Read Iban Adat Lewi 7 Bible Online

Adat Lewi 7 - Iban bible

Adat Lewi 7

¹Tu adat kena ngenjuk piring ti dikena mayar ukum penyalah. Piring nya kudus.

²Jelu ti diberi nyadika piring nya, enda tau enda disayat ba tisi utara alta, ba endur alai orang ke nyayat jelu ti digaga nyadika piring tunu, lalu darah jelu nya diunsaika ngagai semua empat iti tisi alta nya.

³Semua lemak jelu nya enda tau enda diambi, lalu diberi ngagai TUHAN ba alta nya. Lemak nya nyengkaum lemak ti ba pun iku, lemak ti malut perengka dalam,

⁴tungkul sengayuh, enggau lemak ti malut tungkul sengayuh nya empu, enggau isi ti pemadu manah ari atau jelu nya.

⁵Imam nya deka nunu semua lemak nya retung ba alta nya, nyadika piring ti diberi ngena api ngagai TUHAN. Tu piring kena mayar ukum penyalah.

⁶Genap iku lelaki dalam ruang bilik bala imam, tau makai pemakai nya, tang utai nya enda tau enda diempa ba endur ti kudus, laban piring nya pemadu kudus.

⁷Atur tu sama tau dikena ngenjuk piring ti dikena muai dosa, enggau ngenjuk piring kena mayar ukum penyalah. Dagin nya deka diempu imam ke nyerahka piring nya ngagai TUHAN.

⁸Kulit jelu ti diberi nyadika piring tunu, deka diempu imam ke nyerahka piring nya ngagai TUHAN.

⁹Genap piring gandum, ti udah dipanggang, tauka disediaka ngena kali, tauka ba atas gelegar besi, deka diempu imam ke nyerahka piring nya ngagai Allah Taala.

¹⁰Tang semua piring ti digaga ari tepung gandum, ti enda dipanduk, nemuka tepung nya dichampur enggau minyak, tauka enda, deka diempu bala anak lelaki Aron ti nyadi imam, lalu enda tau enda dibagi bela entara sida.

¹¹Tu adat kena ngenjuk piring pemaik, ti diserahka ngagai TUHAN.

¹²Enti kita ngaga piring tu nyadika piring terima kasih ngagai Allah Taala, kita enda tau enda meri, sama enggau jelu ti deka diberi nyadika piring, siti piring roti ti enda beragi, nemuka piring nya tuku roti ti tebal, ti digaga ari tepung ti dichampur enggau minyak kana, tauka roti ti mipis ti diunsut ngena minyak kana, tauka roti ti digaga ari tepung ti dichampur enggau minyak kana.

¹³Nambahka nya, kita enda tau enda meri tuku roti ti digaga ngena ragi.

¹⁴Kita enda tau enda meri sebagi ari genap macham roti nya nyadika piring ngagai TUHAN. Utai nya deka diempu imam ke mai lalu ngunsaika darah jelu nya ngagai alta.

¹⁵Isi jelu nya enda tau enda diempa sama hari jelu nya diberi nyadika piring. Dagin nya enda tau ditejuka enda diempa datai ngagai pagi hari siti.

¹⁶Enti kita mai piring pemaik kena kita ngamatka semaya, tauka nyadika piring ti diberi nitihka peneka ati diri, ukai semua utai nya patut diempa abis ba hari utai nya diberi. Teda utai nya tau diempa ba hari siti.

¹⁷Teda dagin ti enda abis diempa datai ngagai hari ti ketiga, enda tau enda ditunu.

¹⁸Enti utai nya bisi diempa ba hari ti ketiga, Allah Taala enggai nyambut piring kita. Piring nya nadai pulai ke penguntung kita, tang deka dikumbai piring ti enda tuchi, lalu orang ke makai piring nya deka betanggungjawapka penyalah nya.

¹⁹Enti dagin nya bisi kena tegu utai ti enda tuchi, dagin nya enda tau diempa, tang enda tau enda ditunu. Nyadi pasal dagin ti bukai, orang ke tuchi tau makai dagin nya,

²⁰tang enti orang ke enda tuchi makai dagin nya, iya badu agi dikumbai nembiak Allah Taala.

²¹Lalu enti orang makai dagin ari piring tu, lalu udah bekau iya negu utai ti enda tuchi, nemuka utai nya datai ari mensia tauka ari jelu, orang nya mega badu agi dikumbai nembiak Allah Taala.

²²TUHAN meri adat tu ngagai Moses

²³ke orang Israel. Lemak jelu sapi, jelu bedus tauka kambin enda tau diempa.

²⁴Lemak jelu ti ditemu mati, tauka mati laban jelu babas, enda tau diempa, tang tau dikena ngereja utai bukai.

²⁵Laban barang sapa makai lemak jelu ti patut diberi ngagai TUHAN nyadika piring ti diberi ngena api, deka badu agi dikumbai nembiak Allah Taala.

²⁶ Enda milih endur alai orang Israel diau, sida enda tau sekali-kali makai darah burung tauka darah jelu.

²⁷Barang sapa ngelanggar adat tu, deka badu agi dikumbai nembiak Allah Taala.

²⁸Ku TUHAN bejaku ngagai Moses,

²⁹“Padahka ngagai orang Israel munyi tu: Lebuh kita ngenjuk piring pemaik ngagai TUHAN, kita enda tau enda mai piring nya ngena jari kita empu ngagai TUHAN nyadika piring ti diberi ngena api. Kita enda tau enda mai lemak sama enggau isi dada, lalu miauka isi dada nya di mua TUHAN nyadika piring ti dibiau.

³¹Imam nya deka nunu lemak nya retung ba alta, tang isi dada nya deka diempu bala imam.

³²Lalu pah kanan ari piring pemaik deka diberi kita ngagai imam nyadika piring.

³³Imam ke meri darah enggau lemak ari piring pemaik, deka bempu pah nya nyadika ungkup iya.

³⁴Laban Aku udah ngambi isi dada ari piring ti dibiau, enggau pah ari jelu nya, ari orang Israel, ari piring pemaik sida, lalu meri utai nya ngagai bala imam nyadika ungkup sida belama iya, ari orang Israel.

³⁵Tu meh ungkup ti diberi ngagai Aron enggau bala anak lelaki iya, ari piring ti diberi ngena api ngagai TUHAN, lebuh sida udah dichiri nyadi imam bekereja ke TUHAN.

³⁶Ba hari nya TUHAN ngasuh orang Israel meri sebagi ari piring nya ngagai sida imam. Tu meh adat ti enda tau enda dititihka orang Israel belama iya.

³⁷Tu meh adat pasal piring tunu, piring gandum, piring pengampun dosa, piring kena mayar ukum penyalah, piring kena nyiri imam, enggau piring pemaik.

³⁸TUHAN meri pesan nya ngagai Moses ba Bukit Sinai di menua puang, lebuh Iya ngasuh orang Israel ngenjuk piring sida.