasal utai ti udah lenyau, lalu iya besumpah madahka diri nadai tetemuka utai nya.

⁴Lebuh orang bedosa ba sebarang utai tu, iya enda tau enda mayar utai ti udah ulih iya ngena chara ti enda manah. Lebuh iya ditemu salah, iya enda tau enda mulaika semua utai nya ngagai orang ke bempu utai nya, ditambahka enggau dua puluh peratus.

⁶Iya enda tau enda mai ngagai imam, siku jelu bedus ti lelaki tauka kambin ti lelaki, ti nadai penimpang, nyadika piring kena mayar ukum penyalah ngagai TUHAN.

⁷Imam deka ngenjuk piring nya kena muai penyalah orang nya, ngambika iya diampun.

⁸TUHAN ngasuh Moses

⁹meri ngagai Aron enggau ngagai bala anak lelaki iya adat kena ngenjuk piring tunu. Piring ti ditunu nya enda tau enda ditinggalka semalam-malam nya ba alta, lalu api nya enda tau enda seruran menyadi.

¹⁰Udah nya imam nya deka ngerasukka baju panjai linin enggau tanchut pandak linin iya, lalu ngulihka amau ti belemak ti tinggal ba alta, lalu ngengkahka amau nya ba tisi alta.

¹¹Udah nya iya deka nukar pekayan iya, lalu mai amau nya ke luar ari kem, ngagai endur ti tuchi.

¹²Api ti ba alta nya enda tau enda seruran menyadi, lalu enda tau sekali-kali ditejuka padam. Tiap pagi, imam nya deka ngengkahka kayu ba api nya, nusun piring tunu ba api nya, lalu nunu lemak nya retung nyadika piring pemaik.

¹³Api nya enda tau enda seruran menyadi ba alta nya, lalu enda tau sekali-kali ditejuka padam.

¹⁴Tu adat pasal ngenjuk piring gandum. Siku imam ari bala anak lelaki Aron deka ngenjuk piring gandum ngagai TUHAN, di mua alta nya.

¹⁵Udah nya, iya deka ngambi segenggam ari tepung enggau minyak nya, enggau menyan ti ba atas utai nya, lalu nunu utai nya retung ba alta, nyadika tanda semua utai nya udah diberi ngagai TUHAN. Bau piring nya deka ngerinduka ati TUHAN.

¹⁶Teda gandum nya deka diempa bala imam. Gandum nya deka digaga nyadi roti ti enda beragi, dipanggang lalu diempa ba endur ti tuchi, iya nya ba tengah laman Langkau Kain TUHAN. TUHAN udah meri gandum nya ngagai bala imam nyadika ungkup sida ari piring ti diberi ngena api. Piring nya amat kudus, baka piring ti dikena muai dosa, enggau piring ti dikena mayar ukum penyalah.

¹⁸Semua lelaki ke ari peturun Aron tau makai utai nya, datai ke belama iya, laban utai nya endang ungkup sida ari piring ti diberi ngena api ngagai TUHAN. Barang sapa negu utai nya deka nyadi kudus.

¹⁹TUHAN meri adat tu ngagai Moses

²⁰kena nyiri anak lelaki Aron nyadi imam. Ba hari iya dichiri, iya deka meri sekilogram tepung (sebaka penyampau enggau piring ti diberi tiap hari) nyadika piring ti diberi ngagai TUHAN, setengah diberi pagi, lalu setengah diberi lemai.

²¹Piring nya enda tau enda ditunyau enggau minyak, lalu dipanggang ba lantai besi, lalu udah nya diperah, lalu diserahka nyadika piring gandum, ti bebau rengut ke TUHAN.

²²Piring tu enda tau enda digaga genap serak peturun Aron ke bekereja nyadi Imam Besai datai ke belama iya. Utai tu enda tau enda abis ditunu retung nyadika piring ti diberi ngagai TUHAN.

²³Nadai utai ari piring gandum ti digaga imam nya tau diempa. Semua piring nya enda tau enda abis ditunu retung.

²⁴TUHAN ngasuh Moses

²⁵meri ngagai Aron enggau ngagai bala anak lelaki iya adat kena ngenjuk piring ti dikena muai dosa. Jelu ti nyadika piring pengampun dosa deka disayat ba tisi utara alta, ba endur alai orang nyayat jelu ti digaga nyadika piring tunu. Piring tu pemadu kudus.

²⁶Imam ke meri jelu nya nyadika piring, deka makai iya ba endur ti kudus, iya nya ba tengah laman Langkau Kain TUHAN.

²⁷Barang sapa tauka sebarang utai negu isi jelu nya, deka bebadi laban kuasa pengudus utai nya. Enti gari bisi kena pechik darah jelu nya, gari nya enda tau enda dibasu ba endur ti kudus.

²⁸Periuk tanah ti udah dikena manduk dagin nya, enda tau enda dipechahka. Enti periuk besi dikena, periuk nya enda tau enda diberus lalu dibasu enggau ai.

²⁹Genap iku lelaki dalam ruang bilik bala imam, tau makai piring nya magang. Piring nya kudus.

³⁰Tang enti darah nya bisi kena bai ngagai Langkau Kain TUHAN, lalu dikena ba pengawa muai dosa, jelu nya enda tau diempa. Iya enda tau enda ditunu retung.