Read Iban Adat Lewi 8 Bible Online

Adat Lewi 8 - Iban bible

Adat Lewi 8

¹Ku TUHAN bejaku ngagai Moses,

²“Bai Aron enggau bala anak lelaki iya ngagai mua pintu Langkau Kain Aku, lalu bai pekayan imam, minyak tata, siku sapi ti lelaki ti agi biak nyadika piring pengampun dosa, dua iku bedus ti lelaki, enggau bakul ti ngundan roti ti enda beragi,

³lalu gempuruka semua orang Israel ba penama ngagai Langkau Kain TUHAN.”

⁴Moses lalu ngereja nitihka pesan TUHAN, lalu ngempuruka semua orang Israel ba penama ngagai Langkau Kain TUHAN.

⁵Moses lalu bejaku enggau sida, “Utai ti baru deka dikereja aku diatu nya utai ti udah diasuh TUHAN kereja aku.”

⁶Moses lalu mai Aron enggau bala anak lelaki iya ke mua, lalu ngasuh sida mandi.

⁷Iya ngerasukka baju enggau baju ti panjai ba Aron, enggau belulang ba punggung iya. Iya ngengkahka epod ba Aron, lalu nanchangka epod nya erat ngena belulang ti melit punggung Aron.

⁸Iya ngengkahka terabai dada ba Aron, lalu nyimpan Urim enggau Tumim [2] dalam terabai dada nya.

⁹Moses ngerasukka labung ba pala Aron, lalu ba mua labung nya Moses ngelekatka perengka emas nyadika tanda ti kudus kena ngelai Aron udah diserahka ngagai TUHAN nitihka pesan TUHAN ngagai Moses.

¹⁰Udah nya Moses ngambi minyak tata, lalu nata langkau sembiang nya, enggau ngagai semua utai ti dalam langkau sembiang nya, kena nyerahka semua utai nya ngagai TUHAN.

¹¹Moses ngambi sekeda minyak tata nya, lalu mechikka minyak nya tujuh kali ngagai alta, enggau ngagai semua pekekas alta nya, sereta enggau ngagai bisin enggau penuduk iya, kena nyerahka semua utai nya ngagai TUHAN.

¹²Moses nuang sekeda minyak tata nya ba pala Aron, kena iya nyiri Aron.

¹³Udah nya, Moses mai bala anak lelaki Aron ke mua, lalu ngerasukka baju ba sida, melitka belulang ba punggung sida, lalu nanchangka selapuk ba pala sida, nitihka pesan TUHAN.

¹⁴Udah nya Moses lalu mai siku jelu sapi ti lelaki, ti agi biak nyadika piring pengampun dosa. Aron enggau bala anak iya ngengkahka jari sida ba pala jelu nya.

¹⁵Moses lalu nyayat jelu nya, lalu ngambi sekeda darah nya, lalu ngena tunjuk iya, malitka darah nya ngagai tanduk alta, kena nyerahka alta nya ngagai TUHAN. Udah nya iya nuang teda darah nya ba kaki alta nya. Nya meh chara iya nyerahka alta nya ngagai TUHAN.

¹⁶Moses lalu ngambi semua lemak ti malut semua perengka dalam, isi ti pemadu manah ari atau jelu nya, enggau semua tungkul sengayuh, sereta enggau semua lemak ti malut tungkul sengayuh nya empu, lalu nunu semua utai nya retung ba alta.

¹⁷Iya ngambi teda bangkai jelu sapi nya, nyengkaum kulit, isi, enggau sengkilung perut, lalu nunu utai nya di luar kem, nitihka pesan TUHAN.

¹⁸Udah nya, Moses mai siku bedus ti lelaki nyadika piring tunu. Aron enggau bala anak lelaki iya lalu ngengkahka jari sida ba pala jelu nya.

¹⁹Moses lalu nyayat jelu nya, lalu ngunsaika semua darah jelu nya ngagai semua empat iti tisi alta nya.

²⁰Iya netak bedus nya, masu perengka dalam, enggau kaki belakang, lalu nunu pala, lemak, enggau perengka bukai ba alta, nitihka pesan TUHAN. Piring ti ditunu tu nyadika piring ti diberi ngena api ngagai TUHAN, lalu bau iya ngerinduka ati TUHAN.

²²Udah nya, Moses mai bedus ti lelaki ti kedua, ti udah diungkup kena nyiri orang nyadi imam, lalu Aron enggau bala anak lelaki iya ngengkahka jari sida ba pala jelu nya.

²³Moses lalu nyayat jelu nya, ngambi sekeda darah iya, lalu malitka darah nya ngagai rambing pending kanan Aron, ngagai tunjuk indu jari kanan iya, enggau ngagai tunjuk indu kaki kanan iya.

²⁴Udah nya, Moses mai bala anak lelaki Aron ke mua, lalu malitka darah nya mimit ngagai rambing pending kanan sida, ngagai tunjuk indu jari kanan, enggau tunjuk indu kaki kanan sida. Udah nya Moses ngunsaika teda darah nya ngagai semua empat iti tisi alta.

²⁵Iya ngambi lemak, lemak ti ba pun iku, semua lemak ti malut semua perengka dalam, isi atau ti pemadu manah, semua tungkul sengayuh, enggau lemak ti malut sida, enggau kaki belakang ti ari kanan.

²⁶Udah nya iya ngambi siti tuku roti ari bakul ti ngundan roti ti enda beragi, ti udah diserahka ngagai TUHAN, siti tuku roti ti digaga ngena minyak, enggau sesingkap roti ti mipau, lalu ngengkahka semua utai nya ba atas lemak enggau kaki belakang ti ari kanan.

²⁷Iya ngengkahka semua pemakai nya ba jari Aron, enggau ba jari bala anak lelaki iya, lalu sida nyerahka semua utai nya nyadika piring ngagai TUHAN.

²⁸Udah nya Moses ngambi pemakai nya ari sida, lalu nunu utai nya ba alta, atas piring tunu, nyadika piring kena nyiri sida. Tu nyadika piring ti diberi ngena api, lalu bau iya ngerinduka ati TUHAN.

²⁹Udah nya Moses lalu ngambi isi dada, lalu nyerahka utai nya ngagai TUHAN nyadika pemeri ti manah. Tu ungkup ke Moses ari bedus ti dikena nyiri bala imam. Moses ngereja semua utai nya nitihka pesan TUHAN.

³⁰Moses lalu ngambi minyak tata, enggau darah ari alta, lalu mechikka utai nya ngagai Aron enggau ngagai bala anak lelaki iya, enggau ngagai pekayan sida. Nya meh chara Moses nyerahka sida enggau pekayan sida ngagai TUHAN.

³¹Ku Moses bejaku enggau Aron enggau bala anak lelaki iya, “Bai isi dagin nya ngagai penama Langkau Kain TUHAN. Panduk dagin nya, lalu empa iya dia, sama enggau roti ti ari bakul piring ti dikena nyiri bala imam, nitihka pesan TUHAN.

³²Tunu teda dagin tauka teda roti.

³³Kita enda tau angkat ari penama ngagai Langkau Kain TUHAN dalam kandang tujuh hari, nyentuk ngagai maya pengawa nyiri imam udah tembu.

³⁴TUHAN udah ngasuh kitai ngereja utai baka ke udah dikereja kitai sehari tu tadi, kena muai dosa kita.

³⁵Kita enda tau enda diau ba penama ngagai Langkau Kain TUHAN, siang malam, dalam kandang tujuh hari, ngereja utai ti udah diasuh TUHAN. Enti kita enda, kita deka mati. Tu utai ti udah dipadahka TUHAN ngagai aku.”

³⁶Nya alai Aron enggau bala anak lelaki iya, ngereja semua utai ti udah dipadahka TUHAN ngena Moses.